Na Pepelo Peteru ma Anania​—O le ā se Lesona e Aʻoaʻoina Mai Ai?

O le pepelo, o le faia lea o se tala e lē moni. Pe na iai se taimi na e pepelo ai?—a E oo foʻi i tagata matutua e pepelo. O loo taʻua i le Tusi Paia nisi o auauna a le Atua na pepelo, e pei o Peteru le soo o Iesu. Aiseā na pepelo ai o ia?

I le pō na puʻea ai Iesu ma auina atu i le fale o le ositaulaga sili, sa alu atu ai foʻi ma Peteru i inā e aunoa ma le iloa e se tasi. Ae na iloa atu o ia e se auauna teine a le ositaulaga ma faapea atu: “O oe foʻi lenā, sa oulua faatasi ma Iesu.” Peitaʻi, na fefe Peteru ma faapea atu e lē o ia.

Ua taʻua i le Tusi Paia, na toe “mātauina [Peteru] e se isi foʻi teine” ma faapea atu: “Sa faatasi lenei tagata ma Iesu,” ae na toe faafiti foʻi Peteru. E leʻi umi ae faapea atu loa isi tagata: “E moni o oe o se tasi o i latou.”

Na fefe Peteru ma pepelo faatolu atu: “Ou te lē iloa lava lenā tagata!” Ona vivini loa lea o se moa. Na vaai atu Iesu iā Peteru ma toe manatua ai e Peteru, na fai atu Iesu iā te ia e faapea: “E te faafiti faatolu iā te aʻu a o leʻi vivini le moa.” Na matuā tagi Peteru ma faanoanoa.

Pe e mafai ona tupu se mea faapena iā te oe?— Atonu e te faalogo atu i ni tala a ni tamaiti i le aʻoga e faatatau i Molimau a Ieova e faapea: “E latou te lē fāʻalo i le fuʻa,” a ua fai mai le isi: “E latou te lē tau mo lo latou atunuu,” ae oso atu le isi: “E lē o i latou o ni Kerisiano auā e latou te lē faamanatuina le Kerisimasi.” Ae ua faafuaseʻi lava ona fesili atu iā te oe, “O oe foʻi o se Molimau a Ieova, a ea?” O le ā sau tali?—

E tatau ona e sauniuni lelei e fai atu se tali. E leʻi sauniuni lelei Peteru, ma o le mea lea na pepelo ai o ia. Peitaʻi sa salamō o ia ma na faamagaloina e le Atua.

Na pepelo foʻi se isi soo o Iesu e igoa iā Anania, ma sa lagolagoina o ia e lona toʻalua o Safaira. Peitaʻi, e leʻi faamagaloina i laʻua e le Atua. Aiseā?

Ina ua sefulu aso talu ona toe foʻi Iesu i le lagi, sa papatisoina ai i Ierusalema ni tagata e toʻa 3,000. E mamao le mea na ō mai ai le toʻatele mo le Tausamiga o le Penetekoso, ma sa mananaʻo e nonofo pea i Ierusalema e aʻoaʻoina atili nisi o o latou talitonuga fou. O lea, na faaaogā ai e aposetolo o Iesu a latou lava tupe e tausia ai i latou nei.

Na faatau atu e Anania ma lona toʻalua so la fanua ina ia maua ai se tupe e tausia ai i latou nei. Ae ina ua alu atu Anania i le ʻauaposetolo, sa pepelo atu o ia e faapea o le tupe atoa lea o le tau o le fanua. Sa faailoa atu e le Atua iā Peteru lenei mea, ona faapea atu lea o Peteru iā Anania: “Ua e lē pepelo . . . i tagata, a o le Atua.” O le taimi lava lenā na oti ai Anania, ma na mulimuli ane oti foʻi lona toʻalua ona sa pepelo foʻi o ia.

O se lesona tāua: E tatau ona tatou tautatala i le mea saʻo. Peitaʻi, e iai taimi e tatou te pepelo ai, aemaise lava a o tatou lāiti. Pe e te lē lagona le fiafia ona e alofa Ieova iā te oe ma e na te faamagaloina oe, e pei foʻi ona faia iā Peteru?— E tāua le talosaga atu i le Atua e faamagalo i tatou pe a tatou faia se tala pepelo. I le pei o Peteru, e mafai foʻi e le Atua ona faamagaloina i tatou, pe a tatou taumafai malosi e aua le pepelo.