Ua Taumafai le Vatikana e Aveesea le Faaaogāina o le Suafa o le Atua

UA TAUMAFAI tagata maualuluga o le lotu Katoliko e aveesea le faaaogāina o le suafa o le Atua i a latou sauniga faalotu. I le tausaga ua teʻa, na avatu ai e le faapotopotoga a le Vatikana e taʻu o le Congregation for Divine Worship and the Discipline of the Sacraments ni faatonuga e uiga i lenei mataupu, i se fono a epikopō Katoliko i le lalolagi atoa. O lenei gaoioiga sa faia i lalo o le taʻitaʻiga a le pope.

I lenā tusi sa tusia iā Iuni 29, 2008, o loo faitioina malosi ai le mea moni e faapea, e ui lava i na faatonuga ae “i tausaga talu ai nei, na sosolo mālie mai ai le faaaogāina o le suafa moni o le Atua o Isaraelu, lea e tele ina iloa e tagata o le tetakalamatone, lea e tusia i konesane e fā faa-Eperu o le יהוה, YHWH.” Na taʻua i le tusi e eseese auala ua faaliliu i ai le suafa o le Atua, o “Yahweh,” “Yahwè,” “Jahweh,” “Jahwè,” “Jave,” “Yehovah,” ma le tele o isi faaliliuga.a Peitaʻi, sa taumafai le Vatikana e toe faamausalī le tulaga e pei ona sa iai le Katoliko. O lona uiga, ia suia le Tetakalamatone i le upu “Alii.” E lē gata i lea, i sauniga faalotu a le Katoliko, o pese, ma tatalo, ua “lē o toe faaaogāina ai pe toe taʻua ai le YHWH” le suafa o le Atua.

Ina ia lagolagoina lea tulaga, na sii mai e le Vatikana ia “faamaumauga i aso anamua” faa-Katoliko. Na latou faapea mai e oo lava i le faaliliuga faa-Eleni o Tusitusiga Eperu po o le Septuagint, lea na tusia a o leʻi oo i taimi o Kerisiano, sa tele ina taʻua le suafa o le Atua i le Kyʹri·os, o le upu Eleni mo le “Alii.” O lea na latou manatu ai, “e leʻi faaleoina foʻi e Kerisiano mai le amataga le suafa o le Atua i le tetakalamatone.” Peitaʻi, ua lē amanaʻia e lenei manatu le faamaoniga manino, e faatatau i le faaaogāina o le suafa o le Atua. O loo maua i uluaʻi kopi o le Septuagint le suafa o le Atua o le יהוה ae lē o le Kyʹri·os. Sa iloa lelei ma faaleo e soo o Keriso i le uluaʻi senituri le suafa o le Atua. Sa taʻua e Iesu i lana tatalo i lona Tamā: “Ua ou faailoa atu lou suafa iā i latou.” (Ioane 17:26) Ma ua aʻoaʻoina i tatou e Iesu i lana tatalo faaaʻoaʻo ina ia tatalo e faapea: “Lo matou Tamā e o i le lagi, ia faapaiaina lou suafa.”—Mataio 6:9.

E tatau ona faanaunau Kerisiano uma ina ia faapaiaina le suafa o le Atua. O taumafaiga a le Vatikana e aveesea le suafa o le Atua, ua lē faamamaluina ai Ieova, o lē na fetalai: “O loʻu igoa lenā e faavavau, o laʻu faamanatuga lenā i lea tupulaga ma lea tupulaga.”—Esoto 3:15, The Jerusalem Bible.

[Faaopoopoga i lalo]

[Faamatalaga faaopoopo i le itulau 30]

“O loʻu igoa lenā e faavavau.”—Esoto 3:15, JB

[Ata i le itulau 30]

O se vaega o le “Septuagint” lea na tusia i le senituri muamua T.A. O le suafa o le Atua lenā e liʻo, ua tusia i mataʻitusi Eperu e fā, lea e masani ona faaliliuina i le YHWH

[Ē Ana le Ata]

Courtesy of the Egypt Exploration Society