Vaaia e Elisaia Kariota Afi​—Ae ā Oe?

Na manaʻo le tupu o Suria e saʻili ma puʻea le perofeta a le Atua o Elisaia. Na faalogo o ia o loo iai Elisaia i Totana, o se aai e fai ona pā malolosi e malupuipuia ai, ma e tū i le tumutumu o se mauga. Na auina atu e le tupu lana ʻautau i Totana, faatasi ai ma solofanua ma kariota tau. Ina ua oo i le taeao, ua siʻomia e lana ʻautau le aai.​—2 Tu. 6:13, 14.

Ina ua maleifua mai le auauna a Elisaia ma savali i fafo, na ia vaaia ai le ʻautau a le fili ma oso ai lona fefe. Na ia alaga atu: “Auē, loʻu matai e! O le ā se mea e ta te faia?” Ua faapea atu Elisaia: “Aua e te fefe, auā e sili atu ona toʻatele o ē ua iā i taʻua i lo o ē ua iā i latou.” Ona tatalo lea o le perofeta: “Ieova e, ia e faapupula i ona mata ina ia ona iloaina atu.” Ua taʻua atili: “Ona faapupula lea e Ieova mata o le auauna, ua ia iloa atu; faauta! ua tumu le vaega maugā i solofanua ma kariota afi o le taua, ua siʻosiʻomia ai Elisaia.” (2 Tu. 6:15-17) O le ā e tatou te aʻoaʻoina mai i lenei mea?

E ui lava na siʻomia Elisaia e le ʻautau a Suria, ae na ia toʻafilemu pea. Na ia faatuatua ma mautinoa e puipuia o ia e Ieova. E tatou te lē faatalitalia ni vavega i aso nei, ae ua tatou mautinoa e puipuia e Ieova i tatou o se faalapotopotoga. E tai pei o loo tatou vaaia le puipuia o i tatou e solofanua ma kariota afi a Ieova. Pe a tatou faatuatua o le a puipuia e Ieova ona tagata ma maufaatuatuaina pea o ia, o le a tatou lagona le toʻafilemu ma maua ana faamanuiaga. (Sala. 4:8) Seʻi o tatou talanoaina pe faapefea ona tatou maua aogā mai isi mea na tutupu i le olaga o Elisaia.

AMATA ONA AUAUNA ELISAIA MO ELIA

I se tasi aso a o suaina e Elisaia le fanua, na alu atu ai le perofeta o Elia ma faaofu o ia i lona ofu tele. O lenā gaoioiga na faailoa atu ai ua valaaulia e Elia Elisaia e avea ma ana auauna. Na valaaulia e Elisaia ana uō mo se taumafataga tele, e faamavae ai i ona mātua ma tuua lona aiga ae mulimuli atu iā Elia. (1 Tu. 19:16, 19-21) Talu ai na lotomalie Elisaia e faia so o se mea na finagalo iai le Atua, na mafai ai ona faaaogā o ia e Ieova i so o se galuega, ma mulimuli ane tofia o se perofeta e suitulaga iā Elia.

Na auauna Elisaia mo Elia i le pe ā ma le ono tausaga. Ua taʻua i le 2 Tupu 3:11, o Elisaia “o lē na liligiina le vai i lima o Elia.” O le ā le uiga? I aso anamua, sa masani ona aai tagata i o latou lima. Pe a māeʻa se taumafataga, e liligi ifo e se auauna vai i lima o lona matai ina ia faamamā ai. O lea, atonu o nisi na o galuega a Elisaia lea e foliga mai e faatauvaa. Ae na ia manatu o se faaeaga le auauna mo Elia.

I se tulaga talitutusa, e toʻatele Kerisiano i aso nei ua lotomalilie e faia so o se galuega i le auaunaga faataimi atoa. Aiseā? Talu ai ua latou faatuatua iā Ieova ma mananaʻo e faia le mea sili mo Ia. O se faataʻitaʻiga, o nisi ua tuua o latou aiga ina ia auauna ai i le Peteli pe auai i galuega tau faugāfale. Atonu e latou te faia galuega e ono vāai i ai le toʻatele e faatauvaa. Ae e lē tatau ona tatou manatu faapena. E matuā tāua iā Ieova galuega uma e faia e ana auauna.​—Epe. 6:10.

TUMAU PEA ELISAIA I LONA TOFIGA

A o leʻi aveina aʻe e le Atua Elia “i se asiosio i le lagi,” na Ia faatonuina le perofeta e alu i se malaga. Na faatonuina e Elia Elisaia e nofo, ae na tali atu Elisaia: “Ou te lē tuua lava oe.” A o alu le malaga, na toe faatonuina faalua ai e Elia o ia e nofo, ae na musu Elisaia. (2 Tu. 2:1-6) Na faamaoni pea Elisaia iā Elia, e pei lava ona sa faia e Ruta iā Naomi. (Ruta 1:8, 16, 17) Na manatu Elisaia o se faaeaga le auauna mo Elia, ona o le tofiga lenā na tuuina atu e le Atua iā te ia e fai.

Ua faataatia e Elisaia se faaaʻoaʻoga lelei mo i tatou. E tatou te matuā talisapaia so o se galuega e tuuina mai e tatou te faia i le faalapotopotoga a le Atua, pe a manatua pea o i tatou o auauna a Ieova. E leai se isi faaeaga e sili atu nai lo o lenā.​—Sala. 65:4; 84:10.

