Le Pogai na Ia Faaaogā ai le Suafa Silisili

“Ua ou agasala, e tusa ai o le manatu o se tasi o aʻu tusitala fai manatu i le faaaogaina o le suafa o ‘Ieova’ ae lē o le ‘Alii,’ lea sa iai lona uiga tutusa i le aganuu mo le tele o senituri.”

O le faamatalaga lena a J. J. Stewart Perowne i le faatomuaga o le lomiga lona lua o ana faaliliuga o le tusi o Salamo, lea na lomia muamua i le 1864. O tusitusiga a le tusitala fai manatu i le Saturday Review ia Iulai 2, 1864, na tetee ai i le faaaogaina o le suafa o le Atua i le faaliliuga, e pei ona sa lei toe faaaogaina e tagata Iutaia po o lotu Kerisiano. Na ia finau mai o le suafa o Ieova ua fesootai vavalalata ma tagata Iutaia ma ua tatau ona faaaogā se isi upu e pei o le “Alii” po o le “Atua,” lea ua “masani ai le toatele.”

Sa lei ioe Perowne e tusa ai ma nei manatu, ona talu ai sa leai ni ona “faanaunauga e soloiesea uluai mataitusi taitasi” o faaaliga a le Atua i le tagata. Na ia taʻu mai ma le saʻo e faapea o tagata faaliliu o ē na faaliliuina le suafa Eperu o le Atua i le “Alii” latou te lei iloa le eseesega i va o upu Eperu e lua.

E faaopoopo atu i ai, na faamautinoa mai e Perowne sa iai ni tusitala agavaa na malilie i le toe faaaogaina o le suafa o le Atua. Na ia sii mai le fatusolo taʻutaʻua mai Egelani o Samuel Taylor Coleridge:

“Aisea e faaauau ai ona faaliliuina le gagana Eperu i le faa-Peretania e ala i le faaaogaina o isi faaliliuga e pei o le faaliliuga o le Septuagint? Pe tatou te lē o faaaogaina ea le upu Eperu o Ieova? Pe e lē o le Κύριος, po o le upu Alii, o loo faaaogā i le Septuagint, o se upu Eleni ua suitulaga mo le upu Eperu o Ieova lea ua faaaogaina mo le tele o tausaga? Aisea la, e lē toe faafoi ane ai le uluai upu; afai o le Feagaiga Tuai, ona faaaogā lea o le upu Ieova pe afai o loo faasino atu i se uiga faalelotu ia Ieova, faapea ma mau uma i le Feagaiga Fou o loo faasino atu i le upu Eperu o loo i le Feagaiga Tuai i le mau lea o loo faaaogā ai lea upu?”

Na ioe Perowne ua lē o toe maua le faaleoga saʻo o le upu Eperu Tetakalamatone (mataitusi Eperu e fa mo le suafa o Ieova), ae na ia faapea mai: “Afai o talitonuga i uputuu na māfua ai ona mou atu le suafa i Lotu Iutaia, ma afai o le pipiimau atu i upu i le taimi na siiina ai mai le Faaliliuga Eleni ma le Latina na aveesea ai le upu mai la tatou Faaliliuga [faa-Peretania], e lē o ni mafuaaga tatau na e teena pe e lē talia ai le toe foi i lona uluai faaaogaina.” Na ioe Perowne i le upu “Ieova” auā sa lauiloa. Talu mai lena taimi na faaaogā ai e isi foi faaliliuga faaonaponei le suafa o le Atua. Ua faaaogā e le New World Translation of the Holy Scriptures le suafa o Ieova e silia i le 7,200 taimi i Tusitusiga Eperu ma Tusitusiga Kerisiano Eleni.

I ana faaliliuga o le Salamo, na taumafai ai Perowne e “pipiimau atu i faaleoga o le gagana Eperu, i alagaupu ma le kalama o fuaiupu.” Ina ua faaliliuina le Salamo 69 fuaiupu e 5 ma le 6, na ia iloa ai le manaomia ona faia o se faaeseesega i le upu Eperu mo le “Atua” (ʼElo·himʹ), le “Alii” (ʼAdho·naiʹ), ma “Ieova” e faapea: “Le Atua e, [ʼElo·himʹ], o oe lava ua e silafia mai loʻu valea; e le lilo foi aʻu agasala ia te oe. Le “Alii” e [ʼAdho·naiʹ], Ieova (le Atua) o ʻau, aua neʻi faamaina ona o aʻu o e faatalitali atu ia te oe; le Atua o Isaraelu e, aua neʻi masiasi ona o aʻu o e sailiili ia te oe.”