O Loo ia Ieova le Faaolataga
“O lo tatou Atua, o le Atua o le olataga lea.”—SALAMO 68:20.
1, 2. (a) Aisea e mafai ai ona tatou faapea atu o Ieova o le Puna o le faaolataga? (e) E faapefea ona e faamatalaina le Faataoto 21:31?
O IEOVA o le Faaola o tagata o ē alolofa ia te ia. (Isaia 43:11) Sa iloa e le tupu taʻutaʻua o Isaraelu, o Tavita lenei manatu ona o mea na tutupu moni ia te ia, ma sa ia pese ai ma le loto atoa: “O loo ia Ieova le faaolataga.” (Salamo 3:8) O upu foi na sa faaaogā e le perofeta o Iona i lana tatalo faatauanau a o iai i le manava o se iʻa tele.—Iona 2:9.
2 Sa iloa foi e Solomona le atalii o Tavita faapea, o Ieova o le Puna o le faaolataga, auā na ia faapea mai: “Ua saunia le solofanua mo le aso o le taua; a o le faaolataga, o loo ia Ieova lea.” (Faataoto 21:31) I Sasaʻe Tutotonu anamua, sa toso ai e povi le suotosina, o asini sa amoina avega, o tagata sa tietie i miula, ae o solofanua sa faaaogā i taua. Peitai, a o lei ulu atu le fanauga a Isaraelu i le Nuu Folafolaina, na poloai atu le Atua faapea o lo latou tupu i le lumanai ‘e lē tatau ona faateleina e ia solofanua mona.’ (Teuteronome 17:16) O le a lē manaomia ni solofanua mo taua auā e laveaiina e Ieova ona tagata.
3. O ā fesili e aogā ona tatou iloiloina?
3 O le Alii Pule Silisili Ese o Ieova o ia o “le Atua [“o gaoioiga,” NW] o le olataga.” (Salamo 68:20) Maeu se manatu faalaeiau! Ae o ā “gaoioiga o le olataga” ua faatinoina e Ieova? Ma o ai ua ia faaolaina?
E Faaolaina e Ieova Ē Amio Saʻo
4. E faapefea ona tatou iloa e faaolaina e Ieova tagata amio Atua?
4 O i latou uma o loo saili i le ala saʻo i le avea o ni auauna tuuina atu a le Atua e mafai ona faamafanafanaina i latou mai upu a le aposetolo o Peteru: “Ua silafia e le Alii se mea e laveai mai ai i e amio Atua ai le tofotofoga, a e taofi i e amio leaga e oo i le aso faamasino ina ia faasalaina i latou.” Ina ia faamaonia lenei manatu, na faapea mai ai Peteru sa “lei faasaoina foi [e le Atua] le lalolagi tuai, na o Noa lē talaʻi le amiotonu, o lona toavalu lea na faaolaina, ina ua au mai le lolo i le lalolagi faalematau.”—2 Peteru 2:5, 9.
5. I lalo o ā tulaga, na auauna ai Noa o “lē talaʻi le amiotonu”?
5 Seʻi faapea o lea e te iai i tulaga i aso o Noa. O loo iai i luga o le lalolagi temoni ua liutino tagata. O fanau a nei agelu lē usiusitai o loo faasaua atu i tagata, ma “ua tumu le lalolagi i le saua.” (Kenese 6:1-12) Ae peitai, e lē mafai ona latou uunaia malosi Noa e lafoaia le auaunaga a Ieova. Na i lo lea, o ia o “lē talaʻi le amiotonu.” Ua fausia e ia ma lona aiga se vaa, i le lē tāitai ona latou masalosalo i le folafolaga faapea o le a tafiesea le amioleaga i le vaitaimi o loo latou ola ai. O le faatuatua o Noa ua faamalaiaina ai lena lalolagi. (Eperu 11:7) E tutusa tulaga o mea i aso nei ma tulaga i aso o Noa, ua faailogaina ai nei aso faapea o aso e gata ai o lenei faiga amioleaga o mea. (Mataio 24:37-39; 2 Timoteo 3:1-5) I le pei la o Noa, po o le a e faamaonia atu ea lou faamaoni e avea oe o sē talaʻi le amiotonu o loo auauna faatasi ma tagata o le Atua a o e faatalia le faaolataga mai ia Ieova?
