Se Mea ua Lilo e Lē Tatau i Kerisiano Ona Natia!
“Ua ou tautala faaali i tagata uma; . . . ou te lei tautala faalilolilo i se mea e tasi.”—IOANE 18:20.
1, 2. O le ā le faauigaina o le upu Eleni my·steʹri·on e pei ona faaaogā ai i le Tusi Paia?
O LE upu Eleni my·steʹri·on e faaluasefululima ona faaliliuina i le faaliliuga faa-Peretania o le Tusi Paia o le New World Translation of the Holy Scriptures i le upu “sacred secret” (mea lilo paia) ae faatolu ona faaliliu i le “mystery” (misiterio). O se mea ua lilo ae taʻua o se mea paia, o lona uiga e matuā tāua lava! So o se tasi ua maua le faaeaga e malamalama ai i lena mea ua lilo e tatau ona ia matuā lagona le faagaeetia, auā o lena ua faitaulia o ia e tatau ona tufa atu i ai se mea ua lilo a le Atua Silisili i le aoao o mea.
2 Ua faamautinoa mai e le Expository Dictionary of Old and New Testament Words a Vine e faapea, i le tele o tulaga ua sili atu ona talafeagai le taʻua o le “mea lilo paia” nai lo o se “misiterio.” Ua taʻua e faatatau i le my·steʹri·on: “I [Tusitusiga Kerisiano Eleni] e lē o faauiga ai le misiterio (e tusa o le uiga o le upu faa-Peretania), ae o loo faauiga i se tulaga e lē mafai e se tomai masani faaletagata ona malamalama i ai, e faatoʻā mafai ona iloa pe a iai se faaaliga Tauatua, ma e faaalia mai i le auala ma i le taimi ua fuafuaina e le Atua, ma e faaali atu foi i na o i latou o ē ua faamalamalamaina e Lona Agaga. I le gagana masani, o le misiterio e faatatau i se malamalamaga o loo taofiofia; pe a faaaogaina i le Tusi Paia ua faatatau lea i le faaalia mai ai o se upu moni. O lea la, o faaupuga ua sili atu ona fesootai ma le mataupu o le misiterio, e faapea, ‘ua faailoa mai,’ ‘ua faaalialia,’ ‘ua faaalia,’ ‘ua talaʻia,’ ‘ua malamalama i ai,’ ‘ua faasoa mai.’”
3. Na faapefea ona ese le faapotopotoga Kerisiano o le uluai senituri mai i nisi o vaega faalilolilo faalotu?
3 Ua faamatilatila mai e lenei faamatalaga se eseesega tele i le va o vaega faalilolilo faalotu lea na taatele i le uluai senituri, ma le faapotopotoga fou Kerisiano na faatoʻā faavaeina. A o masani ona saisaitia i se tautoga o le lē mafai ona tautatala i latou sa faaulu atu i lotu mavae faalilolilo (secret cults) ina ia leoleomalu ai aʻoaʻoga faalotu, peitai o Kerisiano sa lē tāitai ona iai i ni saisaitiaga faapena. E moni sa tautala le aposetolo o Paulo i le “poto o le Atua ua lilo,” i lona taʻua faapea o le ‘poto ua natia,’ o lona uiga, ua natia mai “alii . . . o lenei lalolagi.” E lē o natia mai Kerisiano o ē na faaali atu i ai e ala i le agaga o le Atua ina ia mafai ona latou faailoa atu i le lautele.—1 Korinito 2:7-12; faatusatusa i le Faataoto 1:20.
Ua Faailoa Mai le “Mea Lilo Paia”
4. O ai o loo faaautū atu i ai le “mea lilo paia,” ma e faapefea?
4 E faaautū atu le “mea lilo paia” a Ieova ia Iesu Keriso. Na tusi Paulo: “Ua faailoa mai [e Ieova] ia te i tatou le mea lilo [paia] sa i lona finagalo, e tusa ma lana lava pule tunoa, na ia tuu ai i lona lava finagalo; ina ia na faaopoopoina ia Keriso i le sauniuniga i le faaatoaga o tausaga, o mea uma lava o i le lagi, atoa ma mea o i le lalolagi.” (Efeso 1:9, 10) Sa oo foi ina matuā patino le faamatalaina e Paulo o le uiga moni o le “mea lilo” ina ua ia faasino atu i le manaoga mo le “iloa lelei [o] le mea lilo [paia] a le Atua, o Keriso lea.”—Kolose 2:2.
