Ia Mafuta Atu i le Atua
O Lē na te Toe Faafoʻisia le Ola
PO O ua maliu se tasi e pele iā te oe? Afai ua tupu lenā mea, ua e oo la i se tulaga e sili ona tigā. E malamalama Lē na Faia mea uma i lou faavauvau. E lē gata i lea, e na te mafai foʻi ona aveesea le oti. Ua tusia i le Tusi Paia faamatalaga e faatatau i ē na toe faatutūina, ua faaalia ai e lē gata o ia o le Puna o le ola ae o ia foʻi Lē na te toe faafoʻisia mai le ola. Seʻi o tatou iloiloina se tasi o toetū na faatinoina e lona Alo o Iesu Keriso, ona o le mana na ia tuuina iā te ia. O loo tusia le tala o lenā vavega i le Luka 7:11-15.
O le tausaga e 31 T.A., na malaga atu ai Iesu i se aai i Kalilaia, o Naina. (Fuaiupu e 11) Atonu na ia taunuu i le taufaasiʻusiʻuga o le aai a o lata ina afiafi. O loo faapea mai le Tusi Paia: “A o latalata atu o ia i le faitotoʻa o le aai, seʻi vaai foʻi, o loo fata mai se tagata ua oti, o le tama e toʻatasi a lona tinā. O ia foʻi o se fafine ua oti lana tane. O loo faatasi o ia ma tagata e toʻatele mai le aai.” (Fuaiupu e 12) Pe mafai ona e faaata i lou mafaufau le faanoanoa o lenā fafine ua oti lana tane? Ua lē toe iai se isi e tausia ma puipuia le fafine, ona o lea ua oti si ana tama tama.
Na uaʻi atu Iesu i lenei tinā faavauvau, o lē na savali i autafa o le fata o loo amoina ai le tino maliu o si ana tama. Na faapea mai le tala: “Ua silasila atu le Alii iā te ia, ona tigā alofa ai lea o ia i le fafine ma fetalai atu: ‘Aua e te tagi.’” (Fuaiupu e 13) Na matuā ootia Iesu ona o le faanoanoa o lenā fafine ua oti lana tane. Atonu o loo manatu Iesu i lona tinā, masalo o le taimi lea ua maliu lana tane o Iosefa, ma o le a toeitiiti foʻi toe faavauvau Maria ona o le a maliu foʻi o ia.
Na faalatalata atu Iesu, ae leʻi faapea ina ia auai i lenā solo. Ina ia faaalia atu lana pule, na ia “paʻi atu i le fata,” ma ia taofia ai le solo a tagata. I le leo o se tasi ua tuuina i ai le pule i le oti, na ia faapea atu: “‘Le tauleʻaleʻa e, ou te fai atu iā te oe, tū ia i luga!’ Ua tū i luga lē na oti ma amata ona tautala, ona ia avatu lea o ia i lona tinā.” (Fuaiupu e 14, 15) I le taimi na oti ai le tama, na lē toe avea ai i laʻua o se aiga. Ae ina ua “avatu” e Iesu o ia i lona tinā, na toe faatasia i laʻua o se aiga. Na suia le tulaga faavauvau o lenei fafine ua oti lana tane, i lona olioli tele.
Po o e moomoo i lenā ituaiga o olioli, o le toe faatasia lea ma ē pele ua maliliu? Ia e mautinoa o loo tigā alofa mai le Atua iā te oe. Ua atagia mai i faalogona ootia o Iesu mo lenā fafine ua oti lana tane, le alofa mutimutivale o le Atua, auā na atoatoa lelei le auala na faataʻitaʻi ai e Iesu uiga o lona Tamā. (Ioane 14:9) O loo tatou aʻoaʻoina mai le Tusi Paia, e naunau le Atua e toe faatutūina ē ua maliliu, o ē o loo ia manatua pea. (Iopu 14:14, 15) O loo i le Tusi Paia se faamoemoe matagofie, lea e mafai ona ola ai i se lalolagi parataiso, ma molimauina ai le toe faatutūina aʻe o ē pele iā i tatou. (Luka 23:43; Ioane 5:28, 29) Aiseā e te lē aʻoaʻo atili ai e faatatau i Lē na te toe faafoʻisiaina mai le ola, ma avea ai lenā faamoemoe ma ou faamoemoega?
[Ata i le itulau 23]
“Ua tū i luga lē na oti ma amata ona tautala, ona ia avatu lea o ia i lona tinā”