Po o le a Lē Toe Iai ea ia i Tatou ni Vaaiga Faapenei?

SO O se mea lava tatou te agaʻi atu i ai i aso nei, tatou te vaaia ai foliga o le feainaʻi, fevaevaeaiga ma taua. Ae e lē o le fuafuaga o lenei mekasini o le toe faaopoopo atu i le tele o tala lē lelei ia ua uma ona e silafiaina. Nai lo lea, o lenei lomiga faapitoa o le a na faailoa atu ia te oe nisi o upu moni faamafanafana loto se lua. Muamua, o valoaga anamua o i le Tusi Paia ua valoia moni mai ai le tele o tala lē lelei o loo faamataʻuina ai i o tatou vaitaimi; lona lua, o le tusi foi lava lenei o valoaga ua muai taʻua mai ai le aso o le a avea ai vaaiga e pei o lenei ata ma mea ua mavae atu e lē toe iai lava. E lē toe iai ni taua. E lē toe iai ni pomu e faapāpā, e lē toe iai ni tagata latou te tafanaina isi, e lē toe iai ni maina e tatao, po o ni tagata faatupu faalavelave. E lē toe iai ni ē mātua oti ua puapuagatia po o le ʻau sulufai ua leai ni mea e nonofo ai. O se lalolagi o le filemu moni e faamalie loto. Pe e te fia tagai i ai i se taimi faapea? Matou te faalaeiauina oe ina ia iloilo po o le ā o fai mai ai le Tusi Paia. E te ono maua ai le tele o faamafanafanaga i le Tusi Paia nai lo so o se isi lava mea na e mafaufau e maua mai ai.