O Auala e Fiafia ai le Aiga

Ia Toe Atiaʻe le Maufaatuatuaina

Stevea: “Sa ou lē mafaufauina o le a mulilua Jodi, ma ou te leʻi toe talitonu iā te ia. E lē mafai e upu ona faamatala le faigatā ona ou faamagalo iā te ia.”

Jodi: “Sa ou malamalama i le māfuaaga na lē toe talitonuina ai aʻu e Steve. E tele tausaga o ou taumafai e faamaonia atu ua ou salamō.”

UA TUU mai e le Tusi Paia i le paaga e leʻi mulilua, e filifili pe e teteʻa pe leai.b (Mataio 19:9) O Steve lea na taʻua, sa filifili o ia e lē teteʻa. Sa tonu iā i laʻua ma Jodi, e lē tatalaina la la faaipoipoga. Na la iloa mulimuli ane, e iai se isi mea e sili atu nai lo o le tau ina nonofo faatasi. Aiseā? E pei ona taʻua i o la manatu, o le lē faamaoni o Jodi na māfua ai ona lē toe faatuatuaina e le tasi le isi. Peitaʻi, ona e tāua tele le faatuatuaina e le tasi o le isi ina ia fiafia ai se faaipoipoga, o lea sa tatau ai ona la galulue faatasi ina ia atiaʻe lenā uiga.

Afai o loo lua taumafai ma lau paaga ina ia faasaoina le lua faaipoipoga, ona ua faia e se tasi se agasala matuiā e pei o le mulilua, e mautinoa e te fesagaʻia ni luʻi faigatā. O masina mulimuli ane talu ona e iloa le mea ua tupu, o taimi na e sili ona faigatā iā te oe. Ae e mafai lava ona e taulau manuia! E faapefea ona e toe atiaʻe le maufaatuatuaina? E mafai ona fesoasoani le atamai o loo maua i le Tusi Paia. Seʻi iloilo vala e fā o loo mulimuli mai.

1 Ia Faamaoni le Tasi i le Isi. Na tusi le aposetolo o Paulo, “ona ua outou tuu ese le pepelo, ia taʻitasi outou ma tautala i le mea moni.” (Efeso 4:25) O le pepelo, le lē tautala saʻo, ma le lē tautala, e mou atu ai le maufaatuatuaina. O lea, e tatau ona e talanoa saʻo atu ma ia faamaoni le tasi i le isi.

Atonu i le taimi muamua, e te lua lē mananaʻo ai ma lau paaga e talanoaina le mea na tupu. Ae a o faagasolo taimi, e manaʻomia lava ona lua talanoa saʻo e faatatau i le faafitauli. Atonu e te filifili ina ia lē auʻiliʻilia mea uma na tutupu, ae e lē o se mea atamai foʻi le ʻalofia o le talanoaina o le mataupu. Ua faapea mai Jodi e pei ona taʻua i luga: “I le taimi muamua, sa ou manatu o se mea faigatā ma e lē logolelei le talanoa i le mataupu. O se mea na matuā ou salamo ai, ma na ou lē toe manaʻo e manatuaina.” Peitaʻi, o le lē talanoa e uiga i le mataupu na faateteleina ai faafitauli. Aiseā? Na faapea mai Steve: “O le musu o Jodi e talanoa i lona lē faamaoni, na māfua ai ona tumau loʻu masalosalo.” Pe a toe mafaufau i le taimi ua teʻa, na faailoa mai e Jodi: “O le lē talanoa i le faafitauli ma laʻu tane, na faafaigatā ai ona toe faaleleia faalogona.”

E mautinoa lava, o so o se talanoaga e faatatau i le lē faamaoni, e iʻu i ni faalogona tigā. Ina ua mulilua Paulo ma lana failautusi, na faapea mai lana avā o Debbie: “E tele ni fesili na oso aʻe i loʻu mafaufau. E faapefea? Aiseā? Ma o ā mea na la talanoa i ai? Ua tumu aʻu i le loto mafatia, ma a o faagasolo aso, e matuā aafia oʻu faalogona pe a ou mafaufau i le mea na tupu.” Na faapea mai Paulo: “O le mea moni, o isi taimi e ma te finau ai ma Debbie pe a ma talanoa. Ae e mulimuli ane toe faatoese le tasi i le isi. O na talanoaga faamaoni, na fesoasoani e toe māfana ai la ma faiā.”

