Lesona Mai se Tagata Solitulafono

O le a tatou talanoa e faatatau i le tagata solitulafono lea o loo i le ata faatasi ma Iesu. Ua ia lagona le salamō mai i ana solitulafono. Na ia faapea atu iā Iesu: “Ia e manatua mai aʻu pe a e oo i lou malo.” E pei ona faaalia i le ata, o loo talanoa Iesu i le tagata solitulafono. Pe e te iloa le tala a Iesu o loo fai atu?—a Na faapea atu Iesu: “E moni ou te fai atu iā te oe i le asō, o le a ta faatasi ma oe i le Parataiso.”

O le a faapeʻī lenā Parataiso?— Ina ia maua le tali saʻo, seʻi o tatou talanoa e faatatau i le Parataiso lea sa faia e le Atua mo Atamu ma Eva. O fea sa iai lenā Parataiso, pe sa iai i le lagi, po o i inei le lalolagi?—

E saʻo pe afai e te tali mai o le lalolagi. O lea, pe a taʻu le tagata solitulafono o loo “i le Parataiso,” o lona uiga o le a iai o ia i le lalolagi pe a avea ma Parataiso. O le a faapeʻī lenā Parataiso?— Seʻi o tatou vaai.

Ina ua māeʻa ona faia e Ieova le Atua Atamu ma Eva, ua faapea mai le Tusi Paia, ona ia tuu lea o i laʻua i se parataiso i inei le lalolagi. Sa faaigoaina lenā Parataiso o “le faatoʻaga i Etena.” E faapeʻī foliga o le faatoʻaga o Etena sa iai?— E mautinoa e sili atu ona matagofie i lo o se isi lava nofoaga o loo iai i aso nei.

Po o le a iai faatasi Iesu ma le tagata solitulafono i inei le lalolagi?— E leai, auā o le taimi lenā o loo pule Iesu o se Tupu mai le lagi i le lalolagi Parataiso. O lona uiga, o le a faatūina e Iesu le tagata solitulafono, ma faamautinoa e tausia lelei o ia i le lalolagi Parataiso. Ae aiseā ua faataga ai e Iesu se tagata solitulafono ona ola i le Parataiso?— Seʻi o tatou talanoa e faatatau i lea fesili.

E mautinoa sa faia e lenei tagata le tele o mea leaga. Ae e faapena foʻi le isi faitau piliona o tagata ua maliliu. Peitaʻi, o le toʻatele o i latou sa faia mea leaga, e leʻi aʻoaʻoina e faatatau iā Ieova faapea lona finagalo.

O i latou na e aofia ai ma le tagata solitulafono, o le a toe faatutūina mai i le Parataiso i luga o lenei lalolagi. O le a aʻoaʻoina i latou i le finagalo o le Atua, ona latou faamaonia atu lea o lo latou alofa mo ia.

E faapefea ona faia lenā mea?— E latou te faia mea e finagalo i ai Ieova. Maʻeu le matagofie o le olaga o le a iai i le Parataiso, ma ola faatasi ai pea ma tagata e alolofa le tasi i le isi, ma alolofa iā Ieova.