E te Manatua?

Pe sa e talisapaia ea le faitauina o lomiga lata mai nei o Le Olomatamata? Seʻi tagai la pe mafai ona e taliina fesili nei o loo mulimuli mai:

◻ O le ā le fuafuaga autū o aʻoaʻoga mo se talavou Kerisiano?

O le fuafuaga autū e tatau ona iai mo aʻoaʻoga ina ia faaauupegaina ai se talavou e avea o se faifeau uigā a Ieova. Ma o le aʻoaʻoga e sili atu ona tāua i aʻoaʻoga uma o le aʻoaʻoga lea faaleagaga.—8/15, itulau 21.

◻ O ā ni mafuaaga mo le lipotia atu o se measese matuia a se uso po o se tuafafine Kerisiano i toeaina?

O se tasi o mafuaaga mo le lipotia o measese ina ia mafai ona faatumauina ai le mamā o le faapotopotoga. O le isi mafuaaga auā o le faia faapea o se gaoioiga lea o le alofa faa-Kerisiano e faavae aʻe i mataupu silisili o loo faaalia atu i le Atua, i le faapotopotoga, ma agaʻi i lē fai measese.—8/15, itulau 28, 30.

◻ O le ā le uiga o le ‘manatua pea le oo mai o le aso o Ieova’? (2 Peteru 3:12)

O lona uiga o lenei mea e lē o le aveesea mai i o tatou mafaufau “le aso o Ieova.” E lē tatau ona tatou faagaloina, ua latalata mai lava le aso o le a faaumatia ai e Ieova lenei faiga o mea. E tatau ona matuā moni ia i tatou, e matuā manino i ai la tatou vaai, e pei lava o lea ua i o tatou luma. (Sefanaia 1:7, 14)—9/1, itulau 19.

◻ Aisea ua faaumiumi ai pea aso e gata ai o lenei faiga o mea amioleaga nai lo le umi sa faatalitalia e le toatele o tagata?

E silasila Ieova i le mea e sili ona lelei ina ia laugatasia ai tagata uma. E manatu mamafa o ia i ola o tagata. (Esekielu 33:11) E mafai ona tatou mautinoa o le a oo mai le iuga i le taimi tonu lava, ina ia faataunuu ai le fuafuaga a Lē na Foafoaina i tatou, e alofa ma silisili lona atamai.—9/1, itulau 22.

◻ E mafai faapefea e i latou o i le auaunaga faataimi atoa ona faatumauina lo latou olioli e ui i faafitauli latou te ono fesagaia?

E tatau ona latou toe mafaufau i le tele o faamanuiaga ua latou maua ma ia manatunatu i le faitau afe o isi tagata o loo mafatia i ni faafitauli e sili atu ona matautia. (1 Peteru 5:6-9)—9/15, itulau 24.

◻ O le ā le sini autū o Viliamu Tiniteli i le faaliliuina o le Tusi Paia?

O le sini autū o Tiniteli o le mauaina lea o le Tusi Paia i gagana masani a tagata, ia saʻo lelei ma ia faafaigofie i le tele e mafai ai.—9/15, itulau 27.

◻ E mafai faapefea ona tatou faaalia o i tatou o ē lagolagoina ma le faamaoni le Afioga a le Atua?

Tatou te faaalia lo tatou faamaoni i le Afioga a le Atua e ala i le talaʻia atu ma le maelega i isi. I lo tatou avea o ni faiaʻoga, e tatau ona tatou faaaogaina ma le faaeteete le Tusi Paia, ia lē mimiloseseina po o le faaopoopo i ai o nisi manatu i mea ua fai mai ai, ina ia fetaui ma o tatou manatu. (2 Timoteo 2:15)—10/1, itulau 20.

◻ E mafai faapefea e le agaga oona o le lalolagi ona faavaivaia ai lo tatou faamaoni?

