Talaaga o le Soifuaga

Na Mā Tofotofoina Ieova

UA FAAMATALAINA E PAUL SCRIBNER

“Talofa lava Mrs. Stackhouse. O lea o loo oʻu faia ota mo keke o le Eseta i le taeao nei, ma ou te mautinoa o le a e fiafia e maua se keke mo lou aiga.” I le taeao pō lava o le tau e totogo ai mea i le tausaga e 1938, sa ou iai i Atco, i New Jersey i le Iunaite Setete o Amerika, sa ou talanoa atu ai i se tasi o tagata e sili ona tele ana faatau i le nofoaga lea sa ou alu atu e faatau atu ai oloa mo le General Baking Company. Sa faateʻia aʻu ina ua teena e Mrs. Stackhouse.

NA FAAPEA mai o ia: “Ou te iloa ou te lē manaʻo i ai. E matou te lē faamanatuina le Eseta.”

Sa ou lē iloa po o le ā le mea o le a fai. O le ā le uiga o lona lē faamanatuina o le Eseta? O le mea moni, o le taʻiala muamua lava o mea tau i faatauga, e saʻo pea lava le tagata faatau. Ae o le a faapefea nei la? Sa ou toe taumafai atu e faapea: “Ia, ae e ese le manaia o le keke, ou te iloa e te fiafia tele i mea matou te faia. Faamata e lē fiafia i ai lou aiga e tusa lava pe tou te lē faamanatuina le Eseta?”

Na ia toe faapea mai: “Ailoga, ae e iai le mea lea sa ou manatu ou te fia talanoa atu ai i lau Susuga Scribner, ma atonu o le taimi lelei lenei e fai atu ai.” O lena talanoaga na suia atoatoa ai loʻu olaga! O Mrs. Stackhouse, o se tasi o le Kamupanī (po o le faapotopotoga) a Molimau a Ieova i Berlin, New Jersey. Sa ia faamatalaina mai le amataga o le faamanatuina o le Eseta ma tuuina mai i a te aʻu ni tamaʻi tusi se tolu. O igoa o na tusi o le Safety, Uncovered, ma le Protection. Sa ou alu ma tusi i le fale, ma sa ou fia iloa lava ae sa fai foʻi si popole. Sa iai se mea na ou faalogo muamua i ai a o ou laʻitiiti lava mai mea ia na talanoa mai ai Mrs. Stackhouse.

Uluaʻi Feiloaʻiga ma Tagata Aʻoga o le Tusi Paia

Sa ou fanau i a Ianuari 31, 1907, ma i le 1915 ina ua valu oʻu tausaga, na maliu ai loʻu tamā i le kanesa. O le mea lena na mā ō ai ma Tinā ma matou nonofo ma ona mātua i se fale telē lava i Malden, Massachusetts. Sa nonofo ai foʻi iinā ia Benjamin Ransom, le tuagane o loʻu tinā, ma lana avā i le fogafale lona tolu. A o leʻi oo i le lona 20 o senituri, sa auaufaatasi ai ia Ben ma le International Bible Students, e pei ona iloa ai Molimau a Ieova i na aso. Sa ou fiafia lava i a Ben, ae o isi uma tagata lotu Metotisi o le aiga o Tinā, sa manatu i a te ia e faapea e ese lava. I tausaga mulimuli ane a o leʻi tatalaina la laʻua faaipoipoga, na mafai ai e lana avā ona ave o ia ma taofia i se falemaʻi o le mafaufau mo se taimi puupuu ona o ona talitonuga faalotu! Talu ai sa vave lava ona iloa e fomaʻi i le falemaʻi e faapea, sa leai se mea na faalētonu i le mafaufau o Ben, o lea sa latou faateʻaese ai o ia mai le falemaʻi ma faatoese atu i a te ia.