5. O le ā e aofia ai i le “mea lilo paia”?
5 E ui i lea, e tele isi mea e aofia ai, auā o le “mea lilo paia” o se mea lilo e tele ona tāfa eseese. Ua lē na o le faailoaina mai o Iesu i le avea ma Fanau folafolaina po o le Mesia; e aofia ai le matafaioi ua tofia o ia e faatino i fuafuaga a le Atua. E aofia ai le pulega faalelagi, le Malo Faa-Mesia o le Atua, e pei ona faamatala manino e Iesu ina ua ia fetalai atu i ona soo: “Ua foaiina atu ia te outou ia outou iloa mea lilo [paia] o le malo o le lagi, a ua le foaiina atu ia te i latou.”—Mataio 13:11.
6. (a) Aisea e saʻo ai le faapea atu o le “mea lilo paia” “sa natia i tausaga o le vavau”? (e) Na faapefea ona faasolosolo pea ona faaalia mai?
6 Sa umi se vaitaimi na va aʻi le uluai taʻua o le fuafuaga a le Atua ina ia saunia se faavae mo le Malo Faa-Mesia ma le ‘faaiuina o le mea lilo paia.’ (Faaaliga 10:7; Kenese 3:15) O lona faaiuina na tupu ina ua faavaeina le Malo, e pei ona faamaonia mai pe a faatusatusa le Faaaliga 10:7 ma le 11:15. O le mea moni, pe ā ma le 4,000 tausaga na va aʻi le avatuina o le uluai folafolaga o le Malo lea na faia i Etena, ae faatoʻā aliaʻi mai lē o le a avea mulimuli ane ma Tupu i le 29 T.A. Sa toe iai foi se isi va e 1,885 tausaga seia oo i le faavaeina o le Malo i le lagi i le 1914. O lea la, sa faasolosolo pea ona faaalia mai le “mea ua lilo paia” i se vaitaimi e toetoe lava 6,000 tausaga. (Tagai i le itulau 16.) Na saʻo lelei la Paulo i lona tautala e faatatau i “le faaaliga o le mea lilo [paia] sa natia i tausaga o le vavau; a ua faaali mai nei.”—Roma 16:25-27; Efeso 3:4-11.
7. Aisea e mafai ai ona ia i tatou le mautinoa atoatoa i le vasega o le auauna faamaoni ma le mafaufau?
7 I se eseesega ma tagata o ē pupuu o latou soifuaga, o Ieova e lē tāitai iai se uunaiga faamalosi e soona vave faaali mai ai ana mea ua lilo a o lei oo i lona taimi atofaina. O lenei mea moni e tatau ona taofia mai ai i tatou i le lē onosai pe a lē mafai i le taimi lenei ona faamalieina i tatou i se faamalamalamaga o nisi o fesili faale-Tusi Paia. Ona o le lotomaulalo o le vasega o le auauna faautauta ma le mafaufau, ua tofia e saunia mo le auaiga Kerisiano meaʻai mo le taimi tatau, ua taofia ai lenei vasega mai lo latou soona talaoso ma soona taumatemate ai i mea e lē o manino mai. E taumafai le vasega o le auauna e alofia le fia pulepuletutū. Ua latou lotomaulalo e taʻutino mai, e lē o mafai ona taliina fesili uma i le taimi lenei, auā o loo latou manatuaina lelei le Faataoto 4:18. Ae maeu se faagaeetia i le iloaina o le a faaauau pea e Ieova, i lana lava taimi ma i lana lava auala, ona faaalia mai ana mea ua lilo e tusa ai o ana fuafuaga! Aua lava neʻi o tatou lē onosai i faatulagaga o mea a Ieova, i le taumafai ma le lē faautauta e fia muamua i fuafuaga a Lē na te Faailoa maia mea ua lilo. Maeu se faalaeiauina o le iloa e lē o faia faapena e i latou o loo faaaogā e Ieova i aso nei! Ua lē gata ina faamaoni ae faautauta foi.—Mataio 24:45; 1 Korinito 4:6.
O le Mea Lilo ua Faaalia e Ao Ona Logoina Atu!
