Po o le a Maua ea e i Latou o Puapuagatia se Mapusaga?

PE E te fia vaai atu ua faaiuina puapuaga, e lē gata mo oe a o tagata uma lava? Seʻi manatunatu i nei faaaoaoga:

Sa matuā puapuagatia lava Sonia.a Muamua ina ua ia iloa e faapea, e sefulu tausaga o faia pea e lana tane le mulilua. Ona sosoo ai lea ma le maua o lana tama tama aupito laitiiti i le HIV, ma maliu ai i le AIDS. I le lua tausaga mulimuli ane, na oo ai ina maʻi le isi ana tama tama, ma e lei pine ae maliu foi o ia i le AIDS. Ua manatua e Sonia e faapea: “Sa matuā umi lava se taimi o le laasaga mulimuli o lona maʻi. Sa matuā puapuagatia o ia i mafatiaga o le mafaufau, toulu uma lona laulu, ma ua lē lelei lana vaai. O se tulaga na matuā faanoanoa ai.”

O Fabiana, o se tagata aʻoga i le iunivesite i Pasili, sa popole e uiga i tulaga lē faamasinotonu o pagatia ai tagata lautele i le lalolagi. Ona oo ai lea ia te ia o se mea na matuā faanoanoa ai. O lona tuagane na aafia i mafatiaga o le mafaufau, na pule i lona lava ola. Ina ua leai se galuega a Fabiana, na fautuaina o ia e sana uo teine ina ia saili i se pai-de-santo (se fomai faataulaitu), i le manatu e faapea, atonu ua faalauatau e se tasi ia Fabiana ua pogai ai na mafatiaga uma! Ae sa lei avatua e le fomai faataulaitu ia Fabiana se mapusaga. Nai lo o lea, na lagona e Fabiana le matuā mafatia i ona puapuaga, sa lē mafai ai ona maua sana moe.

Na amata puapuaga o Ana a o laitiiti lava o ia. Ua ia faamatala mai e faapea: “Ina ua tasi loʻu tausaga, na tuulafoai ai aʻu e loʻu tinā, o lea na tausia ai aʻu e le tinā o loʻu tinā.” Ae ina ua na o le tolu tausaga o Ana, ae maliu loa le tinā o lona tinā. Ona auina atu loa lea o Ana i se nofoaga e tausi ai tamaiti ua aumatuā i Rio de Janeiro, o iina na nofo ai seia oo ina 13 ona tausaga. Fai mai a ia: “E ese le leaga o le faiga o i matou iina, ma sa oo ai ina iai ni oʻu uiga fouvale. A o oʻu tuputupu aʻe, sa ou tetee ai faasaga i le tele o mea.”

E foliga mai e toetoe lava o olaga o tagata uma ua aafia i puapuaga a lē o le tasi itu, ia o le isi. O le mea moni, tatou te faalogo pea i faamatalaga e uiga i mala e oo i tagata i aso faisoo—i so o se taimi lava tatou te matamata, faitau, pe faalogologo ai foi i tala fou. Ua tusia e Dr. Mary Sykes Wylie e faapea: “O lo tatou vaitaimi . . . ona o le tele o auala o fesootaiga, ua faatoʻā mafai ai ona tatou lē misia le faalogo pea i le anoanoai o tala lē lelei. O taua, o mala faalenatura, o mala tau tamaoaiga, faalavelave faafuasei i ala tetele, solitulafono, faiga taufaamataʻu, faaleagaina i faiga faaleituaiga, toso teine, faiga sauā i aiga—o nei mea uma ua avea ai puapuaga o se mea matagā e tupu i aso faisoo i lo tatou 20 senituri.” Ua aoteleina mai ma le faamaoni e le aposetolo Kerisiano o Paulo mea o loo tutupu i tagata i le faapea mai: “Ua oi faatasi, ma oono faatasi mea uma lava na faia, ua oo mai lava i ona po nei.”—Roma 8:22.

Ae faapefea oe? O oo ia te oe ni puapuaga? O le ā se mapusaga e mafai ona e faatalitalia? Po o le a mafai ea ona e maua le filemu moni? Na maua e Sonia, Fabiana, ma Ana se faamafanafanaga ma le filemu moni! E mafai ona e faitau i ai i le mataupu lea e sosoo mai.

[Faaopoopoga i lalo]