Na alu Ben ma ave aʻu i sauniga a le International Bible Students i Boston, aemaise lava pe a iai ni failauga e asiasi mai po o ni sauniga faapitoa. I se tasi taimi, o le failauga na asiasi ane o le tagata lauiloa lea o Charles Taze Russell, o lē sa vaaia le galuega talaʻi i na aso. I le tasi aso, o le sauniga faapitoa, o le faaaliga lea o le “Ata o le Tala o le Foafoaga” (Photo-Drama of Creation). E ui lava o lena mea na faia i tuā i le 1915, ae e oo mai lava i aso nei o loo ou manatua pea le faaataina mai o Aperaamo a o aveina Isaako i luga o le mauga e ofo atu e osi ai le taulaga. (Kenese, mataupu e 22) O loo mafai pea ona ou vaai atu i a Aperaamo ma Isaako o tau aʻeaʻe atu i lena mauga ma se avega fafie, a o faalagolago atoatoa atu Aperaamo i a Ieova. Ona o aʻu o se tama ua aumatuā, na matuā faafiafiaina ai aʻu i lena mea.

Ona siitia atu lea o Ben ma lana avā i Maine, ma na toe faaipoipo Tinā ma ave ai i matou i New Jersey. O lea sa ou lē toe vaai ai lava i a Ben mo se taimi umi. I oʻu tausaga talavou i New Jersey, na ou feiloaʻi ai i a Marion Neff, o se tasi o tamaiti e toʻavalu i le aiga lea sa ou fiafia lava ou te asiasi i ai, e lolotu i le Periperiane. E matuā tele lava afiafi o Aso Sa na ou auaufaatasi ai ma lena aiga faapea ma le ʻautalavou o la latou lotu, o lea na iʻu ai ina avea aʻu ma se tasi o le lotu Periperiane. Ae, sa ou manatua pea nisi o mea na ou aʻoaʻoina i sauniga a Tagata Aʻoga o le Tusi Paia. Na mā faaipoipo ma Marion i le 1928, ma o la mā fanau teine o Doris ma Louise, na fananau i le 1935 ma le 1938. I le iai o se afafine laʻitiiti faapea ma se pepe fou faatoʻā fanau mai i le aiga, sa oo ai i a i maʻua uma se lagona ua manaʻomia se taʻitaʻiga faaleagaga i le tausiaina aʻe o lo mā aiga.

Mauaina o le Upu Moni i Tamaʻitusi

Sa mā vaavaai ma Marion mo se lotu e mā te ō i ai ma faia ai loa sa mā fuafuaga. Sa mā feauauaʻi i Aso Sa taʻitasi, e nofo le tasi o i maʻua i le fale ma tamaiti ae alu le isi i le lotu lea o loo mā saʻiliʻili i ai pe mā te mananaʻo ai. I le tasi Aso Sa, o le aso lea e nofo ai Marion i le fale, ae na ou tauofo i ai ou te nofo e vaai tamaiti ina ia mafai ai ona ou faitauina le tamaʻitusi o le Safety, le uluaʻi tusi o tusi e tolu ia na aumai i a te aʻu e Mrs. Stackhouse. O le taimi lava na amata ai ona ou faitauina, sa leʻi mafai ona toe tuuesea! Sa oo ina ou matuā talitonu ua ou maua se mea sa lē mafai e se lotu ona ofoina mai. I le isi vaiaso na sosoo ai, na toe faapena ai foʻi, sa ou fiafia foʻi ou te toe nofo e vaai tamaiti a o ou faitauina le tamaʻitusi lona lua o le Uncovered. O mea ia sa ou faitauina, sa foliga mai o ni mea na ou faalogo muamua i ai. Po o le mea ea lenei na talitonu i ai Ben? Sa manatu lo matou aiga e valea lana lotu. Po o le a faapeʻī se manatu o Marion? Sa lē tatau ona ou popole. I ni nai aso talu ona uma ona ou faitauina o le Uncovered, ina ua ou foʻi mai i le fale mai le galuega, sa ou teʻi lava ina ua faapea mai Marion, “Sa ou faitauina tamaʻi tusi ia na e aumaia i le fale. E ese le manaia o tusi.” Sa ou maua loa se toʻa!

