Le Upu Moni e Uiga i Agelu

O le faamasani i se tasi, e masani lava ona aofia ai le iloa o se mea e uiga i le aiga o lena tagata. E faapena foi le oo ina iloa Ieova le Atua. E tele mea e aafia ai nai lo o le na ona iloa o lona suafa. E tatau foi ona tatou iloa se mea e uiga i lona “aiga” i le lagi. (Faatusatusa i le Efeso 3:14, 15.) Ua taʻua e le Tusi Paia agelu o “atalii” o le Atua. (Iopu 1:6) I le iloiloina o la latou vaega tāua i le Tusi Paia, e ao ai ona tatou mananao ia sili atu ona tatou iloa e uiga ia i latou ma malamalama i lo latou tulaga i fuafuaga a le Atua.

E IAI se tū faaopoopo fou ua tupu mai. E lē gata e toatele tagata e talitonu i agelu; ae ua toatele foi ua faapea mai, na faaaafia i latou e agelu i nisi auala. Ina ua fesiligia le 500 o tagata Amerika, “Pe na e lagona totino le aafia ai o se agelu i lou olaga?” e toetoe lava o le tasi vaetolu na tali mai, ioe. E maofa foi ona o le toatele o talavou ua faapea mai e talitonu i agelu—e tusa i se palota na faia i le Iunaite Setete, e 76 pasene e talitonu! E mautinoa, e naunau tagata e fia iloa e faatatau i agelu. Ae e faapefea ona faafetaui atu mafaufauga faaonaponei e uiga i agelu ma le upu moni o le Tusi Paia?

Faaofiofi Mālie mai o le Vaega a Satani

Pe a tautala e uiga i agelu, e lē tatau ona tatou faagaloina agelu leaga, o foafoaga faalelagi o ē ua faapea le Tusi Paia na fouvale i le Atua. O le aupito sili o nei agelu, o Satani. Ua taʻua e se tusi lauiloa o le Ask Your Angels e faapea, o Satani “o se vaega o le Atua” o lē o loo fesoasoani i tagata e faamalosia o latou “musele faaleagaga” e ala i le tofotofoina pea o i latou. E ui i “faanaunauga lelei” o Satani, ua faapea mai le tusitala, ua tele senituri o faailoaina sese o ia e faapea e leaga. Ua latou faaopoopo mai, o Satani ma Iesu, “e ui ina lē lagolagoina e le tasi le isi, ae o le mea moni e tutū faatasi i laua i le itu e tasi, e pei o ni vaega eseese o le tino atoa e tasi.” O ni faamatalaga nei e ofo ai, ae o le ā o fai mai ai le Tusi Paia?

Ua faamanino mai e le Tusi Paia, o Satani e lē o se “vaega o le Atua” ae o se fili o le Atua. (Luka 10:18, 19; Roma 16:20) Ua ia luʻia le Pule silisiliese a Ieova, ma o ona faanaunauga agaʻi i tagata e faigata ona faapea atu e “alofa.” Auā ua ia faasasao lona ita e aunoa ma se alofa i auauna faalelalolagi a le Atua. Ua ia molia i latou i luma o le Atua i le ao ma le po!a (Faaaliga 12:10, 12, 15-17) Ua faanaunau Satani e faia so o se mea e faaleagaina ai i latou. O lona sauāina ma le lē alofa o le tagata amiotonu o Iopu, ua faaalialia ai ona uiga lē alofa i mafatiaga o le tagata.—Iopu 1:13-19; 2:7, 8.

