Enoka—Sa Lei Fefe e Ui Lava i Mea Faigata Uma

O SE tagata lelei, ae sa iai i se vaitaimi sa sili ona leaga. Na matuā tumu le lalolagi i amioga faalemataʻu. Sa matuā paʻū maulalo le tulaga tau i amioga tatau a tagata. O le mea moni, sa lei umi ae faapea mai: “Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.”—Kenese 6:5.

O Enoka, le tagata lona fitu i le faasologa o le gafa mai ia Atamu, na lototele o ia ina ia ese mai. Sa ia tu mausalī mo le amiotonu e tusa lava po o ā iuga na oo i ai. Sa matuā faatiga i tagata agasala le feau a Enoka, o le mafuaaga lena na lamaina ai o ia e fasiotia, ma sa na o Ieova na mafai ona fesoasoani ia te ia.—Iuta 14, 15.

O Enoka ma le Finauga Aoao

A o lei tāitai ona fanau mai Enoka, na lāgā ai le finauga i le pule silisili ese aoao. Pe na iai i le Atua le aiā e pule ai? O le iuga, na tali mai Satani le Tiapolo e leai. Na ia maumauai e faapea o le a sili atu ona lelei mo foafoaga atamamai pe a tutoatasi mai le taitaiga a le Atua. Sa taumafai Satani e faamaonia lana tetee ia Ieova le Atua e ala i le togafitia ma le poto o tagata ina ia avatu i lana itu. O Atamu, o lana avā o Eva, ma lo la atalii ulumatua o Kaino, sa taʻutaʻua i ni talaaga leaga ona o le ʻau atu ia Satani e ala i lo latou filifili ina ia pule i latou lava nai lo le pule mai o le Atua. Na faia e le uluai ulugalii faaletagata lenei mea e ala i le ʻaia o le fua o le laau na faasaina e le Atua, ma na faia foi faapena e Kaino e ala i lona fasiotia ma le loto i ai o lona uso amiotonu, o Apelu.—Kenese 3:4-6; 4:8.

Sa tutumau ma le lototele Apelu i le itu a Ieova. Talu ai o le faamaoni o Apelu na uunaia atili ai le tapuaiga mamā, e mautinoa la sa fiafia Satani e vaai atu o faaoo atu le ita fasioti tagata o Kaino ia te ia. Talu mai lena taimi, ua faaaogā lelei ai e Satani le “fefe i le oti” o se auupega e faafefe ai. E manao o ia ina ia oo le fefe i le loto o so o se tasi o loo faanaunau e tapuai atu i le Atua moni.—Eperu 2:14, 15; Ioane 8:44; 1 Ioane 3:12.

E oo ane i le taimi ua fanau mai Enoka, na foliga mai ua matuā lagolagoina lelei le manatu o Satani e faapea o le a lē lagolagoina e tagata le pule silisili ese a Ieova. Ua oti Apelu, ma sa lei mulimuli atu nisi i lana faaaoaoga faamaoni. Peitai, na faamaonia e Enoka le matuā ese mai o ia. Sa ia te ia se faavae mausalī mo le faatuatua, auā na ia iloaina lelei mea ia na tutupu i le faatoaga o Etena.a Atonu sa ia matuā faapelepeleina le valoaga a Ieova e faaalia ai o le a aumaia e le Fanau folafolaina le iuga ia Satani ma ana faufauga!—Kenese 3:15.

Ona o lea faamoemoe sa ia te ia, na lē fefe ai Enoka i le logologoā o le fasiotiga o Apelu lea na faaosoina e le Tiapolo. Nai lo lea, na feoai o ia ma Ieova, i le tausisia o se olaga amiotonu. Na tumau pea ona vavae ese Enoka mai le lalolagi, ma teena lona agaga fia tutoatasi.—Kenese 5:23, 24.