I tua o na tamaʻitusi sa iai ni faamatalaga e uiga i le tusi fou lea faatoʻā maua, o le Enemies, na matuā faaalialia ai lava ia lotu sesē. Na mā filifili ai e aumai se tusi. Ae peitaʻi, a o leʻi aauina atu la mā talosaga i le meli, na tuʻituʻi mai ai se Molimau i le faitotoʻa ma ofo mai i a i maʻua le tusi tonu lava lena. Sa matuā aogā lava lena tusi i le faia o la mā filifiliga! Sa mā lē toe ō ai loa i ni lotu ae amata ona ō i sauniga a le Faapotopotoga a Molimau a Ieova i Camden, i New Jersy. I na o ni nai masina mulimuli ane, i le Aso Sa, Iulai 31, 1938, na faapotopoto ai la matou vaega e tusa ma le toʻa 50 i le fanua o le tuafafine o Stackhouse—le fale lea sa ou taumafai e faatau atu i ai ia keke o le Eseta—ma faalogologo ai i se lauga na puʻeina a Judge Rutherford e uiga i le papatisoga. Ina ua uma o lena,sa sui o matou ofu i le fale, ma e toʻa 19 i matou na papatisoina i se ālia na latalata ane.

Maumaututū e Avea ma Paeonia

E leʻi umi talu ona uma loʻu papatisoga, ae faamatala mai loa e se tasi o tuafafine i le faapotopotoga i a te au e uiga i tagata e taʻua o paeonia, o ē ua faia le faiva i le lautele ma a latou galuega autū. Sa vave lava ona ou fia iloa atili ma e leʻi pine ae ou masani i se aiga e paeonia uma. O se uso ua faamatuātagata, o le uso o Konig, o lana avā, ma lona afafine ua matua, na avea uma lava ma paeonia i se faapotopotoga e tuaoi ma la matou faapotopotoga. Ona o aʻu o se tamā o se fanau laiti, sa avea o se mea mataʻina i a te aʻu le olioli tele o le aiga o Konig i le faiva. Sa masani lava ona ou afe i ai, paka ai laʻu taavale keke, ma auai mo sina taimi ma i latou i le faiva mai lea fale i lea fale. Sa leʻi pine ae ou manaʻo e avea aʻu ma paeonia. Ae o le a faapefea ona fai? E toʻalua la mā fanau laiti ma Marion, ma sa manaʻomia tele aʻu e laʻu galuega. O le mea moni, a o amata le Taua Lona Lua a le Lalolagi i Europa ma ua matuā toʻatele lava tane talavou na auai i le vaegaʻau a le Iunaite Setete, sa matuā faateleina ai galuega mo i matou sa galulue i galuega sivili. Sa uunaʻia aʻu ina ia faateleina vaipanoa e oʻo i ai laʻu taavale keke, ma sa ou iloa ai e lē taitai lava mafai ona ou paeonia i le faasologa lea.

Ina ua ou talanoa atu i le uso o Konig e uiga i loʻu faanaunauga, na faapea mai o ia: “Tau lava ina e galue malosi i le auaunaga a Ieova ma tuu atu pea i a te ia lou sini e ala i le tatalo. O le a fesoasoani o ia i a te oe ina ia e ausia.” E sili atu i le tausaga o ou faia lena mea . Sa masani ona ou manatunatu i mau e pei o le Mataio 6:8, lea o loo faamautinoa mai ai i a i tatou e faapea e silafia e Ieova mea o loo tatou mananaʻo ai ae tatou te leʻi ole atu i a te ia. Ma sa ou taumafai lava e mulimuli i le fautuaga i le Mataio 6: 33, ina ia muaʻi saʻili pea le Malo ma lana amiotonu. Sa faalaeiauina foʻi aʻu e le uso o Melvin Winchester, o se auauna o le sone (lea ua taʻua nei o le ovasia matagaluega).

