Sa Faaauau Ona Talanoa Ieremia e Uiga iā Ieova

E aamu pe feita mai isi pe a tatou talanoa atu i ai e uiga iā Ieova. O nisi taimi e faavaivaia ai i tatou ma lē toe fia talanoa atu ai i isi e uiga iā Ieova. Pe na iai se taimi na faapena ai ou lagona?— O loo taʻua i le Tusi Paia se tama na alofa tele iā Ieova, ae na toetoe lava lē toe talanoa e uiga iā Ieova. O lona igoa o Ieremia. Seʻi o tatou talanoa e uiga iā te ia.

A o talavou Ieremia, na faatonu o ia e Ieova e alu e lapataʻi tagata ia aua neʻi toe faia mea leaga. Sa faigatā tele iā Ieremia ona faia lenā mea, ona sa fefe o ia. Na faapea atu Ieremia iā Ieova: ʻOu te lē iloa se tala a fai atu. O aʻu o se tamaitiiti.’ Ae na fetalai mai Ieova: ʻAua e te fefe. O le a ou fesoasoani iā te oe.’

Sa amata loa ona taʻu atu e Ieremia i tagata o le a faasalaina i latou pe a faia pea mea leaga. Pe na usitaʻi tagata i le feʻau na taʻu atu e Ieremia?— E leai. Na latou aamu, feita, ma mananaʻo e fasioti o ia. O le ā sou manatu, o ā faalogona o Ieremia ona o lenā mea?— Sa fefe o ia ma faapea mai: ʻOu te lē toe taʻutaʻu atu Ieova i isi.’ Pe na musu moni lava Ieremia?— Leai. Sa alofa tele o ia iā Ieova, ma na faaauau ona ia talanoa atu i isi e uiga iā Ieova. O le mea lenā na puipuia ai pea e Ieova Ieremia.

O se faataʻitaʻiga, e iai ni tamāloloa leaga sa mananaʻo e fasioti Ieremia. O lea na latou tuuina ai Ieremia i se pū loloto ma palapalā, e aunoa ma se vai po o ni meaʻai. Peitaʻi, sa fesoasoani Ieova iā Ieremia ma faasaoina lona ola.

O le ā e te aʻoaʻoina mai iā Ieremia?— E ui o nisi taimi sa fefe o ia, ae na faaauau pea ona ia talanoa atu e uiga iā Ieova. I aso nei, e iai tagata e aamu pe feita mai pe a tatou talaʻi atu i ai e uiga iā Ieova, ma e tatou te lagona ai le mā ma le fefe. Peitaʻi, ia faaauau pea ona tatou talaʻi atu e uiga iā Ieova. O le a fesoasoani mai o ia, e pei ona ia faia iā Ieremia.