“IA E FAI MAI IĀ TE AʻU I SE MEA OU TE FAIA MO OE”

A o alu le faigāmalaga, na faapea atu Elia iā Elisaia: “Ia e fai mai iā te aʻu i se mea ou te faia mo oe, a o leʻi aveeseina aʻu mai iā te oe.” Na tali atu Elisaia: “Ia faalua mai lou agaga iā te aʻu.” E pei lava o le talosaga sa faia e Solomona, na talosaga atu Elisaia i se mea e fesoasoani iā te ia e faaleleia atili lana auaunaga iā Ieova. (1 Tu. 3:5, 9; 2 Tu. 2:9) O le ā sa talosaga i ai Elisaia? I Isaraelu, e maua e le atalii ulumatua o se tamāloa ni vaega se lua o lona tofi. (Teu. 21:15-17) O lea, na talosaga atu Elisaia ia avea o ia ma suli o Elia, pe suitulaga iā Elia o se perofeta. Na ia talosaga foʻi ina ia maua le lototele ma le maelega na faaalia e Elia mo le tapuaʻiga moni.​—1 Tu. 19:13, 14.

Na faapefea ona tali atu Elia i le talosaga a lana auauna? Na faapea atu le perofeta: “Ua e talosaga mai i se mea faigatā. Afai e te iloa mai aʻu pe a aveeseina mai iā te oe, e faapea foʻi ona tupu iā te oe; ae afai e leai, ona lē tupu foʻi lea.” (2 Tu. 2:10) E lua uiga o le tali a Elia. Muamua, e na o le Atua e faia le filifiliga pe maua e Elisaia le tofi na ia talosaga ai. Lona lua, ina ia maua e Elisaia lenā tofi, e manaʻomia ona la iai pea ma Elia e tusa po o le ā le mea e tupu.

LE MEA NA VAAIA E ELISAIA

Pe na tuuina atu e le Atua iā Elisaia le mea na ia talosaga i ai? Ua taʻua i le Tusi Paia: “A o savavali i laʻua ma talatalanoa, faauta! ua iai se kariota afi ma solofanua afi, ua tuueseese ai i laʻua; ona alu aʻe ai lea o Elia i se asiosio i le lagi. O loo vaavaai atu Elisaia.”a O le tali lenā a Ieova i le talosaga a Elisaia. Na vaaia e Elisaia le aveeseina atu o Elia, ma ia maua ai vala e ʻlua o le agaga o Elia,’ ma avea ai ma perofeta a le Atua.​—2 Tu. 2:11-14.

Na ofuina e Elisaia le ofu tele o Elia na paʻū i lalo. Ina ua vāai tagata o loo ia ofuina le ofu tele o Elia, ona latou iloa lea ua avea o ia ma perofeta a le Atua. Na ia faamaonia atili lenā vala, ina ua ia vaeluaina mulimuli ane le vaitafe o Ioritana.

Atonu e leʻi mafai ona galo iā Elia le vaaiga na ia vaaia ina ua aveina aʻe Elia i le asiosio. O so o se tasi lava e maofa pe a ia vaaia ni kariota afi ma solofanua afi. O na mea uma na faamaonia ai e Elisaia ua talia e Ieova lana talosaga. Pe a tali mai le Atua i a tatou tatalo, e tatou te lē vaaia se vaaiga o ni kariota afi ma ni solofanua afi. Peitaʻi, e tatou te maua faamaoniga maumaututū o le faaaogāina e le Atua o lona mana, e fesoasoani iā i tatou ma faamautinoa ai e taunuu lona finagalo. Pe a tatou vaaia le faamanuia a Ieova i le vaega faalelalolagi o lana faalapotopotoga, e tai pei lava o loo agaʻi pea i luma le kariota faalelagi.​—Eseki. 10:9-13.

E tele faamaoniga na faamaonia ai e Elisaia le tele o le mana o Ieova. O le mea moni, o le agaga paia o le Atua na faia ai e le perofeta vavega e 16, ma e tele atu vavega na ia faia nai lo o Elia.b Na vaaia e Elisaia kariota afi ma solofanua afi mo le taimi lona lua i Tatano, ina ua siʻomia o ia e ʻautau a Suria.

NA FAATUATUAINA E ELISAIA IEOVA

Na toʻafilemu pea Elisaia ina ua siʻomia o ia e ona fili i Tatano. Aiseā? Talu ai sa malosi lona faatuatua iā Ieova. E tatau foʻi ona faamalosia lo tatou faatuatua. Ia tatalo i le agaga paia o Ieova, ona mafai lea ona tatou faaalia le faatuatua, faapea vala o le fua o le agaga.​—Luka 11:13; Kala. 5:22, 23.

O le mea na tupu i Tatano na avatu ai iā Elisaia le tele o faamaoniga e faatuatuaina ai Ieova ma ana ʻau o agelu. Na auina mai e Ieova ana agelu e siʻomia le aai ma puipuia ai Elisaia mai i ona fili. Na laveaʻia e le Atua Elisaia ma lana auauna e ala i le faatauasoina o fili. (2 Tu. 6:17-23) I lenā taimi mataʻutia ma le tele o isi tulaga, na faaalia ai e Elisaia le faatuatua ma faatuatuaina Ieova.

Ia tatou faatuatuaina Ieova e pei o Elisaia. (Faata. 3:5, 6) A tatou faia faapea ona ʻfaaalia lea e le Atua lona alofa iā i tatou ma faamanuia mai i tatou.’ (Sala. 67:1) E lē siʻomiaina i tatou e ni kariota afi ma solofanua afi. Peitaʻi i le “puapuaga tele,” o le a puipuia e Ieova lo tatou ʻauuso atoa. (Mata. 24:21; Faaa. 7:9, 14) O lea, ia tatou manatua pea “o le Atua o lo tatou sulufaʻiga.”​—Sala. 62:8.