6. Ua faamaonia mai faapefea e le 2 Peteru 2:7, 8 faapea e faaolaina e Ieova ē amio saʻo?
6 Ua saunia e Peteru nisi faamaoniga atili e iloa ai e faaolaina e Ieova ē amio saʻo. Ua faapea mai le aposetolo: “Na . . . laveai foi [e le Atua] ia Lota o le amiotonu, sa tiga i le amio faamatāitu a e faaletaupulea;—auā o lea tagata amiotonu, sa tiga lona loto faamaoni a o nofo faatasi ma i latou, i lona vaai atu ma faalogo atu i lea aso ma lea aso, i a latou amio faaletaupulea.” (2 Peteru 2:7, 8; Kenese 19:1-29) Ua avea amioga lē mamā faaleituaiga ma ala o loo ola ai le faitau miliona o tagata i nei aso e gata ai. I le pei o Lota, po o e ‘matuā tiga ea i le faifai pea o amioga faaletaupulea’ a le toatele o tagata i aso nei? Afai o e tiga, ma pe afai o loo e faia le amiotonu, e ono aofia la oe faatasi ma i latou e faaolaina e Ieova pe a oo ina muta lenei faiga amioleaga o mea.
E Laveai e Ieova Ona Tagata Mai Ē Faatiga
7. E faapefea i feutagaiga a Ieova ma le fanauga a Isaraelu i Aikupito ona faamaonia ai, na te laveaia ona tagata mai faiga faatiga?
7 O le umi lava o le a iai lenei faiga tuai o mea, o le a faapena foi ona fetaiai ai auauna a Ieova ma sauaga ma faiga faatiga mai o latou fili. Peitai e mafai ona latou mautinoa o le a laveai Ieova ia i latou, auā na ia laveaia foi ona tagata sa mapuitiga i aso ua teʻa. Seʻi faapea o oe o se Isaraelu o loo mafatia i faiga faatiga a tagata Aikupito i aso o Mose. (Esoto 1:1-14; 6:8) Ua faasolo ona taia e le Atua Aikupito i lea mala ma lea mala. (Esoto 8:5–10:29) Ina ua fasiotia e le mala oti lona sefulu ola o ulumatua uma a Aikupito, ona faataga lea e Farao Isaraelu e ō ese atu, ae na ia toe faapotopoto ana autau ma nanati atu e tuliloa i latou. E ui i lea, e lei umi lava, ae faaumatia loa o ia ma ana tagatatau i le Sami Ulaula. (Esoto 14:23-28) Ua e aufaatasi atu ia Mose ma tagata uma o Isaraelu i le usuina o lenei pese: “O Ieova, o le toa lava ia, o Ieova o lona suafa lea. O kariota o Farao ma lana itu taua ua ia lafoina i le sami; o ona toa silisili foi ua gogoto i le sami Ulaula. O le moana ua ufitia ai i latou, ua latou o ifo i le mea loloto pei o se maa.” (Esoto 15:3-5) O mala foi faapena o loo faatalia maia i latou uma o faatiga i tagata o le Atua i nei aso e gata ai.
8, 9. I le tusi o Faamasino, taʻu mai se faaaoaoga o loo faamaonia ai faapea e faaolaina e Ieova ona tagata mai ē faatiga.
8 Mo le tele o tausaga ina ua ulu atu le fanauga a Isaraelu i le Nuu Folafolaina, sa faaoo atu ai e faamasino faamasinoga tonu ia i latou. Sa iai ni taimi na pagatia ai tagata i faiga faatiga mai tagata o nuu ese, peitai sa faaaogā e le Atua faamasino faamaoni e laveaiina i latou. E ui atonu o loo faapena foi ona tatou ‘feoi ona o ē faasaua ma faatiga ia i tatou,’ ae o le a faaolaina foi i tatou e Ieova o ni ana auauna faamaoni. (Faamasino 2:16-18; 3:9, 15) O le mea moni, ua aumai ia i tatou e le tusi o le Tusi Paia, o Faamasino, se faamautinoaga o lenei faaolataga faapea ma le faaolataga sili o le a saunia e le Atua e ala mai i lana Faamasino tofia, o Iesu Keriso.