Sa ou talanoa i a Marion e uiga i oʻu sini. Sa mā talanoa i upu i le Malaki 3:10, o loo faalaeiauina ai i tatou ina ia tofotofo Ieova ma iloa ai pe na te lē sasaa mai faamanuiaga i a i tatou. Sa faalototeleina aʻu i lana tali mai e faapea: “Afai e te manaʻo e paeonia, aua le taofia oe ona o aʻu. E mafai lava ona ou tausia teine a o e paeonia. E lē o tele foʻi ni mea faitino e tatou te manaʻomia.” Ua atoa le 12 tausaga talu ona mā faaipoipo, ma sa ou iloa ai o Marion o se avā tausiaiga e iloa faasoasoa ma le matuā faaeteete. I le faagasologa o tausaga, sa avea ai o ia ma paga e sili ona lelei mo le paeonia, ma o se tasi o auala o lo mā taulau i le 60 tausaga o le auaunaga faataimi atoa, o lona mafaia lea ona mauaina o le lotomalie i nai mea ua maua ma foliga mai ai e pei o loo tele ni mea o iai.

E oʻo ane i le taumāfanafana o le 1941, ina ua mavae le tele o ni masina o talosaga ma le faia o fuafuaga, ua iai sina mā tupe ma Marion na teuina, ma sa mā faatauina ai se taavale toso e 18 futu (5.5 mita) le lapoʻa ina ia mafai ona nonofo ai lo matou aiga. Na ou faamavae mai laʻu galuega ae avea ma paeonia sauatoa i a Iulai 1941, ma ua ou auai ai i le auaunaga faataimi atoa talu mai lava lena taimi. O loʻu tofiga muamua lava, o se oganuu telē toe fai si mamao i le Auala 50 i le va o New Jersey ma St. Louis, i Missouri, i le mea o le a faia ai la matou tauaofiaga i le amataga o Aokuso. Na aauina mai i a te aʻu ia suafa o uso ma o latou tuatusi i le auala o le a matou faigamalaga atu ai, ma sa ou tusi mamao atu foʻi i ai e taʻu atu i a i latou le taimi ou te taunuu atu ai. Pe a matou taunuu atu i le tauaofiaga, sa tatau ona ou saʻilia le matagaluega e gafa ma le auaunaga paeonia ma maua mai ai se isi tofiga.

“O le a Ou Tofotofoina Ieova”

Sa faatumu le uta a la matou tamaʻi taavale toso i lomiga ma ō atu i la matou sauniga mulimuli i Camden e faatofā atu i uso. Talu ai o loo iai sa mā fanau teine laiti e toʻalua e tausia faapea ai ma le leai o se mea e faataunuu i ai pe a uma le tauaofiaga, o a matou fuafuaga la, atonu sa foliga lē mautinoa atu i nisi o uso, ma na faapea mai nisi o i latou: “E lē umi lava se taimi ae tou toe foʻi mai.” Ou te manatua sa ou faapea atu: “Ou te lē o fai atu ou te lē toe foʻi mai. Na fetalai mai Ieova o le a ia tausia aʻu, ma o le a ou tofotofoina la ia Ieova.”

Ina ua mavae le ono sefulu tausaga o paeonia i aai e luasefulu mai Massachusetts e oo i Mississippi, ua mafai ona mā faapea atu, ua sili atu mea na faia e Ieova i le faataunuuina o lana folafolaga. O faamanuiaga na ia liligi mai i a i maʻua ma Marion, ma la mā fanau teine e toʻalua, sa sili mamao atu na i lo o mea na ou faamoemoeina i tuā i le 1941. E aofia ai i na faamanuiaga le auauna faamaoni o la mā fanau teine e toʻalua o ni paeonia i faapotopotoga latalata mai, ma o laʻu fua atu i ai talu ai nei, o le maua lea pe ā ma le selau o atalii ma afafine faaleagaga o loo salalau atu i le talafatai i sasaʻe o le Iunaite Setete. Sa matou suʻesuʻe ma ni tagata se toʻa 52 o ē na tuuina atu o latou ola i a Ieova le Atua, a o Marion e toʻa 48 i latou.