E lē gata i lea, na tautala atu ma le lototele Enoka ma faamanino atu e faapea o le a lē taulau fuafuaga leaga a le Tiapolo. Ona o le uunaiga a le agaga paia o le Atua, po o lona mana galue, na vavalo ai Enoka e faatatau i ē amioleaga e faapea: “Faauta, e afio mai le Alii ma ona au paia e manomano, e faamasino ai i tagata uma, ma faasalaina ai e ua amio faalematau uma lava o ia i latou, ona o a latou galuega faalematau uma ua latou faia ma le faalematau, ona o a latou upu faatautala foi na fai ia te ia e tagata agasala ua faalematau.”—Iuta 14, 15.

Ona o folafolaga lē fefe a Enoka, na faaaofia ai o ia e le aposetolo o Paulo, a o tusi atu i Kerisiano Eperu, faatasi ma le “faapotopotoga o e matamata mai” o ē na faataatiaina se faaaoaoga mataina o le faatuatua e ala i gaoioiga.b (Eperu 11:5; 12:1) I le avea o Enoka o se tagata o le faatuatua, na ia maumauai ai e onosaia se ala o le faamaoni mo le silia i le 300 tausaga. (Kenese 5:22) Atonu na avea le faatuatua o Enoka ma matuā faatiga i fili o le Atua i le lagi ma le lalolagi! O le valoaga tiga a Enoka na faatupulaia ai le ita o Satani, ae na aumaia ai le puipuiga a Ieova.

Na Aveina Enoka e le Atua—Faapefea?

Sa lei faataga e Ieova ia Satani po o ana ʻau faalelalolagi latou te fasiotia Enoka. Nai lo lea, ua faapea mai le tala faagaeeina: “Na avea o ia e le Atua.” (Kenese 5:24) O le auala lenei na faamatalaina ai mataupu e le aposetolo o Paulo: “O le faatuatua na aveeseina ai Enoka ina ia le oo ia te ia le oti, na le iloa foi o ia, auā na avea o ia e le Atua; auā a o lei aveeseina na taʻua ai o ia o le ua fiafia i ai le Atua.”—Eperu 11:5.

Na faapefea ona “aveeseina . . . Enoka ina ia le oo ia te ia le oti”? Pe e pei ona taʻua i le faaliliuga a R. A. Knox, na faapefea ona “aveesea Enoka e aunoa ma le tofo i le oti”? Na faagata mālie lava e le Atua le ola o Enoka, ma lē oo ai ia te ia tiga o le oti mai ni maʻi po o ni faiga sauā mai lima o ona fili. Ioe, na faapuupuuina e Ieova le ola o Enoka i le 365 o ona tausaga—sa fai lava si talavou pe a faatusatusa atu i ē na latou tupulaga faatasi.

Na faapefea ona avatuina e Enoka se ‘molimau na fiafia i ai le Atua’? O le ā le faamaoniga sa ia te ia? E foliga mai na tuu e le Atua Enoka i se tulaga na lē toe mafai ai ona gaoioi, e pei foi o le aposetolo o Paulo lea na “ave ese atu,” pe ave atu, e foliga mai i le mauaina o se faaaliga e faatatau i le parataiso faaleagaga i le lumanai o le faapotopotoga Kerisiano. (2 Korinito 12:3, 4) O le molimau po o le faamaoniga, e faapea na fiafia le Atua ia Enoka, sa ono mafai ona aofia ai se vaaiga faafaaaliga o le Parataiso faalelalolagi i le lumanai lea o le a lagolagoina ai e i latou uma o ē ola ai, le pule silisili ese a le Atua. Pe atonu o le taimi lea a o vaavaai atu Enoka i le vaaiga matagofie na matuā faagaeetia ai, ae tuuina loa o ia e le Atua i se oti filemu ma moe ai seia oo i le aso o lona toetu. E foliga mai, e pei ona sa iai i le tulaga o Mose, sa aveeseina e Ieova le tino o Enoka i se mea, auā ‘na leai se mea na maua i ai o ia.’—Eperu 11:5; Teuteronome 34:5, 6; Iuta 9.

