Pe e Iai se Suafa o le Atua?

Tali a le Tusi Paia

E tofu uma tagata ma igoa. Pe e lē tatau foʻi la ona iai se suafa o le Atua? O le iai ma le faaaogāina o igoa o tagata o se vala tāua mo faauōga. Pe e iai se eseesega mai la tatou faauōga ma le Atua?

I le Tusi Paia ua faapea mai le Atua: “O aʻu o Ieova. O loʻu igoa lea.” (Isaia 42:8) E ui e tele ona faalupega e pei o “le Atua o Lē e ona le malosi uma lava,” “le Alii Pule Silisili Ese” ma ‘Lē na foafoaina mea,’ ae ua ia faamamaluina ona tagata tapuaʻi e ala i le valaaulia o i latou e faaaogā lona suafa pe a talanoa atu iā te ia.—Kenese 17:1; Galuega 4:24; 1 Peteru 4:19.

O le tele o faaliliuga o le Tusi Paia o loo iai le suafa o le Atua i le Esoto 6:3. Ua faapea mai lenā mau: “Na iloa aʻu e Aperaamo, Isaako ma Iakopo, o le Atua o Lē e ona le malosi uma lava, ae ou te leʻi matuā faailoa atu aʻu iā te i latou e tusa ma loʻu igoa o Ieova.”

O Ieova o le faaliliuga faa-Peretania lea o le suafa o le Atua ua faaaogā mo le tele o senituri. E ui o le toʻatele o le ʻaufaitofā e latou te faaaogā le “Yahweh,” ae o Ieova o le suafa lea ua iloa e le toʻatele. E leʻi tusia le vaega muamua o le Tusi Paia i le faa-Peretania ae na tusia i le faa-Eperu, o se gagana e faitau mai i le itu taumatau agaʻi i le itu tauagavale. I lenā gagana, ua faailoa mai ai le suafa o le Atua i konesane e fā, יהוה. O mataʻitusi Eperu nei e fā, ua faaliliuina i le YHWH, e masani ona taʻua o le Tetakalamatone.