Ia Faaeteete i “Tagata Epikuro”

“E ese le lelei o si tama! E maualuluga ana tapulaa tau amio. E lē ulaula, e na te lē faaaogaseseina fuala- au faasaina, pe tautala foi i upu masoā. O le mea moni, e sili atu lona lelei nai lo isi o loo faapea mai o Kerisiano!”

PO UA e faalogo ua faaaogā e nisi na ituaiga o faaupuga e avea ma faamolemolega mo faigauo lē fetaui ua latou atiina ae? Pe e lagolagoina e iloiloga faale-Tusi Paia? Ua faamalamalama atili e se faataitaiga mai le uluai faapotopotoga Kerisiano lenei mataupu.

I le uluai senituri, na lapataia ai e le aposetolo o Paulo le faapotopotoga i Korinito: “Aua neʻi faaseseina outou, O le feoai ma e amio leaga e leaga ai amio lelei.” Atonu na faifaimea vavalalata nisi Kerisiano ma tagata na aafia i filosofia faa-Eleni, e aofia ai ma filosofia a tagata Epikuro. O ai ia tagata Epikuro? Aisea e latou te ono lamatia ai le itu faaleagaga o Kerisiano i Korinito? Faamata o iai ni tagata e pei o i latou i aso nei, ia e ao ona tatou faaeteete ai?—1 Korinito 15:33.

O Ai Tagata Epikuro?

O tagata Epikuro o i latou ia na mulimuli atu i le faifilosofia Eleni o Epikuro, o lē na soifua mai le 341 T.L.M seia oo atu i le 270 T.L.M. Na ia aʻoaʻo faapea o le fiafia o le mea pito tāua pe o le autū lea i le olaga. Po o lona uiga la na ola tagata Epikuro i ni olaga tauvalea, lē pulea e mataupu silisili, e lolo atu i faiga matagā ona o le sailia pea o mea e faafiafia ai? O le mea e maofa ai, sa lei aʻoaʻoina e Epikuro ē na mulimuli ia te ia ina ia ola faapena! Nai lo lea, na ia aʻoaʻo faapea o le auala sili e maua ai le fiafia o le ola lea e tusa ma le faautauta, lototele, pulea totino ma le faamasinotonu. Sa ia faaauilumaina le sailia o fiafiaga e tumau i le olaga atoa, nai lo fiafiaga pupuu pe vave maua i lena taimi. O lea, na foliga ai e amio lelei tagata Epikuro pe a faatusatusa atu ia i latou ia na auai i agasala matuia.—Faatusatusa i le Tito 1:12.

Pe Tai Tutusa ma le Faa-Kerisiano?

Afai na avea oe ma se tasi o le uluai faapotopotoga i Korinito, faamata o le a e fiafia atu i tagata Epikuro? Atonu na manatu nisi ua avea tagata Epikuro ma aumea lelei mo Kerisiano ona o le maualuluga o a latou tapulaa tau amio. Ma i le faaopoopo atu i na manatunatuga, atonu na vaaia e uso Korinito le tai tutusa o tapulaa o tagata Epikuro ma tapulaa o le Afioga a le Atua.

Mo se faataitaiga, na faaalia e tagata Epikuro le pulea totino i la latou sailiga o fiafiaga. Na sili atu lo latou faatāuaina o fiafiaga faalemafaufau nai lo fiafiaga tau faamalosi tino. E sili atu le tāua o le lua faiā ma lē lua te aai faatasi, nai lo mea na lua aiina. Na oo foi ina lē auai tagata Epikuro i faiga faapolotiki ma faiga sese faalilolilo. Pagā le faigofie o le faapea atu o uluai Kerisiano e faatatau i tagata Epikuro: “O le tele ia o vala e tutusa ai i latou ma tatou!”

Ae peitai, pe na tutusa moni ea tagata Epikuro ma uluai Kerisiano? Ma le mautinoa lava, e leai. Na matuā iloa e i latou na aʻoaʻoina lelei e faapea, e iai se eseesega tele. (Eperu 5:14) Ae faapefea oe, faamata e te iloaina? Seʻi o tatou auiliilia aʻoaʻoga a Epikuro.

