E te Silafia?
O le ā na manatu i ai Paulo ina ua ia taʻua le “solo o le manumalo”?
▪ Na tusi Paulo, o le ‘Atua o lē na te taʻitaʻia i tatou i le solo o le manumalo faatasi ma Keriso, ma o lē foʻi ua faaalia mai le manogi o le poto iā te ia i mea uma, e ala iā i tatou! Auā o i tatou o le manogi lelei o Keriso i le Atua, i ē o le a faaolaina ma i latou o le a faaumatia; o ē o le a faaumatia e oo i ai le manogi o le oti e iʻu ai i le oti, a o ē o le a faaolaina e oo i ai le manogi o le ola e iʻu ai i le ola.’—2 Korinito 2:14-16.
O loo faasino upu a le aposetolo i le masani a tagata Roma o le faia lea o se solo o le manumalo, e faaeaea ai se taʻitaʻiʻau ua manumalo i fili o le Malo. I tulaga faapena, e faaali ai le vete o le taua faapea ma pagota, ma ave povi poʻa e fai ai taulaga a o viiviia e tagata lautele le taʻitaʻiʻau manumalo ma ana fitafita. I le faaiʻuga o le solo, e faaaogā povi fai ai taulaga ma atonu na faasala ai i le oti le toʻatele o pagota.
O loo taʻua i le International Standard Bible Encyclopedia, o le faaupuga o le “manogi lelei o Keriso,” o loo faaatagia ai le faaolaina o isi a o le oti o isi, “atonu e pogai mai i le masani a tagata Roma, o le faamū o mea manogi i le auala o loo alu ai le solo. Ua faailogaina i lea manogi le manumalo i ē ua manumalo, ae faamanatu ai i ē ua faapagotaina le faasalaga oti o le a oo iā i latou.”a
O ā “mea maualuluga” e masani ona taʻua i Tusi Paia Eperu?
▪ Ina ua sauni Isaraelu e ulu atu i le Nuu o le Folafolaga, na fetalai Ieova iā i latou e aveese mea uma o fai ai tapuaʻiga a tagata Kanana o loo iai i le nuu. Na poloaʻi atu le Atua: “Ia outou . . . nutipalaina a latou faatagata maa, ia nutipalaina a latou tupua uʻamea, ia nutipalaina foʻi ma a latou mea maualuluga paia.” (Numera 33:52) Atonu o na nofoaga autū o tapuaʻiga sesē, a lē i aʻega maualuluga, o ni pa maa sa fausia i isi vaega, i lalo o laau po o aai. (1 Tupu 14:23; 2 Tupu 17:29; Esekielu 6:3) Masalo sa iai ni fata faitaulaga, poutū ma pou paia, faatusa, fata e faamū ai mea manogi, ma isi mea sa faaaogā mo taulaga.
A o leʻi fausia le malumalu i Ierusalema, sa tapuaʻi tagata Isaraelu iā Ieova i nofoaga sa Ia faamaonia, e taʻu o mea maualuluga. Na ofoina atu e le perofeta a le Atua o Samuelu taulaga i “le mea maualuga” i se aai e lē o iloa le igoa i le nuu o Sufi. (1 Samuelu 9:11-14) Ina ua fausia le malumalu, e toʻatele tupu sa faamaoni iā Ieova na taumafai e aveese na “mea maualuluga.”—2 Tupu 21:3; 23:5-8, 15-20; 2 Nofoaiga a Tupu 17:1, 6.
[Faaopoopoga i lalo]
a E maua i le Watchtower, Novema 15, 1990, itulau e 27 le uiga faaleagaga o le talafaatusa a Paulo.
[Ata i le itulau 23]
Se vaega o se ata vane o le solo manumalo a Roma, senituri lona lua T.A.
[Ē Ana le Ata]
Photograph taken by courtesy of the British Museum
[Ata i le itulau 23]
O toega o pou paia, i Kasera