Nai lo o le iai i le “itu e tasi,” e eseese mamao lava Satani ma Iesu, e matuā feteenai lava le tasi i le isi. Ioe, e mautinoa lava o Satani na ia taaina Herota e faia se poloaiga ina ia fasiotia tamaiti uma lava—i se taumafaiga ina ia fasiotia ai le tamaitiiti o Iesu! (Mataio 2:16-18) Ma o osofaiga a Satani, na faia pea seia oo lava i le maliu o Iesu. (Luka 4:1-13; Ioane 13:27) I lea, nai lo o le avea o ni “vaega eseese o le tino e tasi,” o Iesu ma Satani, e matuā feteenai lava. Ua faaalia i le valoaga o le Tusi Paia e faapea, e matuā iloa lelei lava lo la feitagai. (Kenese 3:15) Ma le talafeagai lava, o Iesu ua toe faatuina, o le a ia faaumatiaina Satani i le taimi atofaina a le Atua.—Faaaliga 1:18; 20:1, 10.

Tatalo ia te Ai?

Ua fautuaina e nisi e lagolagoina lenei faatuatuaga i agelu le mafaufau loloto, faapea ma isi faiga ina ia mafai ai ona fesootai ma agelu. Ua faapea mai se tasi tusi, “O so o se talosaga faamaoni mo se fesootaiga ma se sui o le aiga faalelagi, e lē mafai lava ona lē faafofogaina mai. Ole atu, ona talia mai lea o oe.” O Mekaeli, Kaperielu, Urielu, ma Lafaele, o nisi na o agelu ua fautuaina mai i le tusi ina ia faafesootaia.b

Ae, na aʻoaʻo e Iesu ona soo ina ia tatalo i le Atua, ae lē o agelu. (Mataio 6:9, 10) Na tusi mai foi Paulo e faapea: “Ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai.” (Filipi 4:6) O lea la, i a latou tatalo, e faalatalata atu Kerisiano e tau lava o Ieova, ma latou te faia faapea e ala i le suafa o Iesu Keriso.c—Ioane 14:6, 13, 14.

Pe e Iai se Lotu a Agelu?

E tusa ma faamatalaga a Eileen Elias Freeman, o lē e pulea le Nofoaga e Mataʻitū ai Gaoioiga a Agelu (AngelWatch Network), e faapea, o “agelu e sili aʻe i lotu uma, filosofia uma, ma talitonuga uma. Ae o le mea moni, e leai se lotu a agelu e pei ona tatou iloa ai.”

Ae, ua faamanino mai e le Tusi Paia e faapea, e iai le lotu a agelu faamaoni; latou te tapuai i le Atua moni, o Ieova, o lē e leai se atua e la te tutusa. (Teuteronome 5:6, 7; Faaaliga 7:11) O lea, na faapea ona faamatala atu e se agelu ia lava i le aposetolo o Ioane e faapea, o aʻu ‘o se uso a auauna,’ o ē e usiusitai i poloaiga a le Atua. (Faaaliga 19:10) E leai lava se mea o le Tusi Paia o tatou faitau ai e uiga i ni agelu e faapea o loo latou lagolagoina se isi ituaiga o tapuaiga. E tuutoina atoatoa atu i latou uma ia Ieova.—Esoto 20:4, 5.

“Le Tamā o le Pepelo”

O le toatele lava o i latou ua faapea mai na fetaiai ma agelu, ua aafia i le faia o ni fesootaiga ma ē ua oti. Ina ua uma ona ia maua o se mea sa ia lagona e faapea o se faailoga, na faapea mai ai se fafine e igoa ia Elise: “Sa ou lagona ua maua e le uso o loʻu tamā se auala e oo mai ai ia te au ma faailoa mai e faapea, ua ia maua le fiafia.” E manatua foi e Terri se uo pele ua maliu. Ua fai mai o ia: “I se vaiaso ina ua mavae le falelauasiga, na sau ai o ia ia te au, ae na ou manatu faapea ai o se miti. Na ia taʻu mai ia te au e lē tatau ona ou faanoanoa i lona alu ese auā o loo fiafia ma saogalemu o ia.”

