“Ua Taunuu le Mea na Ou Moomoo i Ai”

I le 15 tausaga ua mavae, sa auauna ai Emilia o se paeonia sauatoa. Peitaʻi, sa tatau ona faamutaina lana auaunaga faataimi atoa. I tausaga talu ai nei, e masani ona ia toe tomānatu i lenā vaitaimi sili ona fiafia o lona olaga, ma sa manaʻo Emilia e toe faateleina lona sao i le faiva.

Peitaʻi, sa alu le tele o lona taimi i lana galuega totogi, ma sa lē maua ai sona fiafia. I se tasi taimi, sa faapea atu Emilia i ē sa latou faigaluega faatasi: “Maʻimau pe ana mafai ona faaitiitia oʻu itula faigaluega!” Ina ua faalogo i ai lana pule, sa alu atu le fafine ma fesili atu iā Emilia, po o le mea moni lenā e manaʻo iai. Sa faailoa atu e Emilia, o le tulaga moni lenā. Peitaʻi, ina ia mafai ona faaitiitia ona itula faigaluega, e manaʻomia le faatagaga mai se faatonu o le kamupani, talu ai e lē faatagaina ona faigaluega faavaitaimi se tasi o le ʻaufaigaluega. Sa sauni Emilia mo le la feiloaʻiga ma le faatonu, ma sa tatalo ina ia mafai ona ia maua le toʻa ma le lototele.

A o faia le talanoaga, sa faaalia e Emilia le faaaloalo, ma faailoa atu ma le lototele lona manaʻo e faaitiitia ona itula faigaluega. Sa ia faamatala atu i le faatonu, e na te faaaogā le tele o lona taimi e fesoasoani ai i isi pe a lē faigaluega. Sa faapea atu Emilia, o ia o se tasi o Molimau a Ieova, ma o loo fesoasoani e aʻoaʻoina tagata e faatatau i le Tusi Paia. Sa faaopoopo atu le tuafafine, o le toʻatele e lē iloa le eseesega o le lelei ma le leaga, ma e manaʻomia le atamai mai le Tusi Paia, ina ia mafai ai ona faia ni filifiliga lelei. Sa faamautinoa atu e Emilia i le tamāloa, o le a faaauau pea ona avea o ia ma se tagata faigaluega lelei i le kamupani. Peitaʻi, e manaʻomia ona faaitiitia ona itula faigaluega, ina ia mafai ai ona faateleina lona taimi e fesoasoani ai i isi tagata.

Sa faalogologo lelei le faatonu ma faapea atu, sa iai se taimi na ia manatu ai e faia ni galuega e fesoasoani ai i isi. Sa ia toe faapea atu: “Ona o māfuaaga ua e taʻua, ua ou manatu ai e tatau ona talia lau talosaga. Peitaʻi, pe e te iloa o le a faaitiitia ai lou totogi?” Sa faapea atu Emilia ua ia iloaina, ma ua nofosauni e faafaigofie lona olaga pe a manaʻomia. Sa ia toe taʻua, o lona fiafiaga sili le fesoasoani atu i isi. Sa faapea atu le faatonu: “Ou te talisapaia i latou e lē manatu faapito e faaaluina o latou taimi e fesoasoani ai i isi tagata.”

O le taimi muamua lea ua faataga ai ona faafaigaluegaina faavaitaimi se tasi i lenā kamupani. I le taimi lenei, e na o le fā aso faigaluega o Emilia. Sa teʻi o ia, ona sa siitia lona totogi, ma ua tutusa lana tupe maua i le taimi lenei ma le taimi muamua. Ua ia faapea mai: “Ua taunuu le mea na ou moomoo i ai, ma ua mafai nei ona ou toe paeonia sauatoa.”

Pe e mafai ona toe fetuunaʻi lou tulaga ina ia mafai ai ona e auai i le auaunaga paeonia?

[Faamatalaga faaopoopo i le itulau 32]

Sa faapea atu le faatonu: “Ou te talisapaia i latou e lē manatu faapito e faaaluina o latou taimi e fesoasoani ai i isi tagata”