8. E faapefea ona tatou iloa e tatau ona faailoa atu le “mea lilo paia”?
8 E lei faaali mai e Ieova lana “mea lilo paia” i Kerisiano ina ia latou natia. E tatau ona faailoa atu, e tusa ai ma le mataupu silisili na faataatia e Iesu mo ona soo uma lava—ae lē mo na o ni taʻitaʻi lotu: “O outou, o le malamalama o le lalolagi outou. E le mafai ona lilo le aai ua tu i luga o le mauga. Latou te le tūtūina foi le molī i le tuu ai i lalo o le mea e fua aʻi saito, a e tuu i luga lava o le tuugāmolī ia pupula atu ai i e o i le fale uma. Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.”—Mataio 5:14-16; 28:19, 20.
9. O le ā e faamaonia ai o Iesu e lē o se tagata fouvale i pulega a malo, e pei ona manatu ai nisi?
9 Sa leai se faanaunauga faumalo o Iesu ina ia faavaeina se faalapotopotoga faalilolilo o ni soo ina ia faataunuuina ni fuafuaga lilo. I le tusi Early Christianity and Society, a Robert M. Grant, na tusia e faatatau i le molimau mo uluai Kerisiano sa faia e se tagata o le senituri lona lua, e igoa ia Justin Martyr, e faapea: “Pe ana faapea o Kerisiano o ni tagata fouvale i pulega a malo, semanū latou te lalafi pea ina ia faataunuu ai a latou fuafuaga.” Ae e mafai faapefea e Kerisiano ona “lalafi pea” ae i le taimi foi e tasi o loo pei o “le aai ua tu i luga o le mauga”? E lē tāitai ona latou natiaina lo latou malamalama i lalo o le mea e fua aʻi saito! O lea la, e leai se mea o le a mataʻu ai fua le faiga malo i la latou galuega. Sa faamatala atili mai e lenei tusitala i latou e faapea, “o i latou nei ua sili ona lagolagoina le emeperoa i le faapogaia o le filemu ma le maopoopoga lelei.”
10. Aisea e lē tatau ai i Kerisiano ona natia lo latou tulaga moni?
10 Sa lei finagalo Iesu ina ia natia e ona soo lo latou tulaga o i latou o ni tagata o se vaega faalotu. (Galuega 24:14; 28:22) O le lē taulau ona faasusulu atu o lo tatou malamalama i aso nei o le a lē fiafia ai le finagalo o Keriso ma lona Tamā, o Lē na te Faailoa mai mea lilo, ma o le a tatou lē fiafia ai foi.
11, 12. (a) Aisea e finagalo ai Ieova ina ia faailoa atu le Faa-Kerisiano? (e) Na faapefea ona faataatia mai e Iesu le faaaoaoga fetaui?
11 “Ua le finagalo [Ieova] ia fano se tasi, a ia oo uma lava i le salamo.” (2 Peteru 3:9; Esekielu 18:23; 33:11; Galuega 17:30) O le faavae o le faamagaloina o agasala a tagata salamō o le faatuatua lea i le taulaga togiola a Iesu Keriso, o lē na foaiina mai o ia lava e fai ma togiola mo tagata uma—ae lē mo na o ni nai tagata—ina ia “le fano se tasi e faatuatua ia te ia, a ia maua e ia le ola faavavau.” (Ioane 3:16) E matuā tāua le fesoasoani atu i tagata ina ia latou uia laasaga manaomia ina ia latou agavaa ai e faamasinoina o ni mamoe, ae lē o ni ʻoti, i le taimi o le faamasinoga o loo fotuai mai.—Mataio 25:31-46.
12 E lē tatau ona natia le Faa-Kerisiano moni; e tatau ona faailoa atu i auala talafeagai uma e mafai ai. O Iesu lava ia na faataatia maia le faaaoaoga fetaui. Ina ua fesiligia e le ositaulaga sili e faatatau i ona soo ma lana aʻoaʻoga, na ia fetalai atu: “Ua ou tautala faaali i tagata uma; ua ou aʻoaʻo soo i sunako ma le malumalu, e faapotopoto soo ai Iutaia; ou te lei tautala faalilolilo i se mea e tasi.” (Ioane 18:19, 20) Pe a fua atu i nei mea na muai tutupu, o ai la se tagata e mataʻu i le Atua o le a ia natia le feau ua folafola mai e le Atua e tatau ona faailoa atu i le lautele? O ai na te natiaina “le ki o le malamalama” lea e taʻitaʻia ai i le ola e faavavau? O le faia faapea o le a tutusa ai lena tagata ma tagata lotu talapepelo o le uluai senituri.—Luka 11:52; Ioane 17:3.
