E Mafai Ona ia te Oe “le Loto o le Leona”

I NISI taimi i le Tusi Paia, na te faaaogaina ai le leona e fai ma faatusa o le lototele ma le uiga mautinoa. O tagata malolosi pe loto tetele ua faamatalaina faapea ua ia i latou “le loto o le leona,” a o ē amiotonu ua taʻua faapea ua faapei “o le leona taanoa i latou ona lē mataʻu.” (2 Samuelu 17:10; Faataoto 28:1) Ae maise lava pe a osofaia, ua faailoa ai loa e le leona le fetaui o lona talaaga o se meaola e silisili le “malosi i manu vaefa” uma lava.—Faataoto 30:30.

Ua faatusa e Ieova lona maumauai e puipuia ona tagata i le lē fefe e pei o le leona. Ua taʻua i le Isaia 31:4, 5 e faapea: “E pei ona gu o le leona, o le leona taanoa foi i lana mea ua saeia, pe a faapotopotoina leoleo mamoe e toatele e fasi ia te ia, e le fefe ia i a latou alalaga, e le mataʻu foi ia i lo latou toatele; e faapea ona afio ifo o Ieova o ʻau, e tau ona o le mauga o Siona . . . e faapea foi ona faamamaluina o Ierusalema e Ieova o ʻau; o loo faamamaluina, ma laveaiina.” Ua faamautinoa mai e Ieova lana tausiga e lē mavae i ana auauna ae maise lava i taimi e fesagai ai ma fili.

Ua faatusa e le Tusi Paia le fili sili o tagata, o Satani le Tiapolo, i se leona ua tagi i le fia ʻai. Ina ia alofia le maileia e ia, ua fautuaina i tatou e le Tusi Paia e faapea: “Ia outou faautauta, ia outou mataala.” (1 Peteru 5:8) O se tasi o auala e faia ai faapea o le alofia lea o le matautia o le tautulemoe faaleagaga. I lenei tulaga na fetalai ai Iesu: “Ia outou, neʻi mafatia o outou loto i le soona ulavale, ma le onā, ma le popole i mea a le olaga nei.” (Luka 21:34-36) Ioe, o le mataala faaleagaga i nei “aso e gata ai” e mafai ona tatou mauaina ai se loto e pei o “le loto o le leona,” se loto e ‘tutumau, ma faalagolago ia Ieova.’—Timoteo 3:1; Salamo 112:7, 8.