A Suia Tapulaa, ua Mou Atu Foʻi le Faatuatuaina

I aso o le tupu o Enelē I o Egelani (1100-1135), o le iata e tasi, na manatu i ai o “le vā mai le tumutumu o le isu o le tupu seʻia oo atu i le tumutumu o lona lima matua pe a faasaʻo le lima.” E faapefea ona iloa e tagata na ola ai i le pulega a le tupu o Enelē, o loo saʻo le uumi o laau e taʻi iata? E foliga mai e na o le pau lava le auala e mautinoa ai le saʻo o le fua, o le asiasi atu lea i le tupu.

O FUA i aso nei ua sili atu ona manino pe a faaupuina e tusa ai o ni faatulagaga. O lea la, o le mita e faamatalaina e faapea, o le mamao e alu atu ai le malamalama i se vacuum (se vaipanoa e leai se mea e faalavelaveina ai le alu atu a le malamalama) i le tasi le sekone e vaevae i le 299,792,458. Ina ia saʻo atoatoa, o lenei malamalama ua faatulagaina lona fuapeau ma e mai i se ituaiga o laser faapitoa. Ana faapea e iai ni a latou meafaigaluega e toe faia ai lea tulaga, o lona uiga e mafai lava e tagata i so o se mea ona toe siaki a latou fua o le umi po o tutusa ma fua a isi tagata uma.

Peitaʻi, po o le ā lava sina suiga itiiti i le faatulagaga o le fua, e mafai lava ona faapogaia ai le lē mautinoa, ma e matuā telē se taumafaiga e fai ina ia puipuia ai tulaga e tatau ona iai. Mo se faataʻitaʻiga, i Peretania o le faatulagaga mo le fuaina o le mamafa, o se poloka lea o ni uʻamea se lua ua tuu faatasi (platinum ma le iridium) lea e tasi le kilokalama le mamafa. E teuina lenei poloka i le National Physical Laboratory. O le polusione mai le feoaʻiga a taavale ma vaalele e siitia ai le mamafa o le kilokalama i aso uma. Peitaʻi, o lenei poloka uʻamea, o se kopi o le fua o le faatulagaga a le lalolagi lea e teumaluina i lalo o ni fagu tioata se tolu i se potu i lalo o le eleele i le International Bureau of Weights and Measures i Sèvres, i Falani. Ae e oo foʻi i le mamafa o lenei mea e fesuisuiaʻi lava ona o le filogia i mea ninii e lē iloa e mata. E oo mai i le taimi lenei, e leʻi mauaina lava e tagata o le lalolagi e suʻesuʻeina fua o le mamafa se faatulagaga e sili atu ona mautū.

E ui o suiga laiti e foliga e lē tāua i le toʻatele o tagata, ae a sui atoa se faatulagaga e mafai ona avea ma mea e fenuminumiaʻi ai. I Peretania, o le suiga mai le fua o pauna ma aunese i kilokalama ma kalama, na faateleina ai le leai o se faatuatuaina ma ua tatau ai. O nisi o tagata faioloa lē faamaoni ua latou faaaogāina le lē masani lelei o tagata i le lautele i le faatulagaga fou, e fai ma mea e faʻimamago ai i a latou tagata faatau.

Tapulaa i le Aiga ma Tapulaa Tau Amio

Ae faapefea suiga i tapulaa i le aiga ma tapulaa tau amio? O āuga ona o ia suiga e mafai ona sili atu ona faaleagaina ai. O lipoti o loo iai nei i aiga malepelepe, amioga o faiga tuufau faaleituaiga, ma le taatele o le faileagaina o tamaiti, ua faateʻia ai le toʻatele ma faamautūina ai le manatu e faapea, o loo tatou ola nei i se taimi o le paʻū maulalo o tapulaa tau amio. O aiga e toʻatasi le matua, o tamaiti ua tausia aʻe e “mātua” tauatane ma tauafafine, ma le mataʻutia o le faileagaina o tamaiti o loo i lalo o le pulega a le malo, o āuga uma nei ona ua fulitua tagata i tapulaa ua faamaoniaina. Ua faateleina tagata ua avea ma ē “alolofa i latou ia i latou, . . . e le lotoaiga, . . . e le alolofa i tagata amio lelei, . . . o e ua tele le manao i mea faafiafia a e leai se manao i le Atua,” e pei ona valoia mai e le Tusi Paia i le tusa ma le lua afe tausaga ua tuanaʻi.—2 Timoteo 3:1-4.

O le paʻū o tapulaa tau amio e ō faatasi ma le lē taulau ona gaoioi i se tulaga faatuatuaina. Talu ai nei, na aliaʻe ai se tulaga o le matuā see ese mai i tapulaa maualuluga o le galuega faafomaʻi i le mea na tupu i Hyde, o se aai i le itu i mātū o Egelani, lea e maufaatuatuaina ai tele e tagata a latou fomaʻi, o ē e “faaaloalogia ma faatuatuaina,” e tausia o latou aiga. Ae peitaʻi na faanoanoa ona na mao lo latou faatuatuaina o fomaʻi. E faapefea? O lipoti mai suʻesuʻega na faaalia ai e faapea, o se tasi o fomaʻi na māfua moni ai lava le feoti, a itiiti mai, o le toʻa 15 o ana maʻi tamaʻitaʻi. O le mea moni, na tatau ona toe suʻesuʻeina e leoleo le silia ma le 130 o isi maliu na aafia ai le fomaʻi lea. O le telē o le lē taulau o le faatuatuaina na faamatilatilaina ina ua molia ma faasalaina i le falepuipui le fomaʻi. E toʻalua ni leoleo o le falepuipui o ē atonu o lo la tinā na fasiotia e lenei fomaʻi, na tuuina atu ia i laʻua nisi o tiute ina ia la lē feagai tuusaʻo ai ma lea pagota amio leaga. E lētioa la ona faamatalaina i le lipoti a le Daily Telegraph lea alii fomaʻi amioleaga, o se “fomaʻi ‘Tiapolo.’”

E tusa ai o le suia ma le faasolosolo ina leaga o tapulaa i le tele lava o vaega o le olaga, o ai la e mafai ona e tuuina i ai ma le mautinoa lou faatuatuaga? O fea e mafai ona e maua ai tapulaa e lē masuia, lea e lagolagoina e se pule e iai le malosi e faatumauina ai? O loo talanoaina nei fesili e le mataupu o loo sosoo mai.