13. Aisea e tatau ai ona tatou talaʻi atu i avanoa uma taitasi?
13 Talosia e leai lava se tasi e mafai ona faapea mai o i tatou o Molimau a Ieova ua tatou natia le feau o le Malo o le Atua! E tusa lava pe talia pe teena le feau, ae tatau ona iloa e tagata o loo talaʻia atu. (Faatusatusa i le Esekielu 2:5; 33:33.) O lea seʻi o tatou faaaogā tatau ai avanoa uma taitasi e tautala atu ai i le feau o le upu moni i tagata uma, po o fea lava tatou te feiloai ai ma i latou.
Le Tuuina o Mama i Auvae o Satani
14. Aisea e lē tatau ai ona tatou faatalatū i le faaalialia atu o la tatou tapuaiga?
14 I le tele o atunuu ua faateleina ai pea le avea o Molimau a Ieova ma taulaiga o le uaʻi atu i ai o tala faasalalau. I le talitutusa ma le mea na tupu i uluai Kerisiano, ua masani ona tuuaʻia sese i latou ma faavasega faatasi ai ma vaega lotu taufaasese ua masalomia ma faalapotopotoga faalilolilo. (Galuega 28:22) Pe faamata ea o lo tatou tautala faaaliali atu i le talaʻiga o le a atili ai ona osofaia i tatou? E mautinoa lava o le a lē atamai, ma e lē tusa foi ma le fautuaga a Iesu, lo tatou faapogaia o i tatou lava e oo atu i se lotolotoi o ni fefinauaiga lē talafeagai. (Faataoto 26:17; Mataio 10:16) Peitai ane, e lē tatau ona natia le galuega aogā o le talaʻiga o le Malo ma le fesoasoani atu i tagata ina ia faaleleia atili o latou olaga. E faamamaluina ai Ieova, e viiviia ai o ia, ma tataʻi atu ai manatu ia te ia ma lona Malo ua faavaeina. O le talilelei mai e faafiafiaina ai talu ai nei i upu moni o le Tusi Paia i Europa i Sasaʻe ma nisi vaega o Aferika ua māfua i se isi itu ona o le faateleina o le avanoa ua mafai ai nei ona talaʻia atu le upu moni iina.
15, 16. (a) O ā fuafuaga ua faataunuuina ona o lo tatou faaalialia atu o la tatou feau ma lo tatou tamaoaiga faaleagaga, ae pe e ao ona avea lea mea ma popolega? (e) Aisea ua tuuina ai e Ieova mama i auvae o Satani?
15 O le mea moni o le faiga faaaliali o loo talaʻi atu ai Molimau a Ieova, le parataiso faaleagaga o loo latou olioli ai, ma lo latou tulaga manuia—i le malosi ma le tomai o ona tagata ma mea faitino—o loo matauina uma mai. E moni o vala nei o loo tosina mai ai ē loto faamaoni, ae e ono ʻinoʻino mai ai foi ē tetee. (2 Korinito 2:14-17) O le mea moni, o lenei tulaga manuia e iu ina avea ma uunaiga i ʻau a Satani e osofai mai ai i tagata o le Atua.
16 Pe tatau ea ona faapogaia e lenei mea se popolega? E leai, e tusa ai ma le valoaga a Ieova lea o loo taʻua i le Esekielu mataupu e 38. Ua valoia ai e faapea, o Koku o Makoku, o se igoa e faamatala ai Satani le Tiapolo, talu mai ona lafoina ifo i le lalolagi ina ua mavae le faavaeina o le Malo i le 1914, o le a ia taʻitaʻia atu se osofaiga i tagata o le Atua. (Faaaliga 12:7-9) Ua fetalai atu Ieova ia Koku: “E te faapea ifo, Ou te alu ae i le nuu o aai e le nofo ʻolo; ou te alu ia te i latou o e o fifilemu, o e nonofo faatalanoa, o i latou uma o nonofo ua leai so latou pa, e leai foi ni a latou faamaufaalava, po o puipui, ina ia avea le vete, ia avea foi mea e faoa; e faasaga lou lima i mea sa faatafunaina, o loo āina, o le nuu foi ua faapotopotoina nai nuu ese, ua i ai manu ma oloa, o loo o nonofo i le totonugalemu o le lalolagi.” (Esekielu 38:11, 12) Peitai, ua faaalia i le fuaiupu e 4 faapea e lē manaomia ona matataʻu tagata o le Atua i lenei osofaiga, auā o le a faapogaia lea e Ieova. Ae aisea o le a faataga ai e le Atua—ioe, e oo lava ina faaosoina—se osofaiga tele i ona tagata? I le fuaiupu e 23 tatou te faitau ai i le tali a Ieova: “Ou te faasilisiliina o aʻu e aʻu, ma ou faapaiaina o aʻu; e iloa foi aʻu i luma o nuu e tele, e iloa ai lava e i latou o aʻu lava o Ieova.”
