TALIINA FESILI FAALE-TUSI PAIA

Aiseā ua taʻua ai Iesu o le Alo o le Atua?

E lē iai se avā moni a le Atua, lea e na te maua ai ni fanau. Nai lo lea, o ia na foafoaina meafaiola uma, ma faia le tagata ma le tomai ina ia faaaʻoaʻo i ona uiga. O le māfuaaga lenā na taʻua ai Iesu “o le Alo o le Atua,” faapea foʻi Atamu, lea sa taʻua o le “atalii o le Atua.”​—Faitau le Luka 3:38; Ioane 1:14, 49.

O anafea na foafoaina ai Iesu?

Na muamua foafoaina e Ieova Iesu nai lo o Atamu. O le mea moni, na faaaogā e Ieova Iesu ina ia foafoaina isi mea uma, e aofia ai agelu. O le māfuaaga lenā e taʻua ai Iesu “o le ulumatua o foafoaga uma.”​—Faitau le Kolose 1:15, 16.

Ua leva ona soifua Iesu i le lagi o se agaga a o leʻi fanau mai i Peteleema. Na faavavega ona tuu e Ieova le soifua o Iesu i le manava o Maria, ina ia fanau mai ai o ia o se tagata.​—Faitau le Luka 1:30-32; Ioane 6:38; 8:23.

Aiseā na finagalo ai le Atua ina ia sau Iesu i le lalolagi? O le ā le matafaioi sa iai a Iesu? E te maua tali o nei fesili i le Tusi Paia, ma o le iloa o na tali o le a atili ai ona e talisapaia mea uma ua faia e Ieova ma Iesu mo oe.