E Mafai Ona Tigā le Finagalo o le Atua​—Le Auala e Faafiafiaina ai o Ia

Pe na iai se taimi na e matuā mafatia ai?—a E mautinoa e oo iā i tatou uma lenā faalogona. O nisi taimi e tatou te fetagisi ona o le faanoanoa. Atonu ona ua fai mai e se tasi se tala e lē moni e faatatau iā i tatou. E mautinoa e te lagona le tigā, a ea?— E lagona foʻi e le Atua le tigā, pe a faia e se tasi se tala e lē moni e faatatau iā te ia. Seʻi o tatou talanoa e faatatau i lenei mea ma vaai pe e faapefea ona tatou faafiafiaina le Atua nai lo o le faatigā iā te ia.

Ua taʻua i le Tusi Paia, o nisi tagata e faapea mai e alolofa i le Atua ae ua latou “faatigā foʻi iā te ia.” Ioe, ua latou faatigā i le Atua! O le mea moni, e leai se tasi e mafai ona faatigā iā Ieova le Atua. O ia o le silisili ese. O lea, seʻi o tatou iloilo pe aiseā e tigā ai faalogona o Ieova pe a tatou lē faia le mea o loo ia manaʻo mai ai.

O tagata muamua e toʻalua na foafoaina e Ieova i le lalolagi, na la matuā faatigā iā te ia. Na tuu e Ieova i laʻua i le Parataiso i luga o le lalolagi lea e taʻua o “le faatoʻaga o Etena.” O ai i laʻua nei?— O Atamu, ae i se taimi mulimuli ane na iai ma Eva. Seʻi o tatou vaai po o le ā na la faia na māfua ai ona tigā faalogona o Ieova.

Ina ua uma ona tuu e Ieova i laʻua i lenā faatoʻaga, ona ia faatonuina lea o i laʻua e tausia lelei le faatoʻaga. Na ia fetalai atu foʻi, e mafai ona la maua se fanau ma feola faatasi i le faatoʻaga e aunoa ma le oti. Peitaʻi, a o leʻi faia ni fanau a Atamu ma Eva, sa iai se mea mataʻutia na tupu. Pe e te iloa lenā mea?— Na uunaʻia e se agelu Eva ma Atamu ina ia la fouvale iā Ieova. Seʻi vaai pe na faapefea ona tupu lenā mea.

Na faapogaia e le agelu se gata ina ia foliga mai o loo tautala. Na fiafia Eva i le mea na ia faalogo i ai, na faapea atu le gata o le a pei o ia “o le Atua.” O lea na ia faia ai le mea na fai atu ai le gata. Pe e te iloa lenā mea?—

Na ʻai e Eva le fua o le laau na fetalai ai le Atua iā Atamu e aua la te aai ai. A o leʻi foafoaina e le Atua Eva, na ia fetalai atu iā Atamu e faapea: “E mafai ona e ʻai i laau uma o le faatoʻaga ma e maʻona ai. A o le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.”

Na iloa lelei e Eva lenā poloaʻiga. Peitaʻi na ia vaavaai pea i le laau, ma na ia iloa ai “e lelei i le ʻai ua manaʻo foʻi i ai auā ua manaia i le vaai . . . Ona tago atu lea o ia i le fua ma ʻai ai.” Mulimuli ane na ia ave le fua o le laau iā Atamu, “ma ua ʻai ai foʻi ma ia.” Aiseā na ʻai ai e Atamu le fua o le laau?— Ona ua sili atu ona alofa Atamu iā Eva nai lo o Ieova. Na ia filifili e faafiafia Eva nai lo o le Atua. Peitaʻi, o le usiusitaʻi iā Ieova e sili atu nai lo o le usiusitaʻi i so o se isi lava tagata!

O e manatua le gata lea na talanoa atu iā Eva? E pei lava ona mafai e se tasi ona faafoliga mai o loo tautala se pepe meataalo, e iai foʻi la se tasi e ana le leo lea na faafoliga mai e pei o loo tautala mai le gata. O ai e ona lenā leo?— O le leo “o le uluaʻi gata lea, ua igoa foʻi i le Tiapolo ma Satani.”

Pe e te iloa le auala e mafai ona e faafiafiaina ai Ieova?— E mafai ona e faia faapea e ala i le usiusitaʻi iā te ia i taimi uma. Na faapea mai Satani, e mafai ona ia faasesēina tagata uma ma faia le mea e na te manaʻo i ai. O lea, ua faalaeiau mai ai Ieova: “Loʻu atalii e, ia atamai oe ma faafiafia ai loʻu loto, ona ou mautali ai lea i lē o loo taufaifai mai.” O loo faifai pe aamu Satani iā Ieova. Fai mai Satani, e mafai ona ia faaliliueseina tagata uma mai le auauna atu iā Ieova. O lea, ia e faafiafia Ieova e ala i le usiusitaʻi ma auauna iā te ia! Pe mafai ona e taumafai malosi e faia lenā mea?—