O Le ā Le Lumanai mo lo Tatou Lalolagi?

“E leai lava se isi senituri i le talafaasolopito e tutusa ma le senituri lona 20 i le tulaga matautia ua iai le sauā o tagata, i le tele o taua ua tauina pea, le anoanoai o tagata sulufai o loo faatupulaia pea, le faitau miliona o tagata ua fasiotia i taua, ma le tele o tupe e faaaluina mo ‘puipuiga,’” o le tala lea a le World Military and Social Expenditures 1996. Po o le a mafai ea ona suia lenei tulaga?

Na faamanatu mai i Kerisiano e le aposetolo o Peteru le folafolaga na faia e le Atua i senituri muamua atu e faapea: “E faatalitali i tatou i le lagi fou ma le lalolagi fou, pei o lana [le Atua] na folafola mai, e mau ai le amiotonu.” (2 Peteru 3:13) Na muai avea na upu ma vaega o le valoaga a Isaia. (Isaia 65:17; 66:22) Na oo ia Isaraelu anamua le faataunuuga muamua o lea valoaga ina ua toe faafoisiaina le malo i lona nuu na folafolaina i le mavae o le faaaunuuaina i Papelonia mo le 70 tausaga. O le toe taʻua la o le folafolaga o le “lagi fou ma le lalolagi fou,” na faaalia ai e Peteru e faapea o le valoaga lea o le a faataunuuina lava i se fua e sili atu ona telē—i le lalolagi aoao!

O le faavaeina o tulaga amiotonu i le lalolagi atoa o le finagalo lea o le Atua, ma o le a aumaia lea e ala i lona Malo faalelagi e pule ai Keriso o se Tupu. “E le sii atu le pelu e le tasi nuu i le tasi nuu, latou te le toe aʻoaʻo foi i taua.” (Isaia 2:4) O lea filemu ma le saogalemu atoatoa i le lalolagi o le mea lea na aʻoaʻoina e Iesu ona soo ina ia faatalitalia ma tatalo i ai lea e lauiloa ona taʻua o Lo Matou Tamā e, po o le Tatalo a le Alii, e faapea: “Ia oo mai lou malo, Ia faia lou finagalo, I le lalolagi e pei ona faia i le lagi.”—Mataio 6:9, 10.

Po o le a e olioli e soifua i se lalolagi e amiotonu e pei ona iai le lagi? O le faamoemoe lena ua tuuina mai e le Tusi Paia i tagata uma o ē o loo saili ma le loto atoa ina ia iloa le Atua ma ola e ogatusa ai ma ona ala amiotonu.