Tatalo

6 Pe e Aogā le Tatalo?

PE E aogā iā i tatou le tatalo? Ua faaalia i le Tusi Paia e aogā moni lava i auauna faamaoni a le Atua a latou tatalo. (Luka 22:40; Iakopo 5:13) E aogā iā i tatou i le itu faaleagaga, tau faalogona ma le faaletino. E faapefea?

Seʻi faapea ua maua e sau tama se meaalofa. Po o le a e fai atu iā te ia e tau lava ina lagona le lotofaafetai? Pe e te fai atu i ai e faailoa atu lona lotofaafetai? Pe a tatou taʻu atu ni lagona o loo i o tatou loto, e tatou te faamatilatila atu ma faamalosia na faalogona. Po o le tulaga foʻi lenā pe a tatou talanoa atu i le Atua? Ioe! Seʻi manatu i ni faaaʻoaʻoga.

Tatalo faafetai. Pe a tatou faafetai atu i le Atua mo mea lelei ua tatou maua, e tatou te taulaʻi atu i faamanuiaga. O le iʻuga, atonu e atili ai ona tatou lotofaafetai, fiafia ma mafaufau i mea lelei.—Filipi 4:6.

Faaaʻoaʻoga: Na lotofaafetai atu Iesu i lona Tamā ona o le faafofogaina ma talia o ana tatalo.—Ioane 11:41.

Tatalo mo le faamagaloga. Pe a talosaga atu mo le faamagaloga, e tatou te faamalosia o tatou lotofuatiaifo, matuā salamō, ma iloa atili le matuiā o le agasala. E tatou te maua foʻi le mapusaga mai i le lagona nofosala.

Faaaʻoaʻoga: Na tatalo Tavita e faaalia ai le salamō ma le faanoanoa.—Salamo 51.

Tatalo mo le taʻitaʻiga ma le atamai. O le tatalo atu iā Ieova mo le taʻitaʻiga ma le atamai e faia ai ni faaiʻuga lelei, e fesoasoani iā i tatou e lotomaulalo ai. E tatou te manatua ai e gata mai mea e tatou te mafaia, ma fesoasoani foʻi e faalagolago atu ai i lo tatou Tamā i le lagi.—Faataoto 3:5, 6.

Faaaʻoaʻoga: Na tatalo atu ma le lotomaulalo Solomona mo le taʻitaʻiga ma le atamai ina ia pulea ai Isaraelu.—1 Tupu 3:5-12.

Tatalo ona o puapuaga. Pe a tatalo atu i le Atua i taimi e popolevale ai, o le a toʻafilemu o tatou loto ma faalagolago atu iā Ieova nai lo o i tatou lava.—Salamo 62:8.

Faaaʻoaʻoga: Na tatalo le tupu o Asa ina ua fesagaʻi ma se fili e sili ona leaga.—2 Nofoaiga a Tupu 14:11.

Tatalo mo isi o loo manaʻomia se fesoasoani. E aogā na tatalo e tatou te ʻalofia ai le manatu faapito, ma atili ai ona faaalia le alofa ma le tigāalofa.

Faaaʻoaʻoga: Sa tatalo Iesu mo ona soo.—Ioane 17:9-17.

Tatalo o viiga. Pe a tatou viiviia Ieova ona o ana galuega ma uiga matagofie, o le a atili ai ona tatou faaaloalo ma talisapaia o ia. O na tatalo o le a tatou mafuta vavalalata atu ai foʻi i lo tatou Atua ma le Tamā.

Faaaʻoaʻoga: Na viiviia e Tavita le Atua ona o lana foafoaga.—Salamo 8.

O se isi faamanuiaga e maua pe a tatalo, o “le filemu mai i le Atua, e silisili i mea uma lava e manatu i ai.” (Filipi 4:7) O le mauaina o le filemu, o se faamanuiaga e lē laumaua i lenei lalolagi vevesi. E iai foʻi aogā i le itu faaletino. (Faataoto 14:30) Pe e maua ona o ni a tatou lava taumafaiga? Pe e aofia ai se isi mea e sili atu ona tāua?

[Faamatalaga faaopoopo i le itulau 10]

E tele aogā e maua ona o le tatalo—e aogā i le itu faaletino, tau faalogona, ae sili ai o le itu faaleagaga