I a Aokuso 1941, na matou ō ai i St. Louis, ma iinā na mā feiloaʻi ai ma le uso o T. J. Sullivan mai le aiga Peteli. Sa i a te ia le tusi o le tofiaina o aʻu (ina ua avea ma Molimau), lea sa ou manaʻomia ina neʻi teʻi ua filifilia aʻu mo le vaegaʻau ona o le faaloloʻi mai o le taua. Sa ou fai atu i le uso o Sullivan, e tutusa lelei lava le tele o taimi o laʻu avā ma oʻu taimi ua faaaluina i le faiva ma ua manaʻo o ia e mā te paeonia faatasi. E ui lava e leʻi faatūina le matagaluega mo le auaunaga paeonia, na tusia ai lava iinā e le uso o Sullivan ia Marion e avea ma paeonia ma fesili mai i a i maʻua: “O fea o le a oulua paeonia ai pe a uma le tauaofiaga?” E mā te leʻi iloa. Na faapea mai o ia: “Ia aua le popole. O le a tou feiloaʻi i le tauaofiaga ma se tasi e sau mai se vaipanoa o loo manaʻomia ai ni paeonia, ona sologa lelei lava lea o mea. E na ona tusi mai lava i a i matou ma faailoa mai le mea o loo tou iai ona matou taʻu atu lea o lo outou tofiga.” O le mea lena na tupu. O le mea na iʻu i ai, o le uso o Jack DeWitt, sa avea muamua ma auauna o le sone, sa ia iloa ni tagata i New Market, i Virginia, o ē sa iai so latou fale mo paeonia sa manaʻomia ai nisi paeonia. O lea, ina ua uma le tauaofiaga sa matou agaʻi atu loa i New Market.

I New Market, sa iai se mea faapitoa mo i matou. Seʻi mate mai po o ai lē isi na sau mai Philadelphia e aufaatasi ma i matou i le galuega paeonia na i lo o Benjamin Ransom! Ioe, o Ben, le tuagane foʻi lea o loʻu tinā. Maʻeu le fiafia i le galulue faatasi ma ia i le faiva mai lea fale i lea fale, i le sili atu lea ma le 25 tausaga talu ona ia totōina fatu o le upu moni i loʻu loto i tuā i Boston! E ui sa fesagaʻi ma vaitaimi o le lē ano mai o tagata, le amusia, ma oo lava i sauāga mai le aiga, ae sa lē taitai ona aveesea ai le alofa o Ben mo Ieova ma le faiva.

Sa matou olioli e nonofo faatasi ai mo le valu masina i le fale o paeonia i New Market. I lena taimi, e aofia ai i mea sa matou aʻoaʻoina ia le auala e faafesuiaʻi ai ia le ofoina atu o lomiga ae maua mai ai moa ma fuāmoa. Ona tofia ai lea o Ben, o i maʻua ma Marion, ma le isi toʻatolu e auauna o ni paeonia faapito i Hanover, i Pennsylvania—o le uluaʻi tofiga lena mai tofiga e ono na tuuina mai i a i matou i Pennsylvania mai le 1942 e oo i le 1945.

