Se Mea e Lē Mafaagaloina na Tupu i Falani

“MATOU TE LĒ MANANAO I LE AAI A IEOVA!” na faalauiloaina ai e tusitusiga na faaalialia i le taulaga atoa. “Seʻi o Tatou Aufaatasi Uma e Tetee Atu i le Galuega a Ieova” na faalaeiau atu ai se tasi o vaega tetee. O le mea moni e faitauafe mataupu na lomiaina e le au fainusipepa na salalau atu ai le mataupu i tagata lautele. Sa sainia talosaga, ma o le anoanoai o le sili atu i le ʻafa miliona o sāvali na faamatalaina ai le galuega, sa faatumulia ai pusameli. O le ā lenei galuega lea na faalavelavea ai le filemu o le taulaga toʻafimalie o Louviers, i mātū i sisifo o Falani? O le fuafuaina o le fausia o se ofisa fou o le lālā ma le fale e nonofo ai a Molimau a Ieova.

Ua Faatupuina e Ieova

O le galuega a Molimau a Ieova i Falani e oo atu i tuā i le faaiuga o le senituri lona 19. O le uluai nofoaga mo lomiga faale-Tusi Paia na tatalaina i le 1905 i Beauvène, i Falani i saute, ma i le 1919, sa faagaoioia ai se tamai ofisa i Pale. Sa tatalaina aloaia se ofisa o le lālā i le aai i Pale i le 1930, ma i le tausaga na sosoo ai na nofoia ai e tagata faigaluega i le ofisa le aiga Peteli sa i Enghien-les-Bains, i le itu i mātū o Pale. Ina ua mavae le Taua Lona Lua a le Lalolagi, na toe see atu ai le aiga Peteli i Pale, ma i le 1959 na siitia atu ai loa le lālā i le fale fogafalelima i Boulogne-Billancourt, i le faatausiusiuga i sisifo o le taulaga o Pale.

Ona o le faatelega o le galuega o le talaʻiina o le Malo, i le 1973 na siitia atu ai loa le fale lomitusi ma le ofisa o felauaiga i Louviers, e 65 maila [100 kilomita] i le itu i sisifo o Pale, ae na tumau pea ofisa i Boulogne-Billancourt. Peitai, o le faateleina o le aofaiga o le au talaʻi i Falani na oo ai ina lē lava fale i Louviers, e ui i toe faatelega na faia i le 1978 ma le 1985. O lea sa filifili ai e faatelē ma tuufaatasi ai le aiga Peteli i le mea e tasi. O lenei galuega sa lei taliaina e le toatele i Louvier, e pei ona taʻua i le amataga. E ui i na teteega, ae sa maua se fanua e na o le tasi le maila [1.5 kilomita] mai le fale lomitusi. E ono tausaga o taumafaiga mamafa, ma mulimuli ane, ina ua mavae le 23 tausaga o tuueseese, na tuufaatasia ai loa le aiga Peteli atoa i Louviers ia Aokuso o le 1996.

Sa tele le olioli sa iai i se faatasitasiga fiafia o le 1,187, e aofia ai le 300 o sui o le aiga Peteli i Falani, ma le 329 o sui mai isi lālā e 42, sa faatasi ai i le Aso Toonai, Novema 15, 1997, e faalogologo i le lauga o le faapaiaga sa faia e le uso o Lloyd Barry, o le sui o le Vaega Pule. Peitai ane, i le vaai atu i le mea moni faapea o lenei faapaiaga sa faia i le taimi tonu o le tetee ma le faaumiumi o taumafaiga taufaaleaga a nusipepa faasaga i Molimau a Ieova i Falani atoa, sa lagonaina ai faapea e tatau i Molimau uma i Falani ona auai i le faailogaina o lenei manumalo. O lea la, i le Aso Sa, Novema 16, sa faia ai se sauniga faapitoa ma le matua “Ia Tumau i le Alofa o Keriso” sa faatulagaina i le Villepinte Exhibition Center, i le itu i mātū o Pale. O Molimau a Ieova uma i Falani faatasi ai ma Molimau e tautatala i le gagana Falani i Peleseuma ma Suisilani sa valaaulia, faapea ma faapotopotoga i Peretania, Siamani, Luxembourg, ma Holani.

