Foai—Pe o Faatalitalia Ea?

ATONU o loo e iloaina lelei le faamalosia pea o le foai atu o meaalofa e aganuu. E iai faatasiga i le tele o aganuu e faatalitalia ai meaalofa. O na meaalofa e ono faauigaina o ni faaaliga o le faaaloalo po o faailoaga o le alofa. O le tele o ia meaalofa e lē faaaogaina lava e i latou o loo mauaina; o isi ua fesoasoani e faamalieina ai ni manaoga moni lava na iai ma e matuā talisapaia tele.

Pe a fanau se pepe i Tenemaka, ona asiasi lea i ai o uo ma aiga ma meaalofa e latou te iloa o le a aogā i le pepe. I isi atunuu, e faia ai e uo se faatasiga fiafia lea e foai atu ai meaalofa mo le pepe o le a fanau mai.

I le tele o tulaga, ua avea ai faatasiga e faatalitalia ai meaalofa o ni mataupufai faaletausaga. E ui ina sa lei avea ma faiga e masani ai i uluai Kerisiano ia faatasiga, ae na matuā taatele i le toatele na faapea mai o latou o Kerisiano ma ē foi e lē o ni Kerisiano. I tū a isi atunuu atonu ua tau mou atu ai le foaia o ni meaalofa o aso fanau pe a matutua tamaiti, ae e faamalosia i le tū a tagata Eleni. E faatāuaina tele i Eleni aso fanau. E latou te foai foi meaalofa i se tagata i le “aso o [lona] igoa.” O le ā lena mea? Ia, i aganuu faalotu, e tofu le aso o le tausaga ma le “sagato” e faapipii atu i ai, ma e toatele tagata ua faaigoa ai i igoa o na “sagato.” Pe a oo mai la le aso “o sagato,” ona maua ai lea e i latou ua iai lena igoa, ia meaalofa.

E faaopoopo atu i faamanatuga o aso fanau mo a latou fanau, e iai foi se aso mālōlō faalemalo a tagata Korea ua taʻua o le Aso o le Fanau. O le taimi lea e ō ai tafaoga a aiga ma foai atu ai meaalofa i fanau e tusa lava pe e lē o aso ia na latou fananau ai. E iai foi le Aso o Mātua a Korea, lea e foai atu ai fanau i o latou mātua, ma le Aso o Faiaʻoga, lea e faatāuaina ai e tamaiti aʻoga o latou faiaʻoga ma avatua ai meaalofa ia i latou. E tusa ai i le aganuu a Korea, a oo se tagata i le 60 o ona tausaga, ona fai lea o se fiafia tele. E aufaatasi ai aiga ma uo i le faailoaina atu o moomooga mo le loa ma le fiafia o le soifuaga o se tagata ua oo i lea matua o lona soifua, ma tauaaoina atu ai meaalofa ia te ia.

O le faaipoipoga o se tasi o faatasiga i le tele o aganuu e iai ai foi le manaoga mo meaalofa. Pe a faaipoipo se tama ma se teine i Kenya, e faatalitalia le aiga o le tama e avatua se meaalofa i le aiga o le teine faaipoipo. E aumaia foi e mālō meaalofa. Pe a fai le faaipoipoga a le teine ma le tama faaipoipo e tusa ai i le aganuu, e nonofo mai la i laua i luma, a o gasolo atu mālō e avatu a latou meaalofa. A o taitoatasi ona tuuina atu meaalofa, ona faia lea o se faasilasilaga e faapea “O Pai ma Lafai lea ua aumaia se meaalofa i le ulugalii.” O le toatele o i latou e avatua meaalofa e matuā lē malilie lava pe a lē faailoa maia faapena i latou.

I tagata Lepanona, pe a faaipoipo se tasi, ona amata lea ona ō atu uo ma tuaoi, e oo lava i tagata e latou te lē iloaina lelei le tama ma le teine ua faaipoipo, ma meaalofa ia i laua, i nisi aso mulimuli ane ina ua mavae le aso o le faaipoipoga. E mai i le taimi a o laiti, e aʻoaʻoina ai i latou e faapea o le foaiina atu o meaalofa, o se tiute tauave, e pei o loo totogiina se aitalafu. Na fai mai se tamaloa Lepanona e faapea: “Afai e te lē faia, e lē lelei ou faalogona. O le uputuu na ola mai ai.”

Ae peitai, i faatasiga uma e faatalitalia ai le foai atu o meaalofa, ua silisili ai lava le Kirisimasi i le tele o atunuu. Pe e lē moni ea lena i le mea o loo e nofo ai? Talu ai nei lava po o le 1990, na fuaina ai e faapea e faaaluina e tagata Amerika i le tausaga le sili atu i le 40 piliona tālā i meaalofa o le Kirisimasi. I faiga e sili ona latou fiafia i ai, ua faamanatuina ai foi e tagata Lotu Puta ma tagata Lotu Sinitu i Iapani lena aso mālōlō, ma ua mauaina foi i Europa, Amerika i Saute, ma vaega o Aferika le mau faiga eseese o le faamanatuina o lea aso.

O le Kirisimasi o se vaitau lea e faatalitalia e tagata e fiafia ai, ae e toatele e lē o faapena. Ma o le toatele ua iloa e faapea o le soona pisi naʻuā i le faatauina o meaalofa ma le popole i le totogiina o tau o ia meaalofa, e faaleaogaina atoa ai se taimi fiafia latou te mauaina.

Ae peitai, ua fai mai le Tusi Paia e iai le fiafia i le foai atu. O le mea moni lava e iai, e faalagolago i le agaga ua faia ai le foai.—Galuega 20:35.