Ua Fesili Mai le ʻAufaitau . . .

Pe e Tutusa le Avanoa e Maua e Tagata Uma e Iloa ai le Atua?

▪“Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mataio 22:37) O le fetalaiga lenā a Iesu ina ua fesiligia po o lē fea poloaʻiga e sili. Peitaʻi, e manaʻomia ona maua e tagata le poto saʻo e uiga i le Atua ona mafai lea ona alolofa iā te Ia. (Ioane 17:3) Pe e tutusa le avanoa e maua e tagata uma ina ia maua ai lea poto?

O le puna autū o le poto e uiga i le Atua, o le Tusi Paia. (2 Timoteo 3:16) E toʻatele tagata e mau i nuu e toetoe lava tofu tagata ma le Tusi Paia. Atonu o loo ofo atu pea iā i latou le avanoa e maua ai le poto saʻo e uiga i le Atua e ala i se suʻesuʻega faale-Tusi Paia. (Mataio 28:19) O isi na ola mai i mātua alolofa Kerisiano sa aʻoaʻoina e lē aunoa i latou e uiga i le Atua.—Teuteronome 6:6, 7; Efeso 6:4.

Ae o loo iai nisi e lē o maua ni avanoa faapena. O nisi e tupuga mai aiga sauā e lē alolofa mātua. (2 Timoteo 3:1-5) E matuā faigatā i ē e soifua mai i na siʻomaga ona manatu e faapea, o le Atua o se Tamā alofa o i le lagi. O le toʻatele e leʻi lelei ni aʻoga, ma ua faigatā ai iā i latou ona faitau le Tusi Paia. A o isi, ua faatauasoina o latou manatu i aʻoaʻoga sesē a lotu, pe ola i aiga, nuu, ma atunuu e lē taliaina ai le upu moni o le Tusi Paia. (2 Korinito 4:4) Po o lona uiga la, ua avea tulaga o nei tagata ma mea e latou te lē maua ai se avanoa e iloa le Atua ma alolofa iā te ia?

Na taʻua e Iesu, e faigatā i nisi tagata ona alolofa ma usiusitaʻi i le Atua ona o luʻitau e latou te feagai. (Mataio 19:23, 24) E ui i lea, na faamanatu atu e Iesu i ona soo e oo lava i toʻatugā e pei ni mauga, “e mafaia e le Atua mea uma lava.”—Mataio 19:25, 26.

Seʻi manatu i le mea moni lenei: Ua faamautinoa e Ieova, ia toʻatele i latou e oo atu i ai lana Afioga le Tusi Paia i so o se taimi. Na valoia e le Tusi Paia o le a talaʻia “i le lalolagi atoa” le tala lelei e uiga i le Atua ma lona finagalo mo le lalolagi. (Mataio 24:14) O loo talaʻia e Molimau a Ieova i aso nei lea tala lelei i le silia ma le 230 atunuu, ma fai lomiga faale-Tusi Paia i gagana e 500. E oo i ē e lē maua se Tusi Paia, e tele mea e mafai ona latou aʻoaʻoina e uiga i le Atua e ala i le mātauina o mea na ia faia.—Roma 1:20.

E lē gata i lea, ua taʻua i le Afioga a le Atua: “E suʻesuʻe e Ieova loto uma lava, e silafia foʻi e ia o mafaufauga ma faanaunauga uma. Afai e te saʻili iā te ia ona e maua lea o ia.” (1 Nofoaiga a Tupu 28:9) O lea, e ui e lē o folafola mai e Ieova e tutusa le avanoa e maua e tagata uma, ae e faamautinoa e Ia ua maua e i latou uma e loto faamaoni se avanoa e iloa ai o ia. O le a Ia faamautinoa foʻi, e maua se avanoa e i latou e leʻi maua lava le avanoa, e ala i le toe faatutūina mai i le lalolagi fou amiotonu.—Galuega 24:15.