Fesili Mai le ʻAufaitau

Pe na faasauā Tavita, o se tasi ua finagalo malie i ai le Atua, i tagata na ia ave faatagataotaua, e pei ona manatu i ai nisi i le 2 Samuelu 12:31 ma le 1 Nofoaiga a Tupu 20:3?

E leai. Na faasala e Tavita i galuega mamafa tagata o sa Amonī ia na ave faatagataotaua. Ua faauiga sesē e nisi gaoioiga a Tavita, talu ai o le auala ua faaliliuina ai e nisi faaliliuga o le Tusi Paia nei fuaiupu.

E tusa ai ma na faaliliuga o le Tusi Paia ua faaalia ai, sa sauā Tavita i tagata sa Amonī. O se faaaʻoaʻoga, ua faapea mai le 2 Samuelu 12:31 i le King James Version: “A o le nuu sa i ai ua ia taʻitaʻi atu i latou, ma tuu atu i lalo i ʻili, ma tui uʻamea, ma toʻi uʻamea, ma na tuu atu i latou e tunu i maaomea; ua faapea ona fai e ia i aai uma o le fanauga a Amoni.” Ua faaliliuina foʻi faapena le tala i le 1 Nofoaiga a Tupu 20:3.

Ae peitaʻi, e pei ona mātauina e se tagata poto o le Tusi Paia e suafa iā Samuel Rolles Driver, o faiga sauā “e ese mai mea ua tatou iloa e faatatau iā Tavita ma ona uiga.” O lea, ua taʻua i le The Anchor Bible: “Sa faatulaga e Tavita le ʻaufaigaluega na ave faatagataotaua e galulue, ina ia maua le tamaoaiga mai le nuu na ia faatoʻilaloina, ma e foliga mai o se faiga e masani ai mo se tupu e manumalo.” E faapena foʻi le manatu o Adam Clarke: “O lona uiga, na faia e Tavita tagata e pei o ni pologa, taʻitaʻiina atu i latou ma faafaigaluega i ʻili, suatia po o le elia o lua, . . . ma tuu i lalo laau ma faia piliki. E lē o uiga le mau i le vaeluaina i ʻili po o le poipoi o tagata, auā e leʻi faia e Tavita se mea faapena i tagata Amonī.”

O le manatunatu i nei malamalamaaga saʻo aʻiaʻi, ua faamanino mai ai e le tele o faaliliuga i aso nei, e lē tatau ona tuuaʻia Tavita i le faileagaina o tagata.a Ia mātau le faaliliuga o le New English Translation (2003): “Na ia taʻitaʻi atu tagata sa iai, ma tuu atu i latou i galuega mamafa i ʻili, piki uʻamea, toʻi uʻamea, ma tuu atu i latou e galulue i le faia o piliki. O lana fuafuaga lea i aai uma o le fanauga a Amonī.” (2 Samuelu 12:31) “Na ia ave tagata o le aai ma faafaigaluega i ʻili, piki uʻamea, ma toʻi. Na faia e Tavita lenei mea i aai uma o le fanauga a Amonī.” (1 Nofoaiga a Tupu 20:3) O le faaliliuga i le New World Translation e ioe foʻi i ai tagata atamamai: “A o le nuu sa iai ua ia taʻitaʻi atu i latou, ma faafaigaluega i le ʻiliina o maa, ma tui uʻamea maamaʻai, toʻi uʻamea, ma tuu atu i latou e faia piliki.” (2 Samuelu 12:31) “Ua ia taʻitaʻiina atu tagata sa i ai, ma faafaigaluega i latou i le ʻiliina o maa, tui uʻamea maamaʻai, ma toʻi. Sa faapea ona faia e Tavita i aai uma o le fanauga a Amoni.”—1 Nofoaiga a Tupu 20:3.

E leʻi faia e Tavita ni faiga sauā ma ni fasiotiga mataʻutia i le fanauga a Amonī lea na faatoʻilaloina. E leʻi faataʻitaʻi o ia i faiga lē alofa ia sa faia i ona aso.

[Faamatalaga pito i lalo]