Ua Faataunuuina le Valoaga

I aso nei, ua faalauiloa atu ai e Molimau a Ieova le uiga moni o le valoaga a Enoka. Mai le Tusi Paia, o loo latou faaalia atu ai le auala o le a faataunuuina ai pe a faaumatia e le Atua faiga faalemataʻu i le lumanai ua lata mai. (2 Tesalonia 1:6-10) Ua lē taualoa i latou ona o la latou feau, auā e matuā ese lava mai manatu ma sini o lenei lalolagi. E lē faateʻia i latou i teteega latou te fesagai, auā na lapataia e Iesu ona soo: “E inosia foi outou e tagata uma ona o loʻu igoa.”—Mataio 10:22; Ioane 17:14.

Ae peitai, i le pei o Enoka, ua faamautinoa atu ai i Kerisiano o aso nei le faasaoina o le a iai mai o latou fili. Na tusi mai le aposetolo o Peteru: “Ua silafia e le Alii se mea e laveai mai ai i e amio Atua ai le tofotofoga, a e taofi i e amio leaga e oo i le aso faamasino ina ia faasalaina i latou.” (2 Peteru 2:9) Atonu e silasila mai le Atua ua fetaui le aveesea o se faafitauli po o se tulaga e tofotofoina ai. Atonu e faamutaina sauāga. Ae afai e leai, e silafia e ia le auala e “sao ai” ina ia mafai e ona tagata ona onosaia ma le manuia o latou tofotofoga. Ua oo foi ina foaiina mai pea e Ieova le “matuā tele o le mana” pe a talafeagai ai.—1 Korinito 10:13; 2 Korinito 4:7.

Ona “o ia foi na te tauia mai o e matuā saili ia te ia,” o le a faamanuia ai foi e Ieova ana auauna faamaoni i le ola e faavavau. (Eperu 11:6) Mo le vaega tele o i latou, o le a uiga lenei mea i le ola e faavavau i totonu o le parataiso faalelalolagi. I le pei o Enoka, seʻi tau ina ia tatou folafola atu ma le lē fefefe le feau a le Atua. Ma le faatuatua la, seʻi o tatou faia lenei mea e ui lava i mea faigata uma.

[Faaopoopoga i lalo]

[Pusa i le itulau 30]

Ua Faaleagaina le Suafa o le Atua

Pe tusa ma le fa senituri a o lei oo i taimi o Enoka, na fanau mai ai Enosa, le atalii o le atalii o Atamu. Ua faapea mai le Kenese 4:26: “O ona po ia na amata ai ona valaau tagata i le suafa o Ieova.” E talitonu nisi tagata suesue i le gagana Eperu e faapea, e tatau ona faitau faapenei le fuaiupu lenei “na amata faaleagaina” ona valaau atu i le suafa o le Atua po o le, “ona amata ai lea o le faaleagaina.” E tusa ai ma lena vaitaimi i le talafaasolopito, ua faapea mai le Jerusalem Targum: “O le augatupulaga lena na amata i o latou aso ona latou sese, ma faia ni tupua mo i latou lava, ma faaiu igoa o o latou tupua i le igoa o le Upu a le Alii.”

O taimi o Enosa na iloa ai le matuā salalau atu o le faaaogaseseina o le suafa o Ieova. E mafai ona faapea atu sa faatatauina e tagata le suafa tauatua ia i latou lava pe i ni tagata patino o ē na latou faaaogā ina ia faatagā faalatalata atu ai ia Ieova le Atua i le tapuaiga. Pe na mafai foi ona latou faatatauina le suafa tauatua i tupua. Po o le ā lava le tulaga na iai, ae mautinoa na matuā faaseseina e Satani le Tiapolo le fanau a tagata i le mailei o le ifo i tupua. E oo atu i le taimi na fanau mai ai Enoka, ua seāseā ona iai le tapu aiga moni. O so o se tasi sa pei o Enoka, o lē na ola aʻe i le upu moni ma talaʻia, sa lē taliaina i na aso ma na avea ma se tasi e taulai i ai sauāga.—Faatusatusa i le Mataio 5:11, 12.

[Ē Ana le Ata i le itulau 29]

Toe kopiina mai le Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s