Toleni i Latou a o Tamameamea

O SAILIILIGA faaonaponei ua faaalia ai e faapea o “pepe i totonu o manava o tinā e mafai ona tali mai i leo.” O tagata suesue i le Iunivesite o Carolina i Mātū, “ua latou mauaina e faapea ina ua uma ona faitau atu e tinā se mea i pepe a o i totonu o le manava, e mafai ona toe tali mai pepe fou ua fananau mai pe a toe faitau atu i ai na mea,” o le faamatalaga lea o loo i le Winnipeg Free Press. Afai e faitau ma le leo e fafine mea a o latou maʻitaga, e mafai e lenei tulaga ona saosaolaumea i le totōina o amioga lelei i le tamaitiiti. Ua taʻua e le Tusi Paia e faapea o Timoteo ‘na ia iloa tusi paia, talu ina o tama meamea.’ (2 Timoteo 3:14, 15) O le mea moni, na talisapaia e lona tinā ma le tinā o lona tinā le aogā o le toleniina o ia mai lona tama meamea, e foliga mai na aofia ai ma le faitau atu ma le leo.

Ua faapea mai le tusitala o Jim Trelease, o le faitau o “le tomai aupito sili ona malosi lea o loo iai i lo tatou sosaiete i aso nei.” E faaaluteleina atili tomai i se gagana ma upu ona o le faitau ma le leo.

O se gaoioiga poto le amata ona faitau ma le leo i lau tamaitiiti i le taimi lava e amata ai ona e tautala atu ia te ia. E ui lava o le a lē matuā malamalama le pepe o i totonu o le manava po o se pepe foi faatoʻā fanau mai i mea ua e fai atu ai, ae o aogā ma āuga lelei e mautinoa le tāua. Ua faapea mai le Faataoto 22:6: “Aʻoaʻo ia i le tama e tusa ma lona ala; a oo ina toeaina lava o ia, e le teʻa ese ai.”

O ā mea e mafai ona e faitauina e tāua ma aogā? Ia faitau ma le leo le Tusi Paia i lau tamaitiiti i aso taitasi. Ia faitau foi isi lomiga tāua e pei o le Listening to the Great Teacher, Laʻu Tusi o Tala o Le Tusi Paia, Le Tagata Silisili O Ē Uma na Soifua Mai, ma mataupu mai mekasini o Le Olomatamata ma le Ala Mai!

O le mea moni, o le tuuina o oe lava i lenei tulaga e aofia ai le taimi, ae o taimi na e alu aogā. O se auala mautinoa lena e faaalia ai lou manatu atu ma lou alofa i lau tamaitiiti.