Pe na Folafola Atu e Iesu i le Pagota o le a Ola o Ia i le Lagi?

Ua lāgā lenei fesili ona o le folafolaga a Iesu i le pagota lea na tautau i ona autafa e faapea: “E moni ou te fai atu iā te oe i le asō, o le a ta faatasi ma oe i le Parataiso.” (Luka 23:43) Mātau, e leʻi faailoa atu e Iesu po o fea o le a i ai lenā parataiso. O lea, pe na uiga atu Iesu o le a ia faatasi ma le pagota i le lagi?

Muamua, seʻi o tatou iloiloina pe na ausia e le pagota agavaa e ola ai i le lagi. O i latou e ola i le lagi, e tatau ona papatiso i le vai ma le agaga ina ia avea ma soo faauuina o Iesu. (Ioane 3:3, 5) E tatau ona ola e tusa ma tapulaa a le Atua, ma faaalia uiga e pei o le faamaoni ma le alofa. (1 Korinito 6:9-11) E tatau foʻi ona tumau i le faamaoni seʻia oo i le oti. (Luka 22:28-30; 2 Timoteo 2:12) A ausia nei agavaa, ona latou maua loa lea o le faaeaga sili e toetutū ai i le lagi, ma pule mai o ni tupu ma ositaulaga faatasi ma Keriso mo le afe tausaga.​—Faaaliga 20:6.

I se faaeseesega, na ola le pagota i se olaga solitulafono seʻia oo ina maliu. (Luka 23:32, 39-41) E moni na ia faaalia le faaaloalo iā Iesu ina ua ia faapea atu: “Ia e manatua mai aʻu pe a e oo i lou malo.” (Luka 23:42) Peitaʻi, e leʻi papatiso o ia e avea ma soo faauuina o Iesu, ma e na te leʻi maua foʻi se talaaga lelei o se tagata faamaoni i lona olaga. Pe na uiga atu la Iesu, o le a maua e le pagota le faamoemoe lea o le a maua e ona soo, ia na tumau i le faamaoni seʻia oo i le oti?​—Roma 2:6, 7.

O se faataʻitaʻiga, e te ono filifili e talia le talosaga a se tasi mo se faamagaloga ona o lona gaoia o lau tupe. Ae po o le a e maufaatuatuaina o ia e vaaia sau pisinisi po o lou aiga? E leai, ae e na o lē e te maufaatuatuaina o le a e tuu i ai lenā matafaioi. I se tulaga tutusa, e tatau ona maufaatuatuaina ē o le a ola i le lagi, ina ia mafai ai ona latou taofimau i tapulaa amiotonu a le Atua, a o pule mai i le lalolagi mo le afe tausaga. (Faaaliga 2:10) E ui lava na faaalia e le pagota le faaaloalo, peitaʻi, e leai se faamaoniga e iloa ai o ia o sē e maufaatuatuaina.

Pe na fetalai Iesu o le a faatasi ma le pagota i le aso lava lenā i le lagi? E leai, auā e oo lava iā Iesu e leʻi afio i le lagi i le aso na maliu ai, ae sa iai “i lalo i le eleele” po o le tuugamau, mo aso e tolu. (Mataio 12:40; Mareko 10:34) Ina ua toetū Iesu, na iai pea o ia i le lalolagi mo aso e 40 a o leʻi afio aʻe i le lagi. (Galuega 1:3, 9) O le mea moni, e leʻi faatasi Iesu ma le pagota i le lagi i le aso na maliliu ai.

E manino mai, sa uiga atu Iesu o le a toetū mai le pagota i se Parataiso i le lalolagi. (Galuega 24:15; Faaaliga 21:3, 4) Mo nisi faamatalaga e faatatau i le Parataiso ma le finagalo o le Atua, ia talanoa atu i se tasi o Molimau a Ieova.