Tausia Aʻe ni Fanau e Ola i Amioga Tatau—Po o Mafai Pea Ea?
UA MATAUINA e Robert Glossop o le Vanier Instiute mo Aiga i Ottawa, i Kanata e faapea: “Ua tatou ola nei i se sosaiete e sili ona lavelave, o aganuu ua matuā fefiloi lava, lea e leai ni tapulaa tau amioga tatau o iai.” O le ā le iuga? Ua faapea mai se lipoti a le nusipepa o le Toronto Star: “O talavou e maʻitō, o faiga sauā ma le pule o talavou i o latou ola ua faatuputeleina pea.”
Ua sosolo atu le faafitauli i tala atu o Amerika i Mātū. O Bill Damon, o se faatonu o le Center for Human Development i le “Brown University” i Rhode Island, i le Iunaite Setete o Amerika, sa ia suesueina nei mataupu i Peretania ma isi malo o Europa, faapea foi ma Ausetalia, Isaraelu, ma Iapani. Ua ia taʻua le faaitiitia o le saunia o ni taiala e lotu, aʻoga, ma isi faalapotopotoga mo talavou. E talitonu o ia o a tatou aganuu, “ua lē amanaia ai mea e manaomia e fanau ina ia atiina ae ai uiga lelei ma le faimea mafai.” Ua taʻua e tagata atamamai i tulaga faamātua o ē ua aʻoaʻoina faapea “o aoaiga e lamatia ai le ola maloloina ma le sologa lelei o fanau,” ua faamautinoa mai e Damon e faapea o “le auala tonu lea mo le tausiaina aʻe o ni fanau faauamaaa, ma le lē usiusitai.”
O le ā e manaomia e talavou i aso nei? E latou te manaomia pea le toleniga alofa e faasaʻoina ai le mafaufau ma le loto. E eseese talavou e latou te manaomia foi ituaiga o aoaiga eseese. Pe a uunaia e le alofa, e masani lava ona mafai ona faaooina atu aoaiga i se auala faatalatalanoa. O le pogai lea na taʻu mai ai e le Faataoto 8:33 ia i tatou ina ia ‘faalogo i aoaiga.’ O nisi e lē lava upu e ‘faasaʻoina ai.’ O i latou nei, e manaomia se faasalaga talafeagai ona o le lē usiusitai, atonu e manaomia ona faia i se mamafa ua tatau ai. (Faataoto 17:10; 23:13, 14; 29:19) I le faia o lenei fautuaga, ua lē ioeina ai e le Tusi Paia le sasa ona o le ita po o le matuā sasa faamoʻamoʻa, lea e ono faamanualia ma afaina ai se tamaitiiti. (Faataoto 16:32) Nai lo lea, e ao i se tamaitiiti ona malamalama i le mafuaaga ua faasaʻoina ai o ia ma ia lagona ai e faapea ona e naunau atu le matua ia te ia.—Faatusatusa i le Eperu 12:6, 11.
O ia fautuaga aogā ma talafeagai faale-Tusi Paia ua faamatilatila mai i le tusi Le Ala e Maua ai le Fiafia i le Aiga.