TOEAINA​—Po o le a Outou Faafouina “le Tagata ua Vaivai”?

O Angela,a o se tuafafine nofofua e silia i le 30 ona tausaga. Sa ia popole a o faatali mo le asiasiga a le ʻautoeaina. Na ia taumafaufau po o le ā le tala a toeaina o le a fai atu iā te ia. Sa ia iloa ua ia misia sauniga, ae sa ia lēlavā pe a māeʻa le aso atoa mai i le tausiga o tagata matutua. E lē gata i lea, sa popole foʻi Angela i le maʻi o lona tinā.

Pe afai o oe o se tasi o le ʻautoeaina, e faapefea ona e faalaeiau atu iā Angela? E faapefea ona e sauniuni a o leʻi asiasi atu i se “tagata ua vaivai” e pei o ia?​—Iere. 31:25.

MAFAUFAU I LE TULAGA O LOU USO

O nisi taimi, e tatou te vaivai ona o galuega po o matafaioi faa-Kerisiano. O se faataʻitaʻiga, na “matuā vaivai” le perofeta o Tanielu ina ua ia vaaia se faaaliga e lē malamalama i ai. (Tani. 8:27) Mulimuli ane, na auina mai e le Atua le agelu o Kaperielu e fesoasoani iā Tanielu e malamalama i le faaaliga, ma faailoa atu ua talia e Ieova ana tatalo. Na faailoa atu foʻi e le agelu, o loo avea pea o ia ma “sē ua faapelepeleina” e Ieova. (Tani. 9:21-23) Mulimuli ane, na toe faalaeiau atu foʻi faapena se isi agelu iā te ia.​—Tani. 10:19.

E mafai ona e faia faapea pe a e asiasi atu i se tasi ua lēlavā po o ua lotovaivai. A o leʻi asiasi atu, faaalu se taimi e mafaufau ai i lona tulaga. O ā ni faafitauli o loo ia fesagaʻia? E faapefea ona ono faavaivaia ai o ia i na faafitauli? O ā ni ona uiga lelei? Ua taʻua e Richard, o sē ua silia ma le 20 tausaga o avea ma toeaina, e na te taumafai e mafaufau muamua i uiga lelei o le uso a o leʻi asiasi atu. O le mafaufau loloto foʻi i le tulaga o le uso, e faigofie ai ona avatu se faalaeiauga talafeagai. Pe afai o loo e fuafua ma se isi toeaina e asiasi atu i se tasi, e lelei ona talanoa muamua i le tulaga o le uso po o le tuafafine.

IA MĀFANA ATU I LOU USO

E ono māsiasi le uso e talanoa atu i se toeaina e faatatau i ona faalogona. E faapefea ona e fesoasoani iā te ia? Atonu e fesoasoani le laumata ʻataʻata faapea le fai atu o ni faaupuga agalelei. O Michael, o sē ua silia i le 40 tausaga o avea ma toeaina, e masani ona ia amata i le fai atu faapea: “E te iloa, o se tasi o faaeaga manaia o le avea ma toeaina, o le asiasi lea i uso ma tuafāfine i o latou fale, ma faamasani lelei iā i latou. Sa ou tulimataʻia lenei aso e tatou te feiloaʻi ai.”

E mafai ona amata le asiasiga i se tatalo. E mafai ona e taʻua ai uiga lelei o le uso e pei o le faatuatua, alofa ma lona tumau. Sa faia foʻi faapea e Paulo ina ua ia tatalo mo ona uso. (1 Tesa. 1:2, 3) O le faia faapea, e fesoasoani iā te oulua e maua ai le vaaiga saʻo e uiga i le asiasiga. O le iʻuga, o le a avea o se talanoaga e faalaeiauina ai. O lau tatalo e faamāfanafanaina ai foʻi le uso. Ua taʻua e Ray o sē ua leva ona avea ma toeaina, “o nisi taimi e galo iā i tatou mea lelei o loo tatou faia i le auaunaga i le Atua, ae e matuā faafouina i tatou pe a faamanatu mai e se tasi.”