E mafai e le agaga o le lalolagi ona faavaivaia lo tatou faamaoni e ala i le faapogaia o lo tatou lē loto malie i mea ua tatou maua ma popole ai e faamuamua o tatou lava manaoga ma faanaunauga nai lo le faamuamua o le finagalo o le Atua. (Faatusatusa i le Mataio 16:21-23.)—10/1, itulau 29.

◻ O le ā le uiga o le auauna atu ia Ieova ma le loto po o le solu atoa?

O le “solu” e faasino atu i le tagata atoa, e iai faatasi ma ona tomai uma tau i le tino ma lona mafaufau. O le auauna atu ia Ieova ma le loto atoa e faauiga i le tuuina atu o i tatou lava, le faaaogaina o o tatou tomai uma ma le faaaogaina o lo tatou malosi i se tulaga atoatoa e mafai ai i le auaunaga i le Atua. (Mareko 12:29, 30)—10/15, itulau 13.

◻ O le ā le ki i le avea o se tagata e tausisi i mataupu silisili faale-Atua?

O le ki o le iloa lelei lea o Ieova, o mea e finagalo i ai, mea e ʻinoʻino i ai, ma ana fuafuaga. Afai e pulea o tatou olaga e nei mataupu silisili e faatatau i le Atua, ona avea lea o nei mea o ni mataupu silisili e aogā. (Ieremia 22:16; Eperu 4:12)—10/15, itulau 29.

◻ O le ā le vaaiga paleni a auauna a Ieova agaʻi i pulega faaletagata?

Latou te solitu i mataupufai faapolotiki ona o loo latou auauna o ni amepasa po o ni sāvali o le Malo o le Atua. (2 Korinito 5:20) I le isi itu, o loo mataalia i latou i le faaalia o le gauai atu ia i latou o loo iai le pule.—11/1, itulau 17.

◻ O le ā le lesona e mafai ona tatou aʻoaʻoina mai le gaoioiga na faia e le perofeta o Elisaia?

Ina ua oo atu le valaaulia mo le auaunaga faapitoa faatasi ma Elia, na tuua ai lava i lena taimi e Elisaia lona fanua ina ia auauna atu ia Elia, e ui lava o nisi o ona tiute e faatauvaa. (2 Tupu 3:11) O nisi o auauna a le Atua i aso nei ua latou faaalia foi se agaga faataulagaina faapena e ala i le tuua o o latou fanua, a latou galuega, ina ia talaʻia le tala lelei i oganuu mamao.—11/1, itulau 31.

◻ O le ā le fautuaga aogā o loo iai i le tusi a Iakopo?

Ua faaalia maia ia i tatou le auala e manumalo ai mai tofotofoga, o fautuaga ina ia tatou teena le faailoga tagata, ma faalaeiauga ina ia tatou auai i le faia o galuega e tonu. Ua faalaeiauina i tatou e Iakopo ina ia pulea le laulaufaiva, ia tetee atu i aafiaga faalelalolagi, ma faatupuina le filemu. O ana upu foi e tatau ona fesoasoani ia i tatou ina ia maua ai le onosai ma ia tausisi atu i le tatalo.—11/15, itulau 24.

◻ Aisea e ‘nofo sauni ai Ieova e faamagalo’? (Salamo 86:5)

E nofo sauni Ieova e faamagalo auā e lē o galo ia te ia o i tatou sa foafoaina mai le efuefu, e iai sese, po o vaivaiga, o iuga o le lē lelei atoatoa. (Salamo 103:12-14)—12/1, itulau 10, 11.

◻ Aisea e tatau ai ona tatou loto malie e faamagalo atu i isi?

Afai tatou te lē mananao e faamagalo atu i isi ae e iai se faavae mo le faaalia o le alofa tunoa, e mafai moni lava la ona matuā aafia ai la tatou lava faiā ma le Atua. (Mataio 6:14, 15)—12/1, itulau 17.