Aiseā ua Lāgā ai Lenei Fesili?

ʻPo o oe o se tasi e lē talitonu i le Atua e pei o le isi toʻatele?’ O le fesili lenā a se vaega o tagata e lē talitonu i se Atua o loo i luga o se laupapa faasalalau. E manatu nei tagata e latou te lē manaʻomia le Atua.

Peitaʻi o i latou e faapea mai e talitonu i le Atua, e latou te faia faaiʻuga e foliga mai ai e lē o soifua le Atua. Na faapea mai Salvatore Fisichella, o se akiepikopō Katoliko e faatatau i la latou lotu: “Pe a vaai mai tagata iā i matou, e latou te lē iloa o i matou o ni Kerisiano, auā e leai se eseesega o le auala o loo matou ola ai ma i latou e lē talitonu i se Atua.”

E faaalu e le toʻatele lo latou taimi i meafai o le olaga, ma ua leai ai se taimi mo le Atua. E latou te manatu ua mamao tele o ia pe faigatā foʻi ona faalatalata i ai. E faatoʻā manatua lava le Atua pe a feagai ma faigatā pe mananaʻo foʻi i se mea, e pei o se auauna e nofosauni e faia so o se mea e latou te mananaʻo i ai.

E lē o ola le toʻatele e tusa ma mea o loo aʻoaʻoina i a latou lotu, ona e latou te manatu e leai se aogā. O se faaaʻoaʻoga, e talitonu le 76 pasene o tagata Katoliko i Siamani, e mafai ona nonofo faatasi se alii ma se tamaʻitaʻi a o leʻi faaipoipo. O se tulaga e matuā feteenaʻi ma aʻoaʻoga a le lotu faapea le Tusi Paia. (1 Korinito 6:18; Eperu 13:4) E tele foʻi isi tapuaʻiga e latou te iloa, e ui ina faapea mai le toʻatele o i latou o Kerisiano, ae e latou te lē o ola e tusa ma mea o loo latou aʻoaʻoina. Ua faapea mai ma le faanoanoa isi taʻitaʻi lotu, e leai se eseesega o le auala o loo ola ai a latou tagata lotu, ma i latou e lē talitonu i se Atua.

O nei faaaʻoaʻoga ua tulaʻi mai ai le fesili: Pe e tatou te manaʻomia moni lava le Atua? E lē o le taimi muamua lea ua lāgā ai lenei fesili, na taʻua foʻi i le uluaʻi tusi o le Tusi Paia. Ina ia taliina lenā fesili, seʻi o tatou uaʻi atu i nisi o