E faapefea ona faagalo faalogona tigā pe a talanoaina na ituaiga o mataupu? Ia manatua, o lou sini autū e lē o le faasala o lau paaga, ae ia aʻoaʻoina se mea aogā mai i le mea sesē na tupu, ma faamalosia la oulua faaipoipoga. O se faataʻitaʻiga, na toe iloilo e Chul Soo ma lana avā o Mi Young le la mafutaga, talu ai le lē faamaoni o Chul Soo. Na faapea mai Chul Soo: “Sa ou iloa ai o loo alu le tele o loʻu taimi i mea e patino iā te aʻu, ma faia mea e faafiafia ma mananaʻo ai isi. O le iʻuga, ua itiiti ai le taimi ma te faatasi ai ma laʻu avā.” Na fesoasoani lenei iloiloga iā Chul Soo ma Mi Young ina ia faia ni suiga, lea na faamalosia ai la la faaipoipoga a o faagasolo taimi.

FAATAʻITAʻI LE MEA LENEI: Afai o oe lea sa lē faamaoni, ia taumafai e ʻalofia le faia o faamolemolega po o le tuuaʻia o lau paaga. Ia e amanaʻia le mea moni o oe e sesē, ma lagona tigā ia ua e faapogaia. Ae afai o oe lea sa faamaoni, ʻalofia le ʻeʻē atu pe faia ni upu masoā i lau paaga. Pe a e ʻalofia lea ituaiga o gagana, o le a fesoasoani lea i lau paaga ina ia talanoa saʻo mai ai.—Efeso 4:32.

2 Ia Galulue Faatasi. Ua faapea mai le Tusi Paia: “E sili ona lelei o le toʻalua nai lo o le toʻatasi.” Aiseā? “Auā ua iā te i laʻua le taui lelei o la laʻua galuega mamafa. Auā afai e paʻū le tasi, e toe faatūina o ia e lē la te toʻalua.” (Failauga 4:9, 10) E iloa le moni o lenā mataupu silisili, pe afai o loo e galue mamafa e toe atiaʻe le maufaatuatuaina.

O le galulue faatasi ma lau paaga, e mafai ai ona toe atiaʻe le maufaatuatuaina i le lua faiā. Peitaʻi, e tatau iā te oulua uma ona maumauaʻi ina ia faasao le lua faaipoipoga. Ae afai e te taumafai e foʻia na o oe le faafitauli, e mautinoa o le a atili ai ona tele isi faafitauli. E manaʻomia ona vaai le tasi i le isi, o sē e lua te galulue faatasi.

O le mea lenā na fai e Steve ma Jodi. Na faapea mai Jodi: “E umi se taimi o ma taumafai, ae sa ma galulue faatasi pea e toe atiaʻe ma faamalosia le ma aiga. Sa ou maumauaʻi e aua neʻi toe faatigā iā Steve. E ui sa lagona e Steve le tigā, ae sa manaʻo e taulau manuia le ma faaipoipoga. O aso uma lava ou te taumafai ai e faailoa atu loʻu faamaoni iā Steve, ma sa faaauau ona ia faaalia mai lona alofa iā te aʻu. Ou te lagona pea le lotofaafetai iā te ia ona o lenei mea.”

FAATAʻITAʻI LE MEA LENEI: Ia galulue e faatumauina pea le maufaatuatuaina o la oulua faaipoipoga.

3 Ia Suia Masaniga Tuai i Masaniga Fou. Ina ua uma ona lapataʻi e Iesu lana ʻaufaalogologo e faatatau i le mulilua, ona ia fautua atu lea e faapea: “O lenei, afai e te tausuai ona o lou mata taumatau, ia sali ese ma lafoaʻi.” (Mataio 5:27-29) Afai o oe lea sa lē faamaoni, pe e mafai ona e mafaufau i ni uiga ma gaoioiga e tatau ona e sali ese ma lafoaʻi, ina ia faasaoina ai la oulua faaipoipoga?