9 Seʻi o tatou toe taliu atu i aso o le faamasino o Parako. Ona o tapuaiga sese ma le lē fiafia i ai o le finagalo o le Atua, na fetaiai ai le fanauga a Isaraelu ma ni pulega mamafa mo le 20 tausaga mai le tupu Kanana o Iapino. O Sesera o lē pule i le itu taua tele a Kanana. Peitai ‘e lē mafai ona iloa atu se talita, po o se tao, i le fagafulu o afe o Isaraelu,’ e ui atonu pe ā ma le fa miliona le aofai o le nuu. (Faamasino 5:6-8) O loo alalaga atu ma le salamō le fanauga a Isaraelu ia Ieova. I le taitaiga a le Atua e ala mai i le perofeta fafine o Tepora, ua faapotopoto ai e Parako tane e toʻa 10,000 i le mauga o Tapora, ona tataʻi ane lea e Ieova le fili i le ālia i lalo ifo o le Mauga o Tapora. Ua osofai malosi mai le autau a Sesera ma a latou kariota o le taua e 900 i le isi itu o le fanua laugatasi ma le auvai mātūtū o le vaitafe o Kisona. Peitai na tatafe malosi mai tafega o le ālia o Kisona ma matuā lolovaia ai. A o savavali ifo Parako ma lana autau mai le Mauga o Tapora sa lē mafai ona iloa atu i latou ona o le malolosi o matagi ma timuga, ua latou molimauina ai le mala matautia ua faapogaia e le toasa o Ieova. Ua tafana atu e le autau a Parako, tagata Kanana uma ua matuā fefefe ma o loo taumafai e sosola ese, ma e leai se tasi o i latou na sao. Maeu se lapataiga mo ē o loo faatiga mai ia i tatou, o ē o loo matuā ō atu e tau faasaga i le Atua!—Faamasino 4:3-16; 5:19-22.
10. Aisea e mafai ai ona tatou mautinoa o le a faaolaina e le Atua ana auauna o aso nei mai ē uma o loo faatiga ia i latou?
10 O le a faaolaina e Ieova ana auauna o aso nei mai o latou fili uma o loo faatiga mai, e pei lava ona ia faaolaina Isaraelu o ē matataʻu i le Atua i taimi o mafatiaga. (Isaia 43:3; Ieremia 14:8) Sa laveai e le Atua Tavita “ai lima o e na ita ia te ia uma lava.” (2 Samuelu 22:1-3) E tusa lava la pe o faatiga pe o sauaina i tatou i lo tatou avea ma tagata o Ieova, ae ia tatou loto tetele, auā o le a faasaolotoina e lana Tupu Faa-Mesia i tatou mai faiga faatiga. Ioe, “e faaola lava e ia e ua matitiva. E laveai o ia ia i latou ai le saua ma le faamalo.” (Salamo 72:13, 14) Ua matuā lalata mai lava lena faaolaina.
E Faaolaina e le Atua i Latou o Ē Faatuatua ia te Ia
11. O le ā le faaaoaoga o le faalagolago atu ia Ieova na saunia mai e le talavou o Tavita?
11 Ina ia molimauina le faaolataga a Ieova, e ao ona tatou faatuatua atu ma le lototele ia te ia. Sa faalagolago atu ma le lototele Tavita i le Atua ina ua ia alu atu e faafetaiaia le sauai o Koliata. Seʻi faaāta i le mafaufau le tulai atu o lena Filisitia laulauā i luma o si tamai Tavita, o lē o loo alaga atu: “Ua e sau ia te au ma le pelu, ma le tao, ma le tao leoleo; a o aʻu, ou te alu atu ia te oe i le suafa o Ieova o ʻau, o le Atua o le itu taua a Isaraelu ua e faifai i ai. O le aso nei e tuuina mai ai oe e Ieova i loʻu lima, ou te fasi ia te oe, ma ave ese lou ulu; ou te foai atu foi tino oti o ʻau a Filisitia i lenei aso i manu felelei ma manu feai e tataa; e iloa ai [e] le lalolagi uma, o i ai le Atua ia Isaraelu. E iloa ai foi e lenei faapotopotoga uma, e le faaolaina tagata e Ieova i se pelu ma se tao; auā o loo ia Ieova le taua.” E lei umi ae oti loa Koliata, ma ua matuā faatoilaloina ai autau a Filisitia. E manino la, sa faaolaina e Ieova ona tagata.—1 Samuelu 17:45-54.