Paeonia Faapito i le Taimi o le Taua Lona Lua a le Lalolagi

Sa iai taimi a o faagasolo le Taua Lona Lua a le Lalolagi sa matou fesagaʻi ai ma teteega ona o lo matou tulaga solitū, ae sa leʻi tuulafoaʻia ai i matou e Ieova. I se tasi taimi i Provincetown, i Massachusetts, na gau ai la matou taavale o le Buick, ma sa ou savali ai mo le lua maila (mo ni nai kilomita) e faia se toe asiga i se oganuu o tagata Katoliko e matuā tetee lava. Sa ou pāsia se vaega o ni talavou fia malolosi o ē na latou iloaina aʻu ma amata ona feʻei mai. Sa ou savali faanatinati ma le faamoemoe e lē o tuliloaina mai aʻu e na tagata talavou, ae o loo alamū ane maa i ou taliga. Sa ou oo ma le saogalemu i le fale o le tagata fiafia. Ae o lē ōna le fale, o se sui faaaloalogia o le American Legion, na ia faapea mai: “E faamalie atu, e lē mafai ona ou talia oe i le po nei ona sa galo i a te aʻu e matou te ō i le tifaga i le taulaga.” Na matuā tātāvale loʻu fatu ona sa ou mafaufau i na tagata tauʻai maa o loo i le auala, o loo faatali mai mo aʻu. Ae peitaʻi, sa ou fiafia ina ua faapea mai le alii lea: “Ae ā pe a tatou ō faatasi? E mafai lava ona tatou talanoa atu i le auala.” O lea sa mafai lava ona ou avatu se molimau i a te ia, ma sa mafai foʻi ona ou sopoʻia atu ma le saogalemu lea tulaga lamatia.

Faapaleniina o le Aiga ma le Faiva

Ina ua mavae le taua, sa iai ni o mā tofiga i Virginia, e aofia ai le valu tausaga na mā nonofo ai o ni paeonia faapito ma sauatoa i Charlottesville. E oo ane i le 1956 ua matutua teine ma ua faaipoipo, ma sa mā toe siitia foʻi ma Marion, ma auauna ai o ni paeonia i Harrisonburg, i Virginia, ma avea foʻi o ni paeonia faapito i Lincolnton, i North Carolina.

I le 1966, na tofia ai aʻu i le galuega matagaluega, e faimalaga atu mai i lea faapotopotoga i lea faapotopotoga ma faalaeiauina uso, e pei lava ona faalaeiauina ai aʻu e le Uso o Winchester i tuā i New Jersey i le faagasologa mai o tausaga o le 1930. E lua tausaga na ou auauna ai i le matagaluega o faapotopotoga i Tennessee. Ona toe talosaga mai foʻi lea i a i maʻua ma Marion ina ia toe foʻi atu i le galuega e sili ona pele i a i maʻua, o le paeonia faapito. E mai le 1968 i le 1977, na mā auauna ai o ni paeonia faapito i le itu i saute o le Iunaite Setete, faasolo atu ai i Georgia ma Mississippi.

I Eastman, i Georgia, na tofia ai aʻu e avea ma ovasia o le faapotopotoga (lea ua taʻua i aso nei o le ovasia taʻimua) e sui i a Powell Kirkland, o se uso pele ua matua, o lē sa auauna mo le tele o tausaga e avea o se ovasia matagaluega ae o lea ua faalēlelei lona soifua mālōlōina. Sa ia matuā faaalia mai le talisapaia ma ia lagolagosua mai foʻi. Sa tāua tele lana lagolagosua talu ai sa iai ni feeseeseaʻiga i le faapotopotoga ma sa aafia ai nisi e iloga. Sa agaʻi ina matuā faigatā le mataupu, ma sa tele ni taimi na ou tatalo ai i a Ieova. Na ou manatua ia mau e pei o le Faataoto 3:5, 6 e faapea: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” E ala i le galue malosi ina ia tatalaina pea laina o fesootaʻiga, na mafai ai ona matou autasia le faapotopotoga ma iʻu ai i le lelei mo tagata uma.