Le Itu Lē Lelei o le Faa-Epikuro

Ina ia fesoasoani i tagata e alofia le mataʻu i atua ma le oti, na aʻoaʻoina e Epikuro le lē manatu mai o atua i tagata ma e lē faalaa ane i mataupufai a tagata. E tusa ai ma Epikuro, e lei foafoaina e atua le vateatea ma na faafuasei le iai o le ola. Pe na lē matuā feteenai ea lenei mea ma le aʻoaʻoga faale-Tusi Paia lea e “tasi le Atua,” o Lē na Foafoaina Mea, ma e manatu mai i ana foafoaga?—1 Korinito 8:6; Efeso 4:6; 1 Peteru 5:6, 7.

Na aʻoaʻo foi e Epikuro e lē toe iai se ola pe a mavae le oti. Ioe, e feteenai lenei mea ma le aʻoaʻoga a le Tusi Paia o le toetu. O le mea moni, ina ua lauga le aposetolo o Paulo i Areopako, e foliga mai na iai tagata Epikuro ia i latou o ē na faatautee ia Paulo i le aʻoaʻoga o le toetu.—Galuega 17:18, 31, 32; 1 Korinito 15:12-14.

Atonu o vala e sili ona lamatia ai i filosofia a Epikuro, o vala foi ia e pito iloagata. O lona teena o le lē toe ola mai pe a mavae le oti, na taitaia ai o ia i le faaiuga faapea e ao i tagata ona ola i se tulaga e matuā fiafia ai a o ola i se olaga puupuu i le lalolagi. E pei ona tatou vaaia, o lona manatu e lē faapea ia ola i se tulaga agasala, nai lo lea, ia fiafia i le taimi nei, talu ai e lē toe ola mai pe a mavae le oti.

O lea, sa lei faalaeiauina e Epikuro le faia o mea sese i se tulaga faalilolilo ina ia alofia ai le popole neʻi maua, e mautinoa o se lamatiaga mo le fiafiaga i le taimi a o ola. Na ia faalaeiauina le fuafua lelei ina ia alofia āuga o le lē pulea, o se isi lea toatuga i le fiafiaga i le taimi a o ola. Na ia faalaeiau foi le iai o se faiā lelei ma isi ona e toe maua mai ai se taui. Ioe, o ni uiga lelei le alofia o le faia o mea sese i se tulaga faalilolilo, le fuafua lelei, ma le ati ae o ni faigauo. Aisea la e ono lamatia ai se Kerisiano i filosofia a Epikuro? Talu ai o ana fautuaga na faavae aʻe i lana vaaiga lē faatuatua: “Ina tatou aai ma inu, aua o a taeao tatou te oti ai.”—1 Korinito 15:32.

E moni o loo faaalia e le Tusi Paia i tagata le auala e ola ai ma le fiafia i le taimi nei. Ae peitai o loo fautua mai: “Ia outou faatumau ia te outou i le alofa o le Atua, ma faatalitali atu i le alofa mutimutivale o lo tatou Alii o Iesu Keriso, e oo atu i le ola faavavau.” (Iuta 21) Ioe, o loo sili atu ona faatāuaina e le Tusi Paia le lumanai e faavavau, ae lē o le taimi nei lea e vave mou atu. O le faanaunauga autū mo se Kerisiano, o le auauna lea i le Atua, ma ua ia iloaina e faapea afai na te faamuamuaina le Atua, e oo ia te ia le fiafia ma le loto malie. I se tulaga tutusa, nai lo le soona faapopoleina o ia e ona faanaunauga totino, na faaaluina ma le lē manatu faapito e Iesu lona malosi e auauna atu ai ia Ieova ma fesoasoani atu ai i tagata. Na ia aʻoaʻo ona soo ina ia faia i isi mea lelei ona o lo latou alofa moni mo i latou, nai lo le faatalitalia o se taui. Ma le manino la, o uunaiga Faa-Epikuro ma le Faa-Kerisiano e matuā eseese lava.—Mareko 12:28-31; Luka 6:32-36; Kalatia 5:14; Filipi 2:2-4.

