Filemu i le Lalolagi—Mai le ā le Puna?
PO O le taulimaina i se fua i le lalolagi aoao o aʻoaʻoga ma tapuaiga o le a aumaia ai le filemu i le lalolagi? O le naunautaiga malosi lea a Dr. Robert Muller, o lē sa avea muamua ma failautusi lagolago aoao a Malo Aufaatasi ma o lē na mauaina le faailoga o le 1989 UNESCO Taui mo Aʻoaʻoga o le Filemu. E pei ona sa lipotia mai i le nusipepa o le Vancouver Sun, o Dr. Muller ua “talitonu e tatau i tamaiti aʻoga uma o le lalolagi aoao ona aʻoaʻoina i se faasologa o mataupu autū i mea moni ma aogā e faatatau i le paneta, le tulaga faaletagata ma le leai o ni faiga sauā.” Ua ia vaai faalemafaufau i le aso o le a aʻoaʻoina ai e faalapotopotoga uma tau aʻoaʻoga i le lalolagi aoao tamaiti e uiga i Malo Aufaatasi o le faamoemoe sili lea mo le filemu. Ua ia talitonu foi e faapea “e tatau i lotu uma o le lalolagi ona avea ma sui o se faalapotopotoga fou e tai pei o Malo Aufaatasi lea ua taʻua o Lotu Tuufaatasi,” na lipotia mai ai e le Sun. I lea taimi “o le a faaauilumaina ai e aʻoaʻoga uma faalotu le leai o ni faiga sauā.”
Po o le a iai moni ea la le filemu i le lalolagi? E mautinoa lava! Peitai o le a lē ala mai i se faalapotopotoga faaletagata. I le silia ma le 2,700 tausaga ua mavae, na faailoa mai e se tusiupu faagaeeina le puna silisili tau aʻoaʻoga o le filemu ina ua ia valoia e faapea o tagata loto faamaoni o le a ‘aʻoaʻoina e Ieova,’ ma o le a “tele” lo latou filemu.—Isaia 54:13.
O le Atua o ia lea e “aumaia le filemu” ua fai mai ai le Tusi Paia. (Roma 16:20, NW) E oo lava i le taimi nei ua agaigai ai i luma le polokalame ofoofogia tau aʻoaʻoga i le lalolagi aoao a o aʻoaʻo e Ieova ona tagata ia “saili i le filemu ma tausisi i ai,” ia “latou tuʻi . . . i a latou pelu e fai ma uamea o suotosina,” ma ia lē “toe aʻoaʻo . . . i taua.”—1 Peteru 3:11; Isaia 2:2-4.
O le tapuaiga lea ua faavaeina i luga o le upu moni, e saoloto mai faiga faagutugutulua ma le taufaasese, ua faamaonia ma faamanuiaina e le Atua. (Mataio 15:7-9; Ioane 4:23, 24) E na o le tapuaiga moni, e ogatusa atoatoa ma le Afioga a le Atua, e mafai ona maua ai tagata o ē nonofo i le filemu ma le autasi ma ē e iai le alofa moni o le tasi i le isi.—Ioane 13:35.
Ina ia aʻoaʻo atili e uiga i mea o loo fai mai ai le Afioga a le Atua e faatatau i le filemu i le lalolagi, matou te valaauliaina oe e faafesootai ē na lomia lenei lomiga.