“E Alofa le Atua i Lē e Foaʻi ma le Lotofiafia”

O le ā le ituaiga o meaalofa e te lagona ai le matuā talisapaia o oe? O le mea moni, o le toʻatele o i tatou e fiafia e talia se meaalofa mai i se tasi ona ua uunaʻia o ia e le alofa, nai lo o le tau ina fai ona o se tiute tauave po o se mea e tatau ona fai. E tāua iā i tatou le uunaʻiga e faia ai se foaʻi. Ae e sili atu i lenā, e tāua i le Atua. Seʻi o tatou iloiloina upu faagaeeina a le aposetolo o Paulo o loo faamauina i le 2 Korinito 9:7.

Aiseā na tusia ai e Paulo na upu? Na ia manaʻo e faalaeiauina Kerisiano i Korinito ina ia lagolagoina le galuega laveaʻi mo o latou uso talitonu o loo i Iutaia. Pe na ia taumafai e faamalosia Kerisiano i Korinito ina ia foaʻi atu? E leai, na ia tusi e faapea: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.” Seʻi o tatou iloiloina totoʻa lenei apoapoaʻiga.

“Faia e tusa ma le mea ua filifili i lona loto.” Na faapea mai le aposetolo o Paulo, o le Kerisiano moni, e na te foaʻi e tusa ma le mea ua filifili “i lona loto.” I le taimi e tasi, e mafaufau loloto foʻi se Kerisiano e tusa ma manaʻoga o ona uso talitonu. Na faapea mai se tasi tagata atamai, o le upu “filifili” i le uluaʻi gagana, e uiga atu i le muaʻi fuafuaina. O lea, e manatunatu loloto se Kerisiano i manaʻoga o ona uso talitonu, ma fesili ifo po o le ā e mafai ona ia faia ina ia faataunuu ai na manaʻoga.​—1 Ioane 3:17.

“Aua le faia ma le tigā, aua foʻi le faia faamalosi.” E lua ituaiga o foaʻi na taʻua e Paulo e tatau i se Kerisiano ona ʻalofia, o le faatalatū ma fai faamalosi. Ua faapea mai se tasi lomifefiloi, o le tagata e foaʻi ma le tigā po o le faatalatū, e na te foaʻi “mai se loto e tumu i le faanoanoa pe a manatu i le tuueseese ma tupe.” O le tagata e foaʻi faamalosi, e ala ona ia foaʻi ona ua faamalosia o ia e faia faapea. E leai se tasi o i tatou e manaʻo i se meaalofa mai i se tasi e foaʻi ma le tigā po o le fai faamalosi.

“E alofa le Atua i lē e foaʻi ma le lotofiafia.” Na faapea mai Paulo, pe a filifili se Kerisiano e foaʻi, e tatau ona ia faia ma le lotofiafia po o le olioli. Ioe, e maua le fiafia pe a saʻo le uunaʻiga e faia ai e se tasi se foaʻi. (Galuega 20:35) E faigofie ona iloa le olioli o se tasi e foaʻi ma le lotofiafia. O le upu “lotofiafia” e mafai ona iloa ai faalogona i totonu ma le faailoaga mai fafo a lē o loo foaʻi. E pāʻia o tatou loto i le foaʻi a lē e faia ma le lotofiafia. E lē gata i lea, e na te faafiafiaina ai le Atua. Ua faapea mai se tasi o faaliliuga: “E alofa le Atua iā i latou e fiafia e foaʻi.”​—Contemporary English Version.

O upu faagaeeina a le aposetolo o Paulo, ua avea ma mataupu silisili e taʻitaʻia ai se Kerisiano i le auala e faia ai foaʻi. Pe a foaʻi atu o tatou taimi, malosi, po o meafaitino i isi, aemaise lava iā i latou o loo manaʻomia le fesoasoani, ia faia ma le lotomalie ma le fiafia moni. O lenā ituaiga o foaʻi, e lē gata e faafiafiaina ai i tatou, ae o le a alofagia ai foʻi i tatou e le Atua, o Lē e alofa i “lē e foaʻi ma le lotofiafia.”