Se Faafitauli Iloagata

O le mea e mālie ai, e ui sa faatāuaina e tagata Epikuro le fiafia, ae na faatapulaaina lo latou fiafia. Na taʻua e Epikuro le olaga o se “meaalofa mafatia,” talu ai sa leai sona “fiafia ia Ieova.” (Neemia 8:10) Maeu le fiafia o uluai Kerisiano sa iai pe a faatusatusa atu ia i latou! Sa lei faalaeiauina e Iesu se olaga lē fiafia o le teena o manaoga o se tasi. O le mea moni, o le mauaina o le fiafiaga sili, o le mulimuli atu lea i ona ala.—Mataio 5:3-12.

Na faaseseina isi tagata o le faapotopotoga i Korinito pe ana fai na latou manatu faapea, e mafai ona latou auaumea ma i latou na aafia i mafaufauga o Epikuro e aunoa ma le lamatia ai o lo latou faatuatua. I le taimi na tusia ai e Paulo lana uluai tusi i le au uso i Korinito, o nisi o i latou na lē toe talitonu i le toetu.—1 Korinito 15:12-19.

Faiga Faa-Epikuro i Aso Nei?

E ui ina mou atu faiga Faa-Epikuro i le senituri lona 4 T.A., ae ua iai i latou i aso nei ua faataitai atu i le vaaiga lava lena e tasi, i le manatu e faapea ua na o le pau lenei o le olaga. E itiiti pe e leai foi se faatuatua o nei tagata i le folafolaga a le Atua mo le ola e faavavau. Ae peitai, o nisi o i latou e fai lava sina maualuluga o a latou tapulaa tau amio.

Atonu e faaosoosoina se Kerisiano ina ia faia se faigauo vavalalata ma ē e faapena, atonu o o latou uiga lelei o le a avea ma faamolemolega e fai ai se faigauo. Ae peitai, e ui tatou te lē o manatu faamaualuga ia i tatou lava, ae e ao ona tatou manatua, o ‘aumea leaga’ uma—e aofia ai ma i latou e iloagata o latou aafiaga—“e leaga ai amio lelei.”

Ua aliae foi le filosofia lea ua na o le pau lenei o le olaga, i nisi o semina faapisinisi, tusi e maua ai fesoasoani mo oe lava i mataupu eseese, tusi faitau, tifaga, polokalame o le televise, ma musika. E ui e lē o faaauilumaina tuusaʻo mai ai amioga agasala, ae pe e ono aafia i tatou i se auala iloagata ona o lenei vaaiga lē faatuatua? Mo se faataitaiga, pe e ono matuā faatumulia i tatou i manaoga totino ia ua faanenefu ai la tatou vaaiga i le finauga e faatatau i le pule silisili ese a Ieova? Pe e ono faalavelavea i tatou i le ‘faifailemu,’ nai lo le “faamalosi i le galuega a le Alii”? Po o le a taitaiseseina i tatou i le faaletonu e tusa o le saʻo aʻiaʻi ma le aogā o tapulaa a Ieova? E manaomia ona tatou leoleo malu mai faiga lē mamā, faasauā, faataulaitu faapea ma i latou o aafia i manatu faalelalolagi!—1 Korinito 15:58; Kolose 2:8.

O lea la, seʻi o tatou ati ae ni faigauo tau lava o i latou o loo mulimuli atu ma le loto atoa i le taitaiga a Ieova. (Isaia 48:17) O le iuga, o le a faamalosia ai a tatou amioga lelei. O le a faamalosia ai lo tatou faatuatua. O le a tatou ola ai ma le fiafia e lē gata i le taimi nei, ae faapea i le lumanai i le taulai atu i le ola e faavavau.—Salamo 26:4, 5; Faataoto 13:20.

[Ata i le itulau 24]

Na aʻoaʻoina e Epikuro le lē manatu mai o atua i tagata

[Ē Ana le Ata]

Courtesy of The British Museum