O lea la, e lē tatau ona toe iai se lua faiā po o se fesootaʻiga ma lē na lua faia le mulilua.c (Faataoto 6:32; 1 Korinito 15:33) I le pei o Paulo lea na taʻua i luga, na suia ona taimi faigaluega ma le numera o lana telefoni feaveaʻi, ina ia lē toe fesootaʻi ai ma le isi fafine. Ae e leʻi taulau manuia ana taumafaiga. Ona na maumauaʻi Paulo ina ia tumau pea le maufaatuatuaina o ia e lana avā, o lea na ia filifili ai loa e tuua lana galuega, ma aveese lana telefoni ae faaaogā na o le telefoni a lana avā. Pe na taulau ana taumafaiga? Na faapea mai lana avā o Debbie: “Ua silia nei ma le ono tausaga, ae o loo oʻu popole pea i nisi o taimi ina neʻi toe taumafai le fafine e fesootaʻi mai iā Paulo. Ae i le taimi lenei, ua ou maufaatuatuaina Paulo e lē toe lolo atu i lenā faaosoosoga.”

Afai o oe lea sa faia le agasala, e tatau la ona sui lau amio. O se faataʻitaʻiga, atonu e iai iā te oe le uiga faatafai, po o le mafaufau foʻi i le faia o se faauōga fetosinaaʻi ma se isi. Afai o lea, “ia toese le tagata tuai ma ana gaoioiga.” O le suia o masaniga tuai i masaniga fou, o le a matuā maufaatuatuaina ai oe e lau paaga. (Kolose 3:9, 10) Pe e faigatā ona e faaali atu le alofa, ona o le auala na tausia aʻe ai oe? E ui e lē faigofie i le taimi muamua, ae ia agalelei pea ma maumauaʻi i le auala e faailoa atu ai lou alofa i lau paaga. Na faapea mai Steve: “E masani ona faailoa mai e Jodi lona alofa i le paʻi mai o lona lima ma faapea mai, ʻOu te alofa iā te oe.’”

A o faagasolo taimi, o le a fai ma au masani le faailoa atu o mea uma e te faia i lau paaga. Na faapea mai Mi Young e pei ona taʻua i luga: “Sa fai ma masani a Chul Soo le faailoa mai iā te aʻu o mea uma e tutupu iā te ia i aso taʻitasi, e oo lava i nai mea e lē tāua. Na taumafai o ia e faailoa mai e leai se mea o loo ia nanāina.”

FAATAʻITAʻI LE MEA LENEI: Ia fesili le tasi i le isi po o ā ni gaoioiga e ono fesoasoani e toe atiaʻe ai le maufaatuatuaina. Ia tusi i lalo ma ia faatatau. E lē gata i lea, ia faaopoopo atu i lau faasologa masani nisi o mea e te lua fiafia uma i ai.

4 Ia Iloa le Taimi e Faagalo ai Mea ua Tuanaʻi. Aua neʻi e vave faia se faaiʻuga e faapea ua toe foʻi le lua aiga i le tulaga sa iai muamua. Ua lapataʻi mai le Faataoto 21:5: “O i latou e faataalise ona faia mea e iʻu ai i le mativa.” E umi se taimi e faaalu—atonu po o ni tausaga—ina ia toe atiaʻe ai le maufaatuatuaina.

Afai o oe lea sa faamaoni, ia lava se taimi e faamagalo atoatoa ai. Na faapea mai Mi Young: “O le tele o taimi ou te mafaufau ai e lē o se mea lelei pe a lē faamagalo e se avā lana tane ua lē faamaoni. Ou te leʻi malamalama po o le ā le māfuaaga e ita umi ai fua. Peitaʻi, ina ua lē faamaoni laʻu tane iā te aʻu, na ou malamalama ai loa i le matuā faigatā o le faamagalo.” E faasolosolo mālie lava ona iai le lotofaamagalo ma le maufaatuatuaina.