E oʻo ane i le 1977 na amata ai ona mā lagona ua fai lava si matutua, ma na toe tofia ai i maʻua i le vaipanoa o Charlottesville, o iinā o loo nonofo ai la mā fanau teine ma o la aiga. Mo le 23 tausaga ua mavae, sa mā olioli ai e galulue i lenei vaipanoa, ma fesoasoani i le amataina o le faapotopotoga o Ruckersville i Virginia, ma i le vaai atu i fanau ma fanau a fanau a i latou na matou uluaʻi suʻesuʻeina le Tusi Paia o tutupu aʻe ma avea o ni toeaina o le faapotopotoga, o ni paeonia, ma ni tagata Peteli. O loo mā mafaia pea ma Marion ona tausisia se faasologa lelei o le auaunaga i le fanua, ma o loo ou maua pea le faaeaga ou te auauna ai ma le sogasogā o se toeaina i le Faapotopotoga i Sasaʻe o Charlottesville, ma faia se suʻesuʻega tautusi, ma fofogaina atu foʻi lauga lautele.

I le faagasologa o tausaga, sa oo mai ai ni faafitauli, e pei lava o tagata uma. Mo se faaaʻoaʻoga, e ui lava i a mā taumafaiga, sa oo ina vaivai faaleagaga ia Doris mo se taimi ina ua tusa ma le 18 ona tausaga ma faaipoipo ai i se tamāloa e lē o se Molimau. Ae sa leʻi lofitūina atoatoa ai lona alofa mo Ieova, ma o lana tama tama o Bill sa auauna mo le 15 tausaga i Peteli i Wallkill, i Niu Ioka. I le taimi nei, ua maliliu uma ia tane a Doris ma Louise, ae o loo la auauna i se vaipanoa e latalata mai ma le olioli i le avea ai o ni paeonia sauatoa.

Ni Lesona na Aʻoaʻoina i le Faagasologa o Tausaga

Sa ou aʻoaʻoina e faatatauina ni nai faatulagaga faigofie ina ia taulau ai i le auaunaga a Ieova: Ia faafaigofie lou olaga. Ia avea ma faaaʻoaʻoga i au feutagaʻiga uma, e aofia ai ma lou lava olaga totino. Ia faatino taʻiala mai “le auauna faamaoni ma le mafaufau” i mea uma lava. —Mataio 24:45.

Ua faia e Marion se lisi puupuu ae uigā o fautuaga ina ia taulau ai i le faia o le auaunaga paeonia a o tausia foʻi le fanau: Ia fai ma ia tausisia se faasologa aogā. Ia avea lau faiva faapaeonia ma galuega moni. Ia taumafa meaʻai paleni. Ia maua se mālōlōga lelei. Aua le mātele i faafiafiaga. Ia fai le upu moni, e aofia ai vala uma o le faiva, ma mea fiafia i olaga o lau fanau. Ia fai le faiva ma mea e fiafia i ai lau fanau i taimi uma lava.

O lea ua taʻi 90 o mā tausaga. Ua onosefulu tausaga ua mavae talu ona mā faalogo i le lauga o lo mā papatisoga i le fanua o le aiga o Stackhouse, ma e 60 tausaga na mā faaaluina i le auaunaga faataimi atoa. Ua mafai ona mā faapea atu ma le faamaoni ma Marion, ua matuā faamalieina atoatoa i maʻua i lo mā tulaga i le olaga. Ou te matuā lotofaafetai mo faalaeiauga na ou maua a o avea o se tamā talavou ina ia faamuamua sini faaleagaga ma ia galue pea i ai, ma ou te lotofaafetai i laʻu avā pele o Marion, ma i laʻu fanau teine mo la laʻua lagolagosua i le tele o tausaga. E ui ina e lē tele ni a matou ʻoa faitino, ae e masani lava ona ou faatatauina le Failauga 2:25 i a te aʻu lava e faapea: “O ai se na te mafaia ona ʻai, o ai foi se na te mafaia ona fai lona loto [inu], e sili ia te au neʻi?”