12. Aisea atonu e aogā ai le manatuaina o le tagata toa a Tavita o Eleasaro?
12 Pe a fetaiai ma tagata faasauā, atonu e manaomia ona tatou “matuā loto tetele” ma faatuatua atoatoa atu i le Atua. (Isaia 46:8-13, NW; Faataoto 3:5, 6) Seʻi mātau le mea lenei na tupu i se nofoaga e igoa o Fesetame. Sa sosola le autau a Isaraelu i luma o autau a Filisitia. Peitai e lei avea le fefe ma itu na taofia ai gaoioiga malolosi a Eleasaro, o se tasi o tane mai toa taʻutaʻua e toatolu a Tavita. Sa ia alu atu i le fanua o karite ma ia fasiotia toatasi ai i le pelu tagata Filisitia. Ona ‘faia ai lea e Ieova le faaolataga tele mo Isaraelu.’ (1 Nofoaiga a Tupu 11:12-14; 2 Samuelu 23:9, 10) E leai se tasi o faatalitalia mai i tatou e faatoilaloina toatasi se vaegaau. Peitai, atonu e iai ni taimi e tuua ai na o i tatou taitoatasi ma tatou fesagaia ai ni omiga mai fili. Po o le a tatou faalagolago atu ea ma le tatalo ia Ieova, le Atua o le faaolataga? Po o le a tatou saili atu ea i lana fesoasoani ina ia alofia ai lo tatou taʻuina atu o o tatou uso talitonu i tagata faasauā?
E Faaolaina e Ieova Ē Tausia le Faamaoni
13. Aisea sa faigata ai ona tausisia le faamaoni i le Atua i le malo o ituaiga e sefulu o Isaraelu?
13 Ina ia maua le faaolataga a Ieova, e ao ona tatou tausisia le faamaoni ia te ia e tusa lava po o ā mea e aofia ai. Sa fesagai tagata o le Atua i aso anamua ma puapuaga eseese. Seʻi manatu i se mea e te ono fesagaia pe ana fai sa e nofo ai iina i le malo o ituaiga e sefulu o Isaraelu. O uiga sauā o Reopoamo na uunaia ai le ituaiga e sefulu e faamaamulu mai le lagolago atu ia te ia, ae faavae ai loa se malo i le itu i mātū o Isaraelu. (2 Nofoaiga a Tupu 10:16, 17; 11:13, 14) Mai le tele o ona tupu, sa sili lava ona lelei Ieu, peitai e oo lava foi ia te ia, ‘sa lei savali o ia i le tulafono a Ieova ma lona loto atoa.’ (2 Tupu 10:30, 31) E ui i lea, sa iai i le malo o ituaiga e sefulu i latou sa tausia le faamaoni. (1 Tupu 19:18) Sa latou faaalia le faatuatua i le Atua, ma na faamaonia lona iai faatasi ma i latou. E ui lava ina tofotofoina lou faatuatua, ae po o e tausisi ea i le faamaoni ia Ieova?
14. O le ā le faaolataga na faatinoina e Ieova i aso o le tupu o Esekia, ma o le ā na taitaia ai i le faatoilaloina e Papelonia o Iuta?
14 O le salalau atu o le lē faaaloalo i le Tulafono a le Atua na oo ai mala i le malo o Isaraelu. Ina ua faatoilaloina e autau a Asuria i le 740 T.L.M., e mautinoa lava o nisi tagata o ituaiga e sefulu sa latou sosola atu i le malo o ituaiga e lua o Iuta, o iina na mafai ona latou tapuai ai ia Ieova i lona malumalu. E toafā tupu mai le toʻa 19 o tupu o Iuta i le gafa o Tavita—o Aasa, Iosefatu, Esekia, ma Iosia—sa matilatila i lo latou tuutoina atu i le Atua. I aso o Esekia o lē na tausia le faamaoni, na faasagatau ane ai se autau malosi a Asuria ia Iuta. I le tali atu i olega a Esekia, na faaaogā ai e le Atua le na o le toatasi lava le agelu e fasiotia le toʻa 185,000 o tagata Asuria i le po e tasi, ma avatu ai le faaolataga i Ona tagata tapuai! (Isaia 37:36-38) Mulimuli ane, o le lē taulau ona tausia e tagata o le Tulafono ma utagia lapataiga a perofeta a le Atua, na taitaia ai i le faatoilaloina e Papelonia o Iuta ma le faaumatiaga o lona laumua, o Ierusalema, ma le malumalu i le 607 T.L.M.