Ae e ui i lea, ua faapea mai le Failauga 3:1-3, e iai lava “le taimi e toe malosi ai.” I le taimi muamua, e te ono manatu o le lē taʻuina atu o ou faalogona i lau paaga, o le auala sili lea ona lelei. Peitaʻi, o lou tumau i na manatu, e lē fesoasoani iā te oe ina ia toe maufaatuatuaina ai lau paaga. Ina ia faaleleia le lua mafutaga, ia faamagalo i lau paaga, ma ia faailoa atu lou lotofaamagalo e ala i le faasoa atu o ou manatu, ma ou faalogona iā te ia. E lē gata i lea, ia faalaeiau lau paaga e faailoa mai ona mafatiaga ma mea e fiafia i ai.

Aua e te mafaufau i mea e atili ai ona oo iā te oe tigā. Ia galue malosi e ʻalofia mea o loo faapogaia ai le tigā matuitui. (Efeso 4:32) E te maua le fesoasoani talafeagai pe a e manatunatu i le faaaʻoaʻoga a le Atua. Na matuā tigā lona finagalo ina ua liliuese ona tagata tapuaʻi o Isaraelu anamua mai iā te ia. Na faatusa e Ieova le Atua o ia i le paaga faamaoni. (Ieremia 3:8, 9; 9:2) Ae e leʻi ʻtumau pea lona ita seʻia oo i le faavavau.’ (Ieremia 3:12) Ina ua faaalia e Ona tagata le salamō moni ma toe foʻi atu iā te Ia, sa ia faamagalo iā i latou.

O le mea moni, o le a oulua maua le faalogona o le malupuipuia pe afai e te lua malilie faatasi i suiga ua faia i le lua mafutaga. O lea, nai lo o le tau ina manatu e faasao le lua faaipoipoga, e tatau foʻi ona lua taulaʻi atu i nisi o sini. Ia fai ma masani le faaavanoa o se taimi e iloilo ai po o faapeʻī le lua agaʻigaʻi i luma. Aua neʻi gata mai lua taumafaiga. Ia foʻia faafitauli, ma ia faailoa atu le alofa o le tasi i le isi.—Kalatia 6:9.

FAATAʻITAʻI LE MEA LENEI: Nai lo o le taumafai ina ia toe foʻi lau faaipoipoga i le mea sa iai muamua, ia taumafai e atiaʻe se faiā fou e sili atu ona malosi.

E Mafai Ona E Taulau Manuia

Afai e te lē o mautonu pe faamata o e taulau, ia e manatua le mea lenei: O le Atua, o Lē na faavaeina faaipoipoga. (Mataio 19:4-6) O lea, o Lana fesoasoani o le a mafai ai ona taulau manuia lau faaipoipoga. O ulugalii uma o loo taʻua i luga, sa latou faatatauina taʻiala atamai o le Tusi Paia, ma faasaoina ai a latou faaipoipoga.

Ua silia nei ma le 20 tausaga talu ona iai tulaga faigatā i le faaipoipoga a Steve ma Jodi. Na faamatala e Steve a la taumafaiga ina ia faatumauina la la faaipoipoga e faapea: “E mataʻina ni suiga na iai i o ma olaga ina ua amata ona suʻesuʻe le Tusi Paia ma Molimau a Ieova. E ese le tāua o le fesoasoani na ma maua. O lea la, sa mafai ai ona ma onosaia na taimi faigatā.” Na faapea mai Jodi: “Ou te lagona le matuā faamanuiaina ona na mafai ona ma tumau pea i na tulaga faigatā. O le suʻesuʻeina faatasi o le Tusi Paia ma faia taumafaiga malolosi, ua ma maua ai nei se faaipoipoga taulau manuia.”

[Faaopoopoga i lalo]

FESILI IFO IĀ TE OE LAVA . . .

▪ O ā ni māfuaaga ua ou filifili ai ina ia faasao laʻu faaipoipoga, e ui i le lē faamaoni i le taimi ua mavae?

▪ O ā ni uiga lelei ua ou mātauina i laʻu paaga i le taimi nei?

▪ Na faapefea ona ou faaalia atu loʻu alofa i auala eseese i le taimi na ma feoaʻi ai, ma e faapefea ona ou toe faaalia na uiga?