O se Faatasiga Iloga

O sauniuniga mo le faatasiga na amataina i le ono masina a o lei oo ane i lena taimi. Ona oo lea i le toe lua vaiaso a o lumanai le faapaiaga o le maota, na alu ai se solo tetee a aveloli i Falani, ma tapunia ai auala tetele ma le sapalai o suauu. Po o le a taunuu ea nofoa ma isi mea i le taimi tonu? Po o le a avea ea le tapunia o auala e taofia ai uso mai i le auai mai? Sa faafiafiaina tagata uma, ona toe tasi le vaiaso, ae uma loa le solo tetee, ma sa toe tatalaina ai loa auala mo taavale. O le afiafi o le Aso Faraile a o lei oo i le faaiuga o le vaiaso lea e faapaia ai le maota, e 38 loli na laʻuina le 84,000 nofoa i fale tetele e lua na totogiina mo lea faamoemoe. E sili atu i le 800 uso ma tuafāfine na galulue i le po atoa seia oo atu i le ʻafa o le iva i le taeao o le Aso Toonai e faatulaga nofoa, le pulelaa, meafaalelei leo, ma ie tetele e iva e faaali ai vitiō.

I le 6 i le taeao o le Aso Sa, sa tatalaina loa faitotoa, ma sa amata loa ona lolofi mai i totonu le aofia. O se aofaiga e 17 nofoaafi sa totogia faapitoa sa aumaia ai le silia ma le 13,000 o Molimau i le laumua. E sili atu ma le luaselau uso ma tuafāfine o lena vaipanoa sa iai i le mea e faatali ai nofoaafi e faafeiloai i le au malaga ma ō atu faatasi ma i latou i le mea o loo tauaofia ai tagata. Sa faapea mai se tasi o tuafafine o lenei faatulagaga alofa ua avatu ai ia i latou “se lagona saogalemu ma le soifua lelei.”

O isi sa ō atu i Pale i vaalele po o taavale. Peitai, o le toatele sa ō mai i pasi e 953, a o Molimau mai le vaipanoa o Pale sa faaaogaina auala lautele o femalagaaiga e ō atu ai i le Exhibition Center. O le toatele sa malaga i le po atoa po o le tuua foi o o latou aiga i le taeao po lava, ae o lo latou fiafia i le auai atu i lenei faatasiga sa aliali mai lava. O faafeiloaiga naunau ma opo mafana sa faaalia ai le toe feiloai o uo ua leva e lei vaai le tasi i le isi mo le tele o tausaga. O le felanulanuai o laei faaleaganuu sa avatu ai i lenei vao o tagata fiafia se uiga faava-o-atunuu. E mautinoa, sa iai se mea e lē masani ai sa faagaoioia.

E oo ane i le taimi na amataina ai le polokalame i le 10 i le taeao, ua leai se nofoa o toe avanoa, peitai e faitau selau tagata sa taunuu i minute taitasi. Po o fea lava e tepa i ai se tasi, e na o le vao o foliga ʻataʻata e tau i ai le vaai. O le faitauafe a lē o le tutū po o le nonofo foi i le fola simā. I le faaalia o le agaga o le tauaofiaga, o le toatele o talavou sa malilie e tutū ina ia mafai ai e i latou e matutua ona nonofo. Sa tusi se tasi o ulugalii faapea: “Maeu lo ma fiafia e tuuina atu o ma nofoa mo uso ma tuafāfine e ma te lē iloaina, ae e pele ia i maʻua!” E toatele sa faaalia le uiga o le faataulagaina totino: “Sa matou tutū i le polokalame atoa e pito i nofoa ia na matou faatulagaina i le po atoa o le Aso Faraile. Ae o le tau lava ina iai iina, ua faatumulia ai i matou i le faafetai ia Ieova.”

E ui lava i le vaivai po o le lē nofo lelei, ae sa faalogologo ma le uaʻi lelei atu le au usufono i lipoti mai isi atunuu ma lauga a Lloyd Barry ma Daniel Sydlik, o ia foi o se sui o le Vaega Pule. Sa faamalamalamaina e le uso o Barry le mataupu, “E Faatuputele i ai e Ieova le Malosi,” ma sa ia matuā auiliilia le auala ua faamanuiaina ai e Ieova ona tagata i le faatelega e ui i tofotofoga eseese. O le lauga a le uso o Sydlik sa faamatuaina faapea, “E Fiafia le Nuu e Fai Ieova mo Latou Atua!” O lauga e lua sa faapitoa le fetaui lelei i le vaai atu i teteega ua feagai nei ma Molimau a Ieova i Falani. Sa faaalia e le uso o Sydlik faapea o le fiafiaga moni e lē faalagolago atu i vala i fafo atu ae o la tatou faiā ma Ieova ma o tatou uiga e faatatau i le ola. O lana fesili i le aofia, “Po o outou fiafia?” sa taliina i le gogolo o le patipati tele.

O se tasi o tuafafine “na mou atu lona fiafia” sa ia tusi atu mulimuli ane: “Na faafuasei ona ou iloa faapea o le fiafia sa mafai lava ona ou mauaina. Sa sese le auala na taulai atu i ai aʻu taumafaiga, ma e ala i lenei lauga, sa faasino mai ai e Ieova e manaomia ona ou sui.” Sa faailoa mai e se tasi uso: “Ua ou manao nei e tau ina ia faafiafiaina le finagalo o Ieova. Ou te lē manao e faatagaina so o se mea e aveesea ai le olioli lea ua amata ona ou lagonaina loloto i totonu.”

