Po o ni Faaaliga Uma Mai le Atua?
FAAMATA o le agaga o le Atua lea na faagaeeina le Tusi Paia, na faagaeeina foi le tusiaina o isi tusi o loo manatu nisi e paia? (2 Timoteo 3:16) Na lagā lenei fesili e le mekasini Italia a le ʻau Jesuit (La Civiltà Cattolica), lea na lomia “i lalo o le vaavaaiga a le Failautusi [o le Vatikana] mo le Malo” ma o lea ua aloaia ai e tagata Katoliko.
Ua faapea mai le mekasini a le ʻau Jesuit: “Na faasalalau e le Atua le tala lelei o le Upu e ala i le gaoioiga a le Agaga Paia, e oo lava i nisi tusi e paia e lei tupuga mai le faa-Iutaia ma le faa-Kerisiano.” I le vaaiga a le ʻau Jesuit, o tusi e “paia,” e pei o le Zoroastrian Avesta po o le Confucian Four Books, na tusia “ma sina aafiaga o le Agaga Paia, ma o lea la, ua iai i na tusi sina ‘faaaliga mai le Atua.’”
Ae peitai, ua faia e le mataupu o le mekasini se faamalamalamaga manino. Ua faapea mai: “E lē o manatu uma i na tusi e paia e faapea o ni manatu o le Atua,” ma ua faapea mai o ē na tusia nei tusi atonu na “aafia i le tapuai i atua se tele po o aʻoaʻoga faafilosofia” lea na latou talitonu ma gaoioi e tusa ai. E tusa ai ma Marco Politi, o sē e faamatalaina mataupu a le Vatikana mo le nusipepa Italia o le La Repubblica, o lenei talitonuga “ua tatalaina ai avanoa mo mafutaga sa lē tāitai ona faia faapea muamua i va o le Lotu Katoliko ma lotu tetele ua lauiloa i talafaasolopito,” ma ua toe faaauau ai le agaga o le palu faatasi o faatuatuaga i fonotaga tatalo e pei o le fono i Assisi i le 1986, lea na matuā taulamua ai Ioane Paulo II.
O Ieova e lē o se Atua o le lē maopoopo ma le fenuminumiai. (1 Korinito 14:33, NW) E lē saʻo la le faia o sa tatou faaiuga faapea o lona agaga paia, po o le mana galue, e ono faagaeeina le tusiaina o sina vaega o so o se tusi e lē o ogatasi atoatoa ma lana Afioga, le Tusi Paia. Nai lo o le lagolagoina o le autasi i “uputuu faalelotu” eseese, na tusi le aposetolo Kerisiano o Paulo faapea e tasi “le faamoemoe . . . , e tasi le Alii, e tasi le faatuatuaga, e tasi le papatisoga.”—Efeso 4:4, 5.
E faalagolago lena “faamoemoe” e tasi i le faatuatua ia Iesu Keriso. Ua talafeagai ai la le faapea mai o le Tusi Paia: “E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata, e mafaia ona faaolaina ai o i tatou.” (Galuega 4:12) E leai ma se isi “tusi e paia” e faasino atu ia Iesu faapea o ia e autū i ai le faataunuuina o fuafuaga a le Atua. E faatoʻā mafai ona tatou malamalama i fuafuaga alofa a Ieova le Atua mo le faaolataga pe afai tatou te talia le Tusi Paia, o le Afioga lea a le Atua.—Ioane 17:3; 1 Tesalonia 2:13.