IA FAAAOGĀ LE TUSI PAIA

O se tasi o auala e avatu ai se “meaalofa faaleagaga,” o le faaaogā lea o le Tusi Paia e tusa pe tasi se fuaiupu e faitau. (Roma 1:11) O se faataʻitaʻiga, e ono lagona e se uso lotovaivai le lē toe aogā. Atonu e te lua faitau e faatatau i le faisalamo, o lē na faatusa ona faalogona i se “fagupaʻu” ua mimigi i le asu. E ui i na faalogona ae na taʻua e le faisalamo: “E lē galo iā te aʻu au tulafono.” (Sala. 119:83, 176) Pe a māeʻa ona faamatala le mau, e mafai ona faailoa atu i le uso e mautinoa foʻi “e lē galo” iā te ia tulafono a le Atua.

E faapefea ona faaaogā le Tusi Paia e faalaeiau ai se tuafafine ua vaivai faaleagaga, pe ua lē o toe maelega i le auaunaga? Atonu e faalaeiauina o ia i le talafaatusa i le tupe siliva na leiloa. (Luka 15:8-10) O lenā tupe siliva atonu o se vaega o se asoa tāua. A o talanoaina le talafaatusa, e te ono fesoasoani iā te ia e iloa o ia o se sui tāua o le faapotopotoga. E mafai ona e fesoasoani iā te ia e iloa o ia o se tasi o tamaʻi mamoe a Ieova ma e matuā pele o ia iā Ieova.

E masani ona fiafia uso e talatalanoa i mau na latou faitau ai. O lea, aua e te faia uma le talanoaga. Pe a māeʻa ona faitau se mau, e mafai ona e filifili se upu po o se fuaiupu patino, ma fesili atu i le uso e faaali mai sona manatu. O se faataʻitaʻiga, pe ā māeʻa ona faitau le 2 Korinito 4:16, ia fesili atu, “E mafai ona e mafaufau i ni auala na ʻfaafouina’ ai oe e Ieova?” O fesili faapena e mafai ona maua ai se talanoaga e faalaeiauina ai.​—Roma 1:12.

E mafai foʻi ona e faalaeiau i lou uso e ala i le talanoaina o se tagata o le Tusi Paia na fesagaʻia se tulaga faapena. E mafai e se tasi o loo lotovaivai ona malamalama i faalogona o Hana ma Epaferoti. Na la lotovaivai i nisi taimi, ae sa pele pea i laʻua i le Atua. (1 Samu. 1:9-11, 20; Fili. 2:25-30) E mafai ona e faaaogā le tele o isi faaaʻoaʻoga lelei i le Tusi Paia.

FAAAUAU ONA FAAALIA LE NAUNAU MONI

Pe a māeʻa le asiasiga, ia faaauau ona faaalia le naunau moni i lou uso. (Galu. 15:36) O se faataʻitaʻiga, pe a uma le asiasiga, ia fai se fuafuaga e te lua galulue faatasi i le talaʻiga. Ina ua feiloaʻi Bernard, o sē ua leva ona toeaina, ma se uso sa asiasi i ai, sa ia fesili atu ma le faautauta e faatatau i le fautuaga na ia ofoina atu. Sa ia ono fesili atu, “Pe na fesoasoani le fautuaga iā te oe?” O le faaalia o le naunau moni i na auala, e mafai ona iloa ai nisi auala e te fesoasoani atili ai i le uso.

E sili atu i lenā, e manaʻomia ona lagona e o tatou uso ma tuafāfine e pele i latou iā te oe, e te malamalama ma alofa iā i latou. (1 Tesa. 5:11) O lea, a o leʻi asiasi atu i lou uso, ia mafaufau i lona tulaga. Ia tatalo e faatatau i le asiasiga. Ia filifili ma le faaeteete mau o le a e faaaogāina. O le a mafai ona e maua ai upu talafeagai e faafouina ai “le tagata ua vaivai”!