Fesili Mai le ʻAufaitau

Na faapefea ona faatulaga amo mo le aveina o le atolaau o le feagaiga, talu ai o loo taʻua i le 1 Tupu 8:8 sa iloa atu mai le Mea Paia?

Ina ua tuu atu e Ieova iā Mose i le vao le ata mo le fale fetafaʻi, sa avea le atolaau o le feagaiga ma se tasi o vaega autū. I lenei pusa e lē tutusa le umi ma le lautele ae ufiufi i le auro, sa iai papa maa o le Tulafono ma isi mea. Sa teuina le atolaau i le potu tuloto, i le Mea e Sili Ona Paia. Na iai i le ufiufi o le Atolaau ni kerupi auro se lua o loo fālō o la apaʻau. Ina ia mafai ona tauaveina, sa iai i itu taʻitasi o le Atolaau ni mama e sulu i ai amo e lua na faia i le laau o le setima ma e sausau atoa i le auro. O lona uiga, na sulu atu amo i mama i itu uumi o le Atolaau. O lea, a o iai le Atolaau i lona tulaga i totonu o le Mea e Sili Ona Paia o le fale fetafaʻi lea na faasaga i le itu i sasaʻe, o ona amo la sa faalalava agaʻi i le itu i mātū ma saute. Na faapena foʻi le tulaga a o iai le Atolaau i le malumalu na fausia e Solomona.—Esoto 25:10-22; 37:4-9; 40:17-21.a

Na iai se ie e vavae ese ai le Mea e Sili Ona Paia mai le Mea Paia (le potu i luma mai). Sa leʻi mafai i faitaulaga i le Mea Paia ona vaai atu i totonu o le Mea e Sili Ona Paia ma iloa atu le Atolaau, lea sa faaataina ai le faatasi mai o le Atua. (Eperu 9:1-7) O lea, atonu e iai se fenuminumiaʻi i le mea o loo taʻua i le 1 Tupu 8:8: “Ua latou tosina mai amo, ua iloa foi pito amo i le mea paia i luma o le mea e fetalai mai ai; a e lei iloa i fafo.” O le manatu lava lea e tasi i le 2 Nofoaiga a Tupu 5:9. Pe sa faapefea ona iloa atu e se tagata nei amo mai le Mea Paia o le malumalu?

Sa manatu nisi na papaʻi amo i le ie, lea na vaaia le patupatu mai. Ae e lē o lea le tulaga pe afai o loo faalalava amo agaʻi i mātū ma saute, ma o loo tatau agaʻi i ai le ie. (Numera 3:38) O loo iai se isi faamatalaga e sili atu ona fetaui. Sa ono vaaia ia amo pe a iai se avanoa itiiti i le va o le ie ma le puipui o le malumalu, po o le taimi e ulu atu ai le faitaulaga sili i le Mea e Sili Ona Paia. Na punitia e le ie le iloa atu o le Atolaau lava ia, ae atonu sa iloa atu i le avanoa ia pito amo ia e lālā mai i autafa taʻitasi o le Atolaau. E ui atonu o le tulaga lenei sa iai, ae e lē o se mea e tatau ona tatou pipii maumaututū i ai.

E manino lava le anoanoaʻi o faamatalaga auʻiliʻili e tatou te leʻi iloaina . Sa taʻua e le aposetolo o Paulo nisi o ona vala i lana tusi i le ʻau Eperu. Ona ia faapea mai lea: “O mea ia e le mafai ona talatala taitasi atu ai nei.” (Eperu 9:5) O le toetutū mai i le lumanaʻi o ē faamaoni o le a maua ai le avanoa faagaee loto e aʻoaʻo ai mai tane e pei o Mose, Arona, Pesaleli, ma isi o ē na masani lelei i le fausaga ma galuega e faia i le fale fetafaʻi.—Esoto 36:1.

[Faamatalaga pito i lalo]