A o faasolo atu le sauniga i lona faaiuga, sa matuā tiotio le taitaifono e faalauiloa le aofai o i latou sa auai: 95,888—o se aufaatasiga pito i toatele lea a Molimau a Ieova ua faia i Falani!

Ina ua maeʻa le pese mulimuli, lea sa usuina ma loimata o le olioli e le toatele, ma le tatalo faaiu, na toe taliu uso mo le faimalaga atu i o latou aiga ma lagona eseese. O le mafana, ma faaleuō o le siomaga o le faatasiga e lē faapea na lei amanaiaina e nisi. E tele ni faamatalaga lelei sa faia e avepasi e faatatau i uiga o i latou sa auai i le faatasiga. Sa faagaeetia foi i latou i le auala na faatulagaina ai fuafuaga lea na mafai ai e pasi uma e 953 ona tuua le Exhibition Center i totonu o le lua itula e aunoa ma sina poloka o taavale! Sa matuā talisapaia amio a i latou na auai e tagata na faigaluega i le mea e iai nofoaafi ma nofoaga lautele mo femalagaaiga. E tele ni talanoaga lelei na maua ai, ma se molimau lelei na tuuina atu ai.

“O se Laufanua Lauolaola i le Toāfa”

Sa uunaia e le aposetolo o Paulo uso Kerisiano: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; . . . ia fefaamafanafanai; ia atili ai foi ona faapea ina ua outou iloa o le Aso o loo tāulata mai.” (Eperu 10:24, 25) E mautinoa, o lenei faatasiga faapitoa o se puna o faalaeiauga sili mo tagata uma, “o se laufanua lauolaola i le toāfa” e pei ona faamatalaina ai e se tasi o tuafafine. “Sa matou ō ese ua toe maua le ola ma le malosi, ua faamalosia, ua faamalieina, ma ua sili atu ona naunau nai lo se isi lava taimi e olioli i le auaunaga ia Ieova,” o le tusi mai lea a uso i le lālā i Togo. Sa faamatala faapea e se tasi o ovasia femalagaai: “O i latou sa faavaivai na toe foi i aiga ma le fiafia.” “Sa faagaeetia lava uso ma faamalosia,” o le faamatalaga lea a se tasi uso. Sa uunaia se tasi o ulugalii e tusi: “Sa lei faapea muamua ona ma lagonaina lo ma vavalalata atu i le faalapotopotoga a Ieova.”

“Ua tu oʻu vae i le mea laugatasi; ou te faamanū atu ia Ieova i totonu o faapotopotoga,” o le faamatalaga lea a le faisalamo. (Salamo 26:12) O ia faatasitasiga faa-Kerisiano sa mafai ai e tagata uma ona toe mauaina se mauaa moni faaleagaga i le feagai ai ma toatugā. “Po o ā lava puapuaga,” sa faamautinoa mai ai e se tasi tuafafine, “o nei taimi e lē masani ai ua tamauina i o matou loto ma o le a iai pea e faamafanafanaina ai i matou.” I se tulaga tutusa, sa tusi ai se ovasia femalagaai e faapea: “Pe a tutupu mai taimi faigata, o manatunatuga o lenei faaataga o le Parataiso o le a fesoasoani ia i matou e onosaia ai na mea.”

“Outou o itu aiga o le nuu, ia outou avatua ia Ieova, ia outou avatua ia Ieova le viiga ma le malosi,” ua timai mai ai le Salamo 96:7. E mautinoa, o le faapaiaina o le lālā fou i Falani o le manumalo lea ua tuuina atu mo Ieova. E na o ia e mafai ona aumaia le faataulauina o le galuega e ui i tulaga maumauai ma le salalau atu o teteega. O Molimau a Ieova i Falani ua sili atu ona latou maumauai nai lo so o se isi lava taimi ina ia ‘tumau pea i le alofa o Keriso’ ma ia ‘pupula atu lo latou malamalama.’ (Ioane 15:9; Mataio 5:16) O i latou uma na auai i le polokalame o le faapaiaga na auai ma le tiotio faatasi ma le faisalamo faapea: “O le mea lea ua faia e Ieova; o le mea tatou te ofo ai pe a vaai i ai.”—Salamo 118:23.

[Ata i le itulau 26]

Lloyd Barry

[Ata i le itulau 26]

Daniel Sydlik

[Ata i le itulau 26]

E 95,888 i latou na auai i le polokalame faapitoa i le Villepinte Exhibition Center

[Ata i le itulau 28]

O le faitauafe o i latou na auai a lē o le tutū po o le nonofo foi i le fola o le fale e faalogologo