17. E faapeī la tatou vaaiga e tatau ona vaai ai i le osofaiga o loo faaloloʻi mai a Koku?
17 O lea, nai lo le nonofo ma le matataʻu tagata o Ieova i le osofaiga a Koku, ae latou te nofo tatali atu i lenei faataunuuga atili o le valoaga a le Tusi Paia. Maeu le fiafia e iloa faapea, e ala i le faalauolaolaina ma le faamanuiaina o lana faalapotopotoga vaaia, ua tuuina ai e Ieova mama i auvae o Satani ma tataʻi atu o ia ma lana malosi faavaegaʻau i lo latou toilalo!—Esekielu 38:4.
Ua Sili Atu i le Taimi Nei Nai lo Aso ua Mavae!
18. (a) O le ā le mea moni ua toatele tagata ua latou iloaina nei, ma aisea? (e) E faapefea i le tali mai i le talaʻiga o le Malo ona avea o se uunaiga malosi?
18 I ona po nei, ua matuā faaaliali atu ai Molimau a Ieova i le faaalia o o latou manatu e faavae mai le Tusi Paia, e ui lava ina e lē o taliaina e le lautele lenei mea. Mo le faitau sefulu o tausaga, ua latou lapatai atu ai i lamatiaga o le ulaula tapaa ma le faaaogaina o vailaau faasaina, le lē atamai o le tuufau o tamaiti e lē aoaia, o āuga leaga o faafiafiaga o loo uunaia ai feusuaiga lē mamā ma faiga sauā, ma lamatiaga o tuiga toto. Ua latou faasino atu foi i le sese o le aʻoaʻoga o le evolusione. Ua faatoateleina pea tagata o loo faapea mai nei, “E lē o sese Molimau a Ieova.” Pe ana tatou lē faaalialia atu i le lautele o tatou talitonuga, semanū e latou te lē mafai ona tali mai faapenei. Ma ia aua foi neʻi galo le mea moni, o le faia o se faamatalaga faapena, o lena ua latou laa atu ai i le tulaga o le faapea atu, “Satani, o oe o le pepelo; e saʻo lava Ieova.” Maeu se uunaiga malosi mo i tatou e mulimuli atu ai pea i le faaaoaoga a Iesu, o le faalauiloa atu lea i le lautele le upu moni!—Faataoto 27:11.
19, 20. (a) O le ā le talitonuga maumauai na faaalia mai e tagata o Ieova i le 1922, ma pe o faatatauina pea i aso nei ia upu? (e) E tatau faapefea ona tatou manatu i le “mea lilo paia” a Ieova?
19 Ua leva ona malamalama tagata o Ieova i la latou avega tauave i lenei itu. I se tauaofiaga mataina i le 1922, na faagaeetia ai e J. F. Rutherford, o le peresitene o le Sosaiete o le Olo Matamata i lena taimi, lana aofia i le faapea atu: “Ia naunautai, ia mataalia, ia tiotio, ia loto tetele. Ia avea o ni molimau faamaoni ma le moni mo le Alii. Ia agaʻi i luma i le taua seia oo ina matuā faatamaʻia vaega uma o Papelonia. Ia faalauiloa atu le feau i le lalolagi aoao. E ao ona iloa e le lalolagi o Ieova o le Atua lea, ma o Iesu Keriso o le Tupu ia o tupu ma le Alii o alii. O le aso lenei ua silisili i aso uma. Faauta, ua pule le Tupu! O outou o ana sui e faalauiloaina atu o ia i le lautele. O lea, ia faalauiloa, faalauiloa, faalauiloa, le Tupu ma lona malo.”
20 E pei ona sa tāua nei upu i le 1922, maeu la le sili atu ona tāua i le 75 tausaga mulimuli ane, a o atili lalata le faaalia mai o Keriso o le Faamasino ma o Lē Togisala! O le feau o le Malo faavaeina o Ieova ma le parataiso faaleagaga ua olioli ai tagata o le Atua o le “mea lilo paia” lena e sili ona tāua ia i latou ma latou te lē natiaina. E pei ona taʻua manino mai e Iesu lava ia, e ao i ona soo, faatasi ai ma le fesoasoani a le agaga paia, ona molimau atu i “tuluʻiga o le lalolagi” e faatatau i lana matafaioi autū i fuafuaga e faavavau a Ieova. (Galuega 1:8; Efeso 3:8-12) O le mea moni, i le avea ma auauna a Ieova, le Atua o lē faaalia mai mea ua lilo, e lē mafai ona tatou natia lenei mea lilo ia i tatou lava!