15. Aisea na manaomia ai e tagata sa Iutā ua faatāfea le onosai i Papelonia, ma na faapefea ona iu ina faatinoina e Ieova le laveaiina?
15 Sa manaomia e tagata sa Iutā ua faatāfea le onosai ina ia tausisia ai lo latou faamaoni i le Atua a o faatagataotauaina i Papelonia mo tausaga faanoanoa e 70. (Salamo 137:1-6) O se tasi o tagata sa mataina lona tausia o le faamaoni o le perofeta o Tanielu. (Tanielu 1:1-7; 9:1-3) Seʻi vaai faalemafaufau i lona olioli ina ua faatinoina le poloaiga a le tupu Peresia o Kuresa i le 537 T.L.M., e faataga ai tagata sa Iutā e taliu atu i Iuta e toe fausia le malumalu! (Esera 1:1-4) E tele tausaga sa onosai ai Tanielu ma isi, ae na iu lava ina latou vaaia le lafotuina o Papelonia ma le faasaoina o tagata o Ieova. E ao ona fesoasoani lenei mea ia i tatou ina ia faaalia ai le onosai a o tatou faatalitali atu i le faaumatiaga o “Papelonia le aai tele,” le emepaea a le lalolagi o lotu sese.—Faaaliga 18:1-5.
E Faaolaina Pea e Ieova Ona Tagata
16. O le ā le faaolataga na aumai e le Atua i aso o le masiofo o Eseta?
16 E faaolaina pea e Ieova ona tagata pe a latou faamaoni atu i lona suafa. (1 Samuelu 12:22; Isaia 43:10-12) Seʻi toe tepa i tua i aso o le masiofo o Eseta—le senituri lona lima T.L.M. Ua tofia e le tupu o Asueru (Aretaseta I) Hamanu e avea ma palemia. Ona o lona lotoa tele i le musu o Moretekai le tagata sa Iutā e ifo atu ia te ia, ua faia ai e Hamanu se faufauga ina ia fasiotia Moretekai ma tagata sa Iutā uma o loo nonofo i le emepaea o Peresia. Ua ia tuuaʻia i latou faapea o ni tagata solitulafono, ua ia faaopoopo ai se faatosinaga tau tupe, ma ua faataga o ia e faaaogā le mama a le tupu e faamaufaailoga ai se tulafono o loo poloaia ai le faaumatiaina o i latou. Ua faaali atu ma le lototele e Eseta i le tupu, lona tupuaga mai ia sa Iutā, ma faailoa atu i ai le faufauga fasioti tagata a Hamanu. E lei umi ae toe sisi ai lava Hamanu i le laau lava lea na ia fafau e faaoo ai le sala ia Moretekai. Ua tofia nei Moretekai e avea ma palemia, ma tuu atu i ai le pule na te faatagaina ai tagata sa Iutā latou te puipuia i latou lava. Ua manumalo i latou i se manumalo tele i o latou fili. (Eseta 3:1–9:19) O lenei mea na tupu e tatau ona faamalosia ai lo tatou faatuatua faapea, o le a faatinoina e Ieova le faaolataga mo ana auauna usiusitai i aso nei.
17. Na faapefea ona aogā le usiusitai i le laveaiina o Kerisiano Iutaia o le uluai senituri o ē sa nonofo i Iutaia?
17 O le isi mafuaaga e faaolaina ai e le Atua ona tagata talu ai lo latou usiusitai ia te ia ma lona Alo. Seʻi faapea o oe o se tasi o soo Iutaia o Iesu i le uluai senituri. Ua ia fetalai atu ia i latou: “A iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina. O lea aso, o e ua i Iutaia ia latou sosola i mauga.” (Luka 21:20-22) Ua mavae atu tausaga, ma ua e tau mānatu po o afea e faataunuu ai nei fetalaiga. Ona osofai mai lea o le fouvalega a Iutaia i le 66 T.A. Ua siosiomia Ierusalema e autau a Roma i le taitaiga a Cestius Gallus, ma ua oo mai lava i pa o le malumalu. Peitai, na faafuasei ona toe solomuli autau a Roma e aunoa ma le manino mai o se mafuaaga. O le ā o le a faia loa e Kerisiano Iutaia? I lana tusi Ecclesiastical History (Tusi III, mataupu V, 3), ua faapea mai ai Eusebius, na sosola ese i latou mai Ierusalema ma Iutaia. Na faasaoina o latou ola talu ai sa latou usiusitai i le lapataiga faavaloaga a Iesu. Po o faapena ea le vave ona e usitai atu i le taitaiga faale-Tusi Paia ua saunia e ala mai i “le auauna e pule, ua faamaoni” ua tofia e pulea “mea” a Iesu?—Luka 12:42-44.
