“O le Galuega Lava a Ieova”

O le ulutala lena o se tala i le El Norte, le nusipepa i le aai o Monterrey, i Mekisikō. O lenei tala sa faatatau i le Maota Fono fou o Molimau a Ieova.

O Monterrey o se aai e nofoia e tagata e 2,300,000 (e aofia ai ma ona faatausiusiuga) i le itu i mātū o Mekisikō, ma o ona tagata talaʻi o le Malo e 19,200. E tusa o le tausaga ma le ʻafa, na galulue faatasi ai Molimau e fausia se Maota Fono mautū ma le matagofie e iai nofoa malūlū e 3,000 ma lona ea mālūlū. Na faafiafiaina Molimau i lea vaipanoa ina ua tauaaoina e se sui o le Vaega Pule o Molimau a Ieova le lauga mo le faapaiaina o le maota. O le polokalame na aofia ai se talafaasolopito puupuu o le galuega i Monterrey, ma sa faatalanoaina ai foi i latou na auai i le faugafale. Na olioli le 4,500 na auai i le sauniga o le lauga o le faapaiaga.

O le tolu aʻi lea o Maota Fono ua fausia talu ai nei i Mekisikō, lea ua faamatalaina e faapea, e pei o se tauiviga faapitoa mo “Maota o le Malo ma Maota Fono e Tele, e Tetelē, ma Sili Atu Ona Lelei.”

I le sili atu i le 443,000 tagata talaʻi i Mekisikō, ma le 1,492,500 o i latou na auai i le Faamanatuga o le 1995, e mautinoa ai o Maota Fono fou nei, e pei o lea ua iai i Monterrey, o le a faataulauina ai le fuafuaga mai le Atua.