Po o se Faaipoipoga Mamā?

I SE taumafaiga ina ia tauleleia le iai pea o le tulaga taupou o Maria i le la faaipoipoga ma Iosefa, e toatele tagata vali ata ma ē e vaneina faatagata ua latou faaātaina mai Iosefa faapea sa avea ma se toeaina matua. Sa latou manatu faapea, o Iosefa sa avea moni lava ma sē sa faatamā i ai Maria nai lo le avea o ia ma ana tane. Ae o Pope Paulo Ioane II sa ia faamatalaina talu ai nei se vaaiga e ese mai e uiga i le mataupu. Ua ia taʻua faapea o Iosefa “sa lē o se toeaina matua i lena taimi.” Nai lo lea, “o ona uiga e atoatoa ona lelei, o le meaalofa mai le Atua, na taitaia ai o ia ina ia ola ai i se faiā e aunoa ma ni feusuaiga ma Maria.”

Afai sa fuafua Maria ina ia tumau o se taupou e faavavau, aisea la na ia faamau ai? “E mafai ona manatu faapea, i le taimi o le la faamau sa femalamalamaaʻi Iosefa ma Maria e uiga i le fuafuaga ina ia ola aʻe o se taupou,” o le tali lea a le pope.

Peitai, e ese le auala ua faamatala mai ai e le Tusi Paia le mataupu. Ua faapea mai le tala a Mataio, o Iosefa “sa lei auai i feusuaiga ma ia [Maria] seia oo i le taimi na fanau mai ai le tama.” (Mataio 1:25, New American Bible a le Katoliko, upu faasisipa e a matou.) Ina ua mavae le fanau mai o Iesu, sa lē toe avea loa le faatasiga faalefaaipoipoga a Iosefa ma Maria ma tulaga muli. O se tasi o faamaoniga o lenei mea ua iai mulimuli ane i le tala a le Evagelia, ua faaalia ai e iai uso ma tuafāfine o Iesu.—Mataio 13:55, 56.

O lea, a o taʻua e le Tusi Paia faapea o Maria sa avea ma taupou ina ua fanauina e ia Iesu, sa lē toe iai se faavae e taʻua ai faapea sa ola o ia o se taupou mo le vaega na totoe o lona olaga a o faatasi ai ma Iosefa.