E moni lava e tusa ai ma lo matou tulaga, e matuā anoanoaʻi taimi ua faataunuuina ai e Ieova lana folafolaga lea o loo i le Malaki 3:10, i a i matou. O le mea moni, ua ia matuā ‘⁠sasaa mai i a i matou faamanuiaga seʻia silisili ona tele’!

[Pusa/Ata i le itulau 29]

MEA O MANATUA MAI TAUSAGA O LE TAUA

I le toetoe lava 60 tausaga talu ona mavae le taua, o loo olaola pea i mafaufau o le aiga atoa na tausaga.

Ua manatua e Doris e faapea: “E iai taimi e matuā mālūlū ai lava ia Pennsylvania.” Ua faaopoopo mai Louise, “Sa matuā tetele lava le mālūlū i le isi pō. O i maʻua ma Doris, sa nofo le tasi i luga o vae o le isi i le nofoa i tua o la matou taavale, e faamāfanafana ai o mā vae mai le mālūlūina.”

Ua faapea mai Doris: “Ae sa leai se faalogona e faapea ua matou matitiva po ua lē tagolima. Sa matou iloa e matou te feoaʻi solo na i lo o le toʻatele o isi tagata, ae sa matou aai lelei pea lava, ma sa mananaia o matou lavalava na aumai mai nisi o a matou uō i Ohio, o ē sa iai a latou fanau teine e matutua teisi atu i a i maʻua, ma sa pei lava o ni mea fou.”

Na faapea mai Louise: “Sa faailoa mai pea e Mama ma Papa lo la alofa ma le talisapaia o i maʻua, ma sa tele le taimi na matou faaaluina faatasi ma i laʻua i le faiva. Sa i a i maʻua le lagona e tāua i maʻua i a i laʻua, ma sa matuā pipii atu lava i ai o mā loto i a i laʻua.”

Sa manatua e Paul e faapea: “Na i ai saʻu taavale o le 1936 Buick Special, ma o na taavale sa masani ona gau soo le uʻamea e fesootaʻi ai uili. Ou te iloa e māfua ona o le malosi tele o le afi o le taavale. E foliga mai e faatitino lava ona tupu o lenei mea i pō e sili ona mālūlū o le masina, ona ou alu foʻi lea i le lotoā e faaputu ai taavale ua lē o toe aogā e aumai ai se isi uʻamea. Na avea aʻu ma se tasi e tomai tele i le suiina o na uʻamea.”

Ua faapea mai Marion: “E lē mafai foʻi ona faagaloina ia pepa e aumai ai meaʻai ma mea sa manaʻomia. O mea uma sa tufatufa mai e faatatau i aiga—o fasi povi, o kesi, o paʻu o taavale, o mea uma lava. O taimi uma lava e maua ai so mā tofiga fou, e mā te ō ai i le komiti i lena nuu ma talosaga mo se pepa e maua mai ai meaʻai ma mea e manaʻomia. E ono alu ni masina faatoʻā maua mai se pepa, ma e foliga mai o taimi uma lava e maua mai ai la mā pepa, ae aauina atu ai loa foʻi ma i maʻua i se isi tofiga, ma toe amata ai foʻi ona toe fai se isi talosaga mo se isi pepa. Ae sa tausia pea i matou e Ieova.”

[Ata]

O i matou ma Marion, ma Doris (agavale) ma Louise, i le 2000

[Ata i le itulau 25]

I maʻua ma loʻu tinā i le 1918, ina ua 11 oʻu tausaga

[Ata i le itulau 26]

I matou ma Louise, Marion, ma Doris i le 1948 ina ua papatisoina ia teine

[Ata i le itulau 26]

Le ata o la mā faaipoipoga i a Oketopa 1928

[Ata i le itulau 26]

O laʻu fanau teine (i le itu agavale ma le itu taumatau) ma aʻu i le Yankee Stadium i le 1955