“Tuu i le Sami le Vaa ma Folau a o Agi se Afā”

PE E te lē manatu i sea faiga ua sili ona leaga le taimi ua fai ai, e valea, ma ono lamatia ai? O nisi, ua latou matuā tuuina atu lava i latou i se tulaga faapena i se ala faafaatusa. E faapefea? Na faapea mai le tusitala Egelani o le lona 17 senituri o Thomas Fuller: “Aua le gaoioi a o sasao aʻe le ita. O le faia faapena, ua tusa lea ma le tuu i le sami le vaa ma folau a o agi se afā.”

O le faia o se gaoioiga i se tulaga lē mataofiofia o le ita, e mafai ona iai āuga e matuā faanoanoa ai. E faamautuina lea manatu e le mea na tupu o loo faamauina i le Tusi Paia. O Simeona ma Levi, o atalii o le augatamā anamua o Iakopo, na tali atu i le faaleagaina o lo la tuafafine o Tina i le osofai atu ma le matuā feita fia tauimasui. O le iuga na faasoloatoa ai le fasiotia o tagata ma le vetea o a latou mea. E lētioa la faamalaiaina e Iakopo a la gaoioiga leaga, i le faapea atu: “Ua oulua faatiga mai ia te au, e inosia ai aʻu e i latou o e mau i le nuu.”—Kenese 34:25-30.

Ua poto ai, ona fautuaina mai e le Afioga a le Atua, le Tusi Paia, le ala tuufaafeagai. Ua faapea mai: “Ina soia e te ita, ma ia tuu lou tiga; aua e te faameo, neʻi e faia se mea leaga.” (Salamo 37:8) O le mulimuli i lena fautuaga e mafai ona alofia ai agasala matuia.—Failauga 10:4; tagai foi i le Faataoto 22:24, 25.