Po o Iai ni Agelu o Faatasi ma i Tatou?
Na faafuasei lava ona tupu. I le faatumulia i le mau mafaufauga, e aunoa ma le mafaufau i ona siomaga, na savalivali atu ai Marilynn i luga o le auala o le nofoaafi. Na faafuasei lava ona ia faalogoina le ūū leotele mai o se leo. Na ēa aʻe o ia i luga ma iloa ai, sa tu tonu lava o ia i le auala o le nofoaafi o loo sau! Na tū poupou Marilynn ua lē mafai ona gaoioi ona o le fefe. Na matuā latalata mai lava le nofoaafi o lea na mafai ai ona ia iloa atu mata lanumoana ma foliga mataʻu o le ave nofoaafi. E lē mafai ona galo ia Marilynn le mea na tupu e sosoo ai. Fai mai a ia: “Na pei lava na tulei mai aʻu mai tua e se sauʻai. Na ou lele ese mai le auala ma paʻū i se faatafuna i autafa.” I na o ni nai maosiosia, na tu i luga Marilynn ma faafetai atu i lē na laveaiina o ia—ae e leai se tasi na iloa atu! O le ā lana faaiuga? Fai mai Marilynn: “O laʻu agelu tausi na laveaiina loʻu ola. O ai se isi e mafaia ona laveaiina aʻu?”
I SE lalolagi e faatalitonugatā, e foliga mai ua faafuasei ona faatumulia mafaufauga i agelu. I tausaga talu ai, na avea ai foafoaga faiola faalelagi ma mataupu autū o faaaliga i televise, i tifaga, e oo lava i se tala sa faia i Broadway. O tusi e uiga i agelu, e matuā sili ona alumia i tusi faalelotu o loo faatauina atu. E iai kalapu mo ē talitonu i agelu, o fonotaga, ma nusipepa. Ua faia foi aʻoga faapitoa ina ia fesoasoani ia te oe—e pei ona taʻua e se tasi mataupu e faapea—ina ia “e maua ai le ‘lagolagosua a agelu.’”
I le mātauina o le fiafia o tagata i agelu, ua vaavaai ai tagata faatauoa matapeʻapeʻa mo ni avanoa e gaosia ai le tele o oloa e fesootai ma lenei tulaga mo le faatauina atu. Fai mai se fai faleoloa i le Iunaite Setete, “So o se mea lava e aafia ai agelu, e matuā tele tupe e maua ai.” E faaopoopo i le tele o tusi, ua ia lisiina mai mea ua faia i “faatusa o agelu, e pei o pine, o pepe taalo, o mitiafu, o ata e tusi, ma pepa mo alofaaga”—ma le tele o isi mea, ua taʻua ai e se tusitala, ua maua ai le tele “o tupe faasili faalelagi.”
Ae ua maumauai mai i latou o lagolagoina nei faiga, e lē na o se aʻega lenei mea. Ina ia faamaonia la latou mau, ua latou tuuina mai le tele o faamaoniga—o mea “moni e tutupu i le olaga” i le feagai ai ma agelu. Ua fai mai nisi, na latou vaaia se agelu ua liutino tagata. O nisi, na latou vaaia se malamalama, faalogo i se leo, lagona le faatasi mai o se agelu, pe na lagona foi se uunaiga na latou talitonu e mai se agelu. E toatele tagata e pei o Marilynn, ua fai mai, o se agelu na faasaoina o latou ola.
O le ā le mea o loo tupu? Fai mai Joan Wester Anderson, o lē na tusia ni tusi se lua e uiga i fetaiaiga ma “mana malolosi” e faapea: “Ou te manatu ua toe olaola aʻe le itu faaleagaga.” Ua faamatala atili mai e Alma Daniel, o lē na fesoasoani e tusia se isi tusi. Fai mai a ia, “ua faatonuina nei agelu ina ia faailoa atu i latou lava, ina ia mafai ai ona paʻi atu i le tele o tagata. O le mafuaaga lea ua tatou vaaia ai le anoanoai o i latou, auā ua latou mananao e faia faapea. O le mea lena o loo latou faia.”
Pe moni ea lenei mea? Po o iai se isi mea i tua o le taulai atu o manatu i agelu i le taimi nei? Ina ia iloa, e tatau ona tatou suesueina le Afioga a le Atua. O loo i le Tusi Paia le upu moni e uiga i agelu, e pei ona o le a tatou vaai i ai.
[Ē Ana le Ata i le itulau 2]
Itulau 3 ma le 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.