Sa Lei Mou atu Lo Latou Malamalama

I TAIMI o le Tusi Paia sa iai Molimau faamaoni a Ieova na oo i ai faiga e faavaivaia ai ma faafitauli. Na fetaiai i latou ma teteega ma tulaga e foliga mai ai ua lē taulau. Ae ui i lea, na lei fiu ai i latou i le tulaga faavaivaia na latou oo i ai. O lona uiga, sa lei mou atu lo latou malamalama.

E mo se faaaoaoga, sa avatua i le perofeta o Ieremia se tofiga e avea ai ma perofeta a le Atua i le nuu aposetate o Iuta. Na ia faalauiloaina atu le lapataiga e uiga i le oo mai o le faaumatiaga o Ierusalema. (Ieremia 1:11-19) O le iuga, na tele ai ni fefinauaiga a Ieremia ma tagata o lona atunuu, ia na latou vaai ia te ia o se tagata faatupu faalavelave.

O le faitaulaga o Pasura, le matai sili i le fale o le Atua, na ia taia Ieremia ona o mea na ia valoiaina, ma tuuina o ia i laau faamau. I lea mea na foliga mai ai ua lē toe gaoioi Ieremia, na faapea mai ai o ia: “Ua fai aʻu ma mea e tapisa ai i aso uma, ua tauemu mai ia te au tagata uma. Auā a ou tautala atu, ua ou alaga, ua ou valaau, o le saua ma le faatafunaga; auā ua avea le afioga a Ieova ma mea e faalumaina ai aʻu, ma tauemua i aso uma.” Na faavaivaia le perofeta ma oo ai lava ina fai mai: “Ou te le taʻutaʻuina o ia [Ieova], ma ou le toe tautala i lona suafa.”—Ieremia 20:1, 2, 7-9.

E ui i lea, sa lei lolo atu Ieremia i le faavāivāiga. O lona tautala i “le afioga a Ieova,” na ia faapea mai ai: “O loʻu loto e peiseai o se afi mumū sa i ai, ua punitia i oʻu ivi, ua lailoa aʻu i onosai, ua ou le mafaia lava.” (Ieremia 20:8, 9) O le uunaia malosi e tautala atu i fetalaiga a le Atua, na faatumauina ai Ieremia e le agaga paia ma ia faataunuuina ai lona tofiga.

Na tele foi ni mafuaaga sa ono faavaivai ai le aposetolo o Paulo pe ana lolo atu i ai. Na onosai o ia i mala faalenatura, afatia i folauga, sauāga, ma le sasaina. E faaopoopo atu i ai, ‘o le mea sa mafatia ai o ia mai lea aso i lea aso, o le popole lea ona o ekalesia uma.’ (2 Korinito 11:23-28) Ioe, na faafesagai Paulo i aso uma ma faafitauli, i le popole i faapotopotoga fou ia na ia fesoasoani i ai i le faavaeina. E lē gata i lea, sa lei atoatoa ona lelei o ia ma sa tatau ai ona ia tauivi malosi i “le mea matuitui i le tino,” e foliga mai o le leaga o lana vaai. (2 Korinito 12:7; Roma 7:15; Kalatia 4:15) Na fai foi e nisi tala o Paulo e aunoa ma lona iloaina, ae na iai lava le taimi na ia iloaina ai.—2 Korinito 10:10.

E ui lava i ia tulaga, sa lei faatagaina e Paulo faavāivāiga e lofiaina ai o ia. E leai, e lē o ia o se tagata sa iai sona mana. (2 Korinito 11:29, 30) O le ā na māfua ai ona mumū pea ‘lana afi’? O se tasi o mea, sa iai ana aumea na lagolagoina o ia, o nisi na oo lava ina ō atu ma ia i Roma, le mea lea na leoleoina ai le fale sa nofo ai. (Galuega 28:14-16) O lona lua, na paleni le auala na vaai ai le aposetolo i lona tulaga. O i latou na sauāina ma tetee mai ia te ia sa mautinoa le sese, ae lē o Paulo. I le agaʻi atu i le iuga o lona soifuaga faalelalolagi, na ia fuaina ai lana faiva i se auala mautinoa ma fai mai ai: “O lenei, ua teuina mo aʻu le pale o le amiotonu, e foaiina mai ia te au i lea lava Aso e le Alii le faamasino amiotonu.”—2 Timoteo 4:8.

E sili i na mea uma, sa faalatalata atu pea e lē aunoa Paulo ia Ieova le Atua i le tatalo, ma ‘sa ia te ia le Alii na foaiina ia te ia le malosi.’ (2 Timoteo 4:17) Na faapea mai Paulo: “Ou te mafaia mea uma lava ona o ia ua faamalosi mai ia te au.” (Filipi 4:13) O fesootaiga ma le Atua ma uso Kerisiano, faatasi ai ma le fuaina ma le mautinoa o lana faiva, na fesoasoani lea ia Paulo e faaauau ai i le auaunaga ia Ieova.

Na faagaeeina Paulo e le Atua e tusi e faapea: “Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.” (Kalatia 6:7-9) Selesele mai ai le ā? Le ola e faavavau. O lea la, ia pei o Ieremia, Paulo, ma le toatele o isi molimau faatuatua a Ieova ua taʻua i le Tusi Paia. Ioe, ia pei o i latou, ma ia aua neʻi lolo atu i faavāivāiga. Aua le faatagaina lou malamalama e mou ese atu.—Faatusatusa i le Mataio 5:14-16.

[Ata i le itulau 25]

Sa lei faatagaina e Paulo ma Ieremia o la malamalama e mou ese atu