“Le Ala a le Atua i le Ola”—Le Tauaofiaga o le 1998-1999 ua Lalata Mai!

I LE Pasefika i Saute lava ia, e 44 tauaofiaga ua faatulagaina mai ia Iulai e oo atu ia Tesema. E foliga mai o se tasi o nei faatasitasiga e tolu aso o le a faia i se aai e lē mamao ese mai lou aiga. I le tele o nofoaga, o le a amataina ai le polokalame i aso taitasi—mai le Aso Faraile e oo atu i le Aso Sa—i le musika i le 9:30 i le taeao.

O le polokalame i le taeao o le Aso Faraile o le a faamatilatila ai lipoti o le agaigai i luma o le talaʻiga o le Malo i vaega eseese o le lalolagi. Ae o le matua mo le tauaofiaga o le a faamamafaina e ala i le lauga autū e faapea, “Togiola a Keriso—Le Ala o le Faaolataga a le Atua.”

I le aoauli o le lauga faasolo, “Mātua e—Ia Totō Ala o le Atua i a Outou Fanau,” o le a saunia ai fautuaga i le auala e uunaia ai ē talavou e alolofa ma auauna ia Ieova. O le polokalame o le aoauli o le a faaiu i le lauga “Pe Iai se Isi Ola pe a Mavae le Oti?”

O le polokalame o le taeao o le Aso Toonai o le a faaalia mai ai le galuega tāua o le faia o soo a Molimau a Ieova i le lauga faasolo i vaega e tolu, “Fesoasoani i Tagata ia Maua le Ala i le Ola,” “Le Luʻi o le Oo Atu i Tagata,” ma “Le Aʻoaʻoina o Soo i Mea Uma na Poloaia e Keriso.” I le faaiuga o le polokalame i le taeao, o le a iai le sauniuniga mo soo fou e papatiso.

O le lauga amata i le aoauli o le Aso Toonai, “Auauna ma Tepa Taulai Atu i le Ola e Lē Uma,” e faalaeiauina ai i tatou ia manatunatu ma tatalo i a tatou mafuaaga totino e auauna ai i le Atua. O lauga, “Talisapaia ‘Meaalofa i Tagata’ o Ē o Loo Aʻoaʻo Atu Ala o le Atua ma le “Uiga Faaletagata—To Ese Uiga Tuai ae Ofu i Uiga Fou” o le a aumaia ai se faamalamalamaga auauai o fuaiupu taitasi o le mataupu e 4 o le Efeso. Ona sosoo ai lea ma apoapoaiga faale-Tusi Paia o le a saunia i le lauga “Ia Tausia Pea Lou Lē Ponā Mai le Lalolagi” ma i le lauga faasolo e tolu ona vaega “Talavou e—Ia Mulimuli Atu i Ala o le Atua.” O le a faaiu le polokalame o le aoauli i le lauga “Lē na Foafoaina Mea—Ona Uiga Totino ma Ona Ala.”

O le polokalame i le taeao o le Aso Sa e faia ai se lauga faasolo e tolu ona vaega lea o le a talanoaina ai mataupu faaiu o le tusi o le Tusi Paia o Esekielu faapena foi ma o latou faatatauga faavaloaga. E faaiuina ai i le polokalame o le taeao le tala e faaaogaina ai laei faaanamua e faavae mai le faamaoni o talavou Eperu e toatolu. O le lauga autū o le tauaofiaga i le aoauli o le lauga i le lautele, “Le Ala e Tasi i le Ola e Faavavau.”

E mautinoa o le a faaoaina faaleagaga outou e ala i le auai i aso uma e tolu. E valaauliaina oe ma le māfana e auai i le polokalame uma, e mautinoa, o lenei polokalame atoa o le a faia e aunoa ma le tāpāina o se totogi mai ia te oe. Mo le nofoaga e latalata ane i lou aiga, ia faafesootai le Maota o le Malo o Molimau a Ieova po o le tusi atu foi i ē o loo lomia lenei mekasini.