Pe Faapefea Ona E Tali?
◻ O le ā le “mea lilo paia”?
◻ E faapefea ona tatou iloa e tatau ona faalauiloa atu i le lautele?
◻ O le ā e māfua ai le osofaiga a Koku i tagata o Ieova, ma e tatau faapefea ona tatou manatu i lenei mea?
◻ O le ā e tatau ia i tatou taitoatasi ona maumauai e fai?
[Pusa i le itulau 16]
Le “Mea Lilo Paia” ua Faasolosolo Ona Faaalia Mai
◻ Mavae le 4026 T.L.M.: Folafola e le Atua e faatulai mai se Fanau e faaumatiaina Satani.—Kenese 3:15
◻ 1943 T.L.M.: Ua faamaonia aloaia le feagaiga faa-Aperaamo, ua folafola mai o le a auala mai le Fanau ia Aperaamo.—Kenese 12:1-7
◻ 1918 T.L.M.: Ua fanau mai Isaako e avea ma suli i le feagaiga.—Kenese 17:19; 21:1-5
◻ Pe tusa o le 1761 T.L.M.: Ua faamautinoa e Ieova o le a faaauala mai le Fanau ia Iakopo le atalii o Isaako.—Kenese 28:10-15
◻ 1711 T.L.M.: Ua faaalia e Iakopo faapea o le a auala mai le Fanau i lona atalii o Iuta.—Kenese 49:10
◻ 1070-1038 T.L.M.: Ua iloa e le tupu o Tavita o le a tupuga mai ia te ia le Fanau ma o le a avea ma Tupu e pule e faavavau.—2 Samuelu 7:13-16; Salamo 89:35, 36
◻ 29-33 T.A.: Ua mataulia ai Iesu o le Fanau lea, le Mesia, o le faamasino i le lumanai, ma o lē o le a avea mulimuli ane ma Tupu.—Ioane 1:17; 4:25, 26; Galuega 10:42, 43; 2 Korinito 1:20; 1 Timoteo 3:16
◻ Ua faaalia e Iesu faapea o le a iai ni ē e pule ma fai ma faamasino faatasi ma ia, o le a iai ni tagatanuu i le lalolagi o le Malo faalelagi, ma o le a avea uma ona soo o ni ē talaʻia le Malo.—Mataio 5:3-5; 6:10; 28:19, 20; Luka 10:1-9; 12:32; 22:29, 30; Ioane 10:16; 14:2, 3
◻ Ua faaalia e Iesu faapea o le a iai se taimi mautinoa o le a faavaeina ai le Malo, e pei ona faamaonia mai i mea na tutupu i le lalolagi.—Mataio 24:3-22; Luka 21:24
◻ 36 T.A.: Ua iloa e Peteru o le a avea tagata e lē o ni Iutaia ma suli o le malo.—Galuega 10:30-48
◻ 55 T.A.: Ua faamatala mai e Paulo faapea o le a faatutuina mai suli o le Malo i le ola e lē mafai ona oti ma tino e lē mafai ona pala a o faagasolo le taimi o le faatasi mai o Keriso.—1 Korinito 15:51-54
◻ 96 T.A.: Ua faaalia e Iesu, lea ua pule i ona soo faauuina, e faapea o lo latou aofaiga atoa e toʻa 144,000.—Efeso 5:32; Kolose 1:13-20; Faaaliga 1:1; 14:1-3
◻ 1879 T.A.: Ua faasino atu le Zion’s Watch Tower i le 1914 e avea o se tausaga tāua tele i le faagaoioia o le “mea lilo paia” a le Atua
◻ 1925 T.A.: Ua faamatala mai i le Watch Tower e faapea na fanau mai le Malo i le 1914; e tatau ona faalauiloa atu i le lautele le “mea lilo paia” e faatatau i le Malo.—Faaaliga 12:1-5, 10, 17
[Ata i le itulau 15]
I le pei o lo latou Taʻitaʻi, o Iesu, ua faalauiloa atu ai i le lautele e Molimau a Ieova le Malo o Ieova