Le Faaolataga e Oo Atu i le Ola e Faavavau
18, 19. (a) O le ā le faaolataga na mafai ona maua i le maliu o Iesu, ma e mo ai? (e) O le ā na maumauai le aposetolo o Paulo e fai?
18 O le utagia o lapataiga a Iesu na faasaoina ai ola o Kerisiano Iutaia. Peitai o le maliu o Iesu na mafai ai ona maua e “tagata uma” le faaolataga e oo atu i le ola e faavavau. (1 Timoteo 4:10) Na amata ona manaomia e tagata se togiola ina ua agasala Atamu, lea na ia lē maua ai le ola mo ia lava ma faatauina atu ai le fanau a tagata e faapologaina i le agasala ma le oti. (Roma 5:12-19) O taulaga i manu na ofoina i le Tulafono Faa-Mose sa na o se faailoga mo le ufiufia o agasala. (Eperu 10:1-4) Talu ai sa lei iai se tamā faaletagata o Iesu ma e manino le “faamalumalu” ifo o le agaga paia o le Atua ia Maria mai le taimi na ia afuafua ai seia oo ina fanau mai Iesu, o lea na fanau mai ai Iesu e aunoa ma le tuufaasolo ane i ai o le agasala po o le lē lelei atoatoa. (Luka 1:35; Ioane 1:29; 1 Peteru 1:18, 19) Ina ua maliu Iesu o sē lelei atoatoa na ia tausia le faamaoni, na ia ofo atu ai lona soifua lelei atoatoa e toe faatau mai ai ma faasaoloto mai le fanau a tagata. (Eperu 2:14, 15) O lea “na foaifuaina [ai e Keriso] o ia e ia e fai ma togiola mo tagata uma.” (1 Timoteo 2:5, 6) E lē o tagata uma o le a latou taliaina lenei sauniuniga mo le faaolataga, peitai ua faataga atu e le Atua le mauaina o aogā o lenei sauniuniga e i latou o ē taliaina i le faatuatua.
19 E ala i le ofoina atu o le aogā o lana taulaga togiola i le Atua i le lagi, na toe faatau mai ai e Keriso le fanau a Atamu. (Eperu 9:24) Ona maua ai lea e Iesu se Faatoanofotane, ua faia aʻe i ona soo faauuina e 144,000, o ē ua faatutuina aʻe mo le ola faalelagi. (Efeso 5:25-27; Faaaliga 14:3, 4; 21:9) Ua avea foi o ia ma “Tamā o le faavavau” ia i latou e taliaina lana taulaga ma mauaina le ola e faavavau i luga o le lalolagi. (Isaia 9:6, 7; 1 Ioane 2:1, 2) Maeu se fuafuaga alofa! O loo manino mai le talisapaia e Paulo o lenei sauniuniga, i lana tusi faagaeeina lona lua i Kerisiano i Korinito, e pei ona o le a faaalia mai e le mataupu o sosoo mai. O le mea moni, sa maumauai Paulo ina ia lē faatagaina se isi lava mea e taofia ai o ia mai le fesoasoani atu i tagata ia latou talia le sauniuniga ofoofogia a Ieova mo le faaolataga e oo atu i le ola e faavavau.
E Faapefea Ona E Tali?
◻ O le ā se faamaoniga faale-Tusi Paia e faamaonia ai e faaolaina e le Atua ona tagata amio saʻo?
◻ E faapefea ona tatou iloa e faaolaina e Ieova i latou o ē faatuatua ia te ia ma tausisia lo latou faamaoni?
◻ O le ā le sauniuniga ua faia e le Atua mo le faaolataga e oo atu i le ola e faavavau?
[Ata i le itulau 12]
Na faatuatua Tavita ia Ieova, le “Atua o le olataga.” Po o faapena foi oe?
[Ata i le itulau 15]
E faaolaina pea e Ieova ona tagata, e pei ona faamaonia lona faia i aso o le masiofo o Eseta