Ae ua taʻua i le Tusi Paia e faapea, o ē ua oti, “latou te le iloa se mea.” (Failauga 9:5) Ua faapea mai foi le Tusi Paia pe a oti se tagata, “e faaumatia i lea lava aso ona manatunatu.” (Salamo 146:4) Ae peitai, o Satani, o le “tamā o le pepelo.” (Ioane 8:44) O ia lea na amataina le pepelo e faapea, e mafai ona ola le solu o le tagata i se isi mea pe a mavae le oti. (Faatusatusa i le Esekielu 18:4.) E toatele tagata i aso nei e talitonu i lenei mea, lea e fetaui lelei ma le faufauga a Satani, auā ua faaleaogaina ai i lea manatu, le manaomia ona faatuatua i le toetu—o se aʻoaʻoga faavae o le Faa-Kerisiano. (Ioane 5:28, 29) O lea, o le fesili atu i ē ua oti pe e foliga mai e maua mai ni feau mai ia i latou, o se tasi lea o vala o lenei faatuatuaga i agelu, lea e lē o faamaonia e le Atua.

Faalatalata atu i Agelu po o Temoni?

O le tele o le faatuatuaga i agelu i le taimi nei, ua fesootai atu i faiga faataulaitu. Manatu i le mea na tupu ia Marcia. Fai mai a ia: “Na amata mai ia Setema e oo ia Tesema i le 1986, na ou maua ai feau mai ‘le nofoaga o agaga.’ Sa ou vaai ai i foliga uiga ese ma faia ni miti e lē masani ai e uiga i ‘le olaga i taimi ua mavae.’ Sa ou fesootai i uo ua maliliu ma le tele lava o isi mea e fesootai i faiga faaagaga na ou oo i ai, o lea na ou iloa ai mea e uiga i tagata na seʻi ou faatoa feiloai atu i ai. Sa faamanuiaina foi aʻu i se meaalofa, o le faafuasei ona tusitusia o mea e aunoa ma le iloa, ma faasalalauina atu feau mai agaga. O nisi, o ē ou te lei feiloai atu i ai i le taimi a o feola, latou te aauina atu ni feau i isi e ala atu ia te au.”

O le faaaogaina o faiga faataulaitu e “fesootai” atu ai ma agelu, ua o se mea e masani ai. Ua faamalosiau tuusaʻo lava e se tasi puna ona tagata faitau ina ia faaaogā maa faataulaitu, pelē, tupe I Ching, faitauina o le alofilima, ma sailiga i fetu. Ua tusi mai le tusitala e faapea: “Ia faataga lou tagata i totonu e taʻitaʻiina oe i le aitu vavalo e fetaui ma oe, ma faatuatua o le a faafeiloaia oe e se agelu i inā.”

Ae peitai, e tusa ai ma le faamatalaga a le Tusi Paia, e so o se mea lava o le a ‘faafeiloaia oe i inā,’ e mautinoa e lē o se agelu a le Atua. Aisea? Auā o faiga faataulaitu, e matuā faasagatau i le Atua, ma o tagata tapuai faamaoni—i le lagi ma le lalolagi—e matuā leai lava se fesootaiga ma lea mea. Ioe, o faiga faataulaitu a Isaraelu, o se solitulafono matuiā e faasala ai i le oti! Ua faapea mai le Tulafono: “Auā e inosia e Ieova o i latou uma o e faia na mea.”—Teuteronome 13:1-5; 18:10-12.

“Se Agelu o le Malamalama”

E lē o se mea e tatou te ofo ai ona o le mafai e le Tiapolo ona faafoliga mai faiga faataulaitu e faapea e aogā, pe e faaagelu foi. Ua faapea mai le Tusi Paia o Satani “ua liua o ia e ia ma agelu o le malamalama.” (2 Korinito 11:14) E mafai foi ona ia faia galuega mamana ma faataunuu, ina ia faaseseina ai manatu o i latou o vaavaai atu i ai e faapea o le vavega e mai le Atua. (Faatusatusa i le Mataio 7:21-23; 2 Tesalonia 2:9-12.) Ae peitai, o galuega uma a Satani—e tusa lava pe foliga mai e lelei pe leaga—e tasi lava le auga: a lē o le faaliliueseina o tagata mai le Atua, ia po o le na ona faatauasoina ai o latou mafaufau ina ia ‘aua neʻi susulu atu i ai le malamalama o le tala lelei mamalu e uiga i le Keriso.’ (2 Korinito 4:3, 4) O le auala taufaasese pito lata mai lenei a Satani, e masani lava ona sili ona maua mai ai ni āuga.

