“Ua Iʻu Ina Ou Iloa Loʻu Faafitauli!”

O LE lagona lenā o se tamāloa i Tokyo ina ua ia faitauina le tala i se mea na tupu i le soifuaga o se tasi tagata o loo faamatalaina i Le Olomatamata o Tesema 1, 2000. O le ulutala o le mataupu e faapea: “E Lē Iloa e Outou se Mea e Tupu a Taeao,” ma o loo faamatala mai ai le mea na tupu i sē na avea muamua ma misionare o lē na mafatia i le maʻi e lauiloa i le faafomaʻi o le faalētonu o le mafaufau po o faalogona (manic-depressive psychosis).

I se tusi na tusi atu e le tamāloa mai Tokyo i ē o loo lomia lenei mekasini, na ia faapea atu ai: “O āuga o loo faamatalaina ai, e matuā fetaui lelei lava ma aʻu. O lea na ou alu ai i se falemaʻi o le mafaufau ma ou iloa ai, ua maua aʻu i le maʻi o le mafatia o le mafaufau. Sa maofa le fomaʻi lea na ia suʻesuʻeina aʻu. Na ia faapea mai, ‘O tagata e maua i le maʻi lea, e seāseā manatu o i latou e mamaʻi.’ Sa ou maua le fesoasoani e iloa ai āuga o le maʻi a o leʻi oo ina tugā.”

E tele auala ua maua ai aogā e le faitau miliona o tagata i le lalolagi aoao mai le faitauina o kopi taʻitasi o lomiga o Le Olomatamata ma lona soa o le mekasini, o le Ala Mai! Ua latou iloa le aogā ma le faamalieina ai i mataupu. Ua lomia nei le mekasini o Le Olomatamata i gagana e 141, ma le Ala Mai! i gagana e 86. O le a e fiafia foʻi pe a e faitauina e lē aunoa Le Olomatamata ma le Ala Mai!