Seʻi manatu i le faamatalaga a le Tusi Paia e uiga i se auauna teine i le uluai senituri. O ana valoaga na maua ai e ona alii le oa e tele. Mo le tele o aso, sa mulimuli atu ai o ia i le au soo, ma faapea atu: “O auauna nei tagata a le Atua silisili ese, latou te talaʻi atu ia te outou le ala o le faaolataga.” Sa moni upu a le teine. Peitai, ua taʻu mai e le faamatalaga ia i tatou e faapea, sa uluitinoina o ia, e lē o se agelu, ae o se “aitu vavalo” po o se temoni. Mulimuli ane, na “fāliu atu [Paulo] ma ua fai atu i le aitu, ‘Ou te fai atu ia te oe i le suafa o Iesu Keriso, alu ia i fafo ia te ia.’ Ona alu ai lea o ia i fafo i lea lava itu aso.” —Galuega 16:16-18.

Aisea na tulia ai e Paulo lenei agaga leaga? O iuga o ana gaoioiga sa maua ai oa e tele ma matai o le teine na uluitinoina e temoni. Ona o le mana o temoni, atonu na mafai ai ona taʻu atu e le teine i le au faifaatoaga le taimi e totō ai, i tamaitai le taimi e faaipoipo ai, ma le au eli auro i nofoaga e saili ai mo ni auro. Ioe, o le agaga lenei na oo lava ina uunaia ai le teine e tautala i le upu moni, i le viiviia o le au soo i luma o tagata!

Ae peitai, “o se aitu vavalo.” I le avea o se temoni, e leai sana aiā e folafola ai fua e uiga ia Ieova ma lana sauniuniga mo le faaolataga. O lana lauga faaviivii, atonu na faia ina ia talitonu ai i valoaga a le auauna teine, ma faatosina ese ai mafaufau o tagata mai soo moni o Keriso. O se mafuaaga lelei, na lapataia ai e Paulo tagata i Korinito e faapea: “Tou te le mafaia ona faatofutofusia i le laoai a le Alii atoa ma le laoai a temoni.” (1 Korinito 10:21) E lē o se mea la e ofo ai, na faaumatia e Kerisiano o le uluai senituri a latou tusi uma sa fesootai atu i faiga faavalovaloga.—Galuega 19:19.

Se “Agelu o loo Lele i le Taulotoaiga o le Lagi”

E pei ona tatou iloa, ua faaalialia e le Tusi Paia le tele o gaoioiga a agelu i le taimi nei e faapea, e iai se fesootaiga vavalalata ma gaoioiga a le Fili o le Atua, o Satani le Tiapolo. Po o le uiga la o lenei mea, e lē o aafia agelu paia i mataupu a tagata? I le tuufeagai ai, o loo latou faia nei se galuega malosi i le lalolagi. O le ā lea galuega? Mo se tali, e tatau ona tatou vaai i le tusi o le Tusi Paia, o Faaaliga. E faatele ona taʻua agelu i lenei tusi nai lo o se isi lava tusi o le Tusi Paia.

I le Faaaliga 14:6, 7, ua tatou faitau ai i le faamaumauga a le aposetolo o Ioane e uiga i se vaaiga faavaloaga na ia vaaia e faapea: “Na aʻu iloa foi le tasi agelu ua lele i le taulotoaiga o le lagi, ua ia te ia le tala lelei faavavau e folafola atu i e nonofo i le lalolagi, i atunuu uma, ma ituaiga, ma gagana eseese, ma nuu, ua faapea atu ma le leo tele, ‘Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.’”

Ua faamatilatila e lenei mau le galuega aupito sili ua faia e agelu i aso nei. O loo aafia i latou i se tofiga e sili atu ona maualuga e faamuamua—o le folafolaina atu o le tala lelei o le Malo o le Atua. Na folafola atu e Iesu i ona soo e tusa ai ma lenei galuega: “Ou te ia te outou i aso uma lava, e oo lava i le gataaga o le lalolagi.” (Mataio 28:18-20) E faapefea ona iai Iesu i ona soo? O le tasi o auala, o le saunia lea o le fesoasoani faaagelu ia i latou ina ia mafai ai ona faataunuuina lenei galuega iloga.

Ua faaalu e Molimau a Ieova e sili atu i le piliona itula i tausaga taitasi i le talaʻiina o le tala lelei o le Malo o le Atua. A o faia lenei galuega, latou te vaaia ai faamaoniga o le taʻitaʻiga a agelu. I la latou faiva mai lea fale i lea fale, e masani lava ona tupu o lenei mea, i lo latou tau atu i ni tagata o ē na seʻi faatoʻā uma ona tatalo mo se tasi e fesoasoani atu ia i latou ia malamalama i fuafuaga a le Atua. O le taʻitaʻiga a agelu faatasi ma le uiga tausolomua o le Molimau lava ia, ua iu ai i le ō mai o le faitau selau afe o tagata i tausaga taitasi ina ia malamalama e uiga ia Ieova!

Po o e faalogo i le agelu lea o loo lele i le taulotoaiga o le lagi? Pe a asiasi atu Molimau a Ieova, aisea e lē matuā talanoa lelei ai ma i latou lenei feau faaagelu?

[Faaopoopoga i lalo]

[Pusa i le itulau 8]

O AI AGELU?

E ESE ai mai le talitonuga o le toatele, o agelu e lē o ni agaga o tagata ua maliliu. Ua taʻua ma le manino i le Tusi Paia e faapea, o ē ua oti “latou te le iloa se mea.” (Failauga 9:5) O fea la na ō mai ai agelu? Ua faaalia i le Tusi Paia e faapea, o i latou na foafoaina taitoatasi e le Atua a o lei faavaeina le lalolagi. (Iopu 38:4-7) E lē taumatea e faitau selau miliona agelu i le aiga faalelagi o le Atua, atonu pe faitau piliona pe sili atu foi! O nisi agelu na aufaatasi atu ma Satani i lana fouvalega.​—Tanielu 7:10; Faaaliga 5:11; 12:7-9.

Ona o Ieova o le Atua maopoopo, e lē o se mea la e ofo ai i le maopoopo atoatoa o lona aiga e matuā toatele o agelu.​—1 Korinito 14:33.

• O le agelu aupito sili, e lē gata e malosi ae iai le pule, o le agelu sili lea o Iesu Keriso, ua taʻua foi o Mekaeli. (1 Tesalonia 4:16; Iuta 9) I lalo o lana pule, e iai serafi, kerupi, ma agelu.

• O serafi, o i latou na e auauna i le nofoalii o le Atua. O lo latou tofiga, e manino lava, e aofia ai le faalauiloaina atu o le paia o le Atua, ma le tausia ia mamā o ona tagata.​—Isaia 6:1-3, 6, 7.

• O kerupi e vaaia foi i le mea e afio ai Ieova. O i latou o loo tauaveina ma faafeaoina le nofoalii o le Atua, o loo latou lagolagoina le mamalu o Ieova.​—Salamo 80:1; 99:1; Esekielu 10:1, 2.

• O agelu (o lona uiga o “ave feau”) o ni sui tofia a Ieova. Latou te faataunuuina le finagalo o le Atua, pe i le faasaoina o tagata o le Atua po o le faaumatiaina o ē amio leaga.​—Kenese 19:1-26.

[Ata i le itulau 7]

Po o e faalogo i le agelu lea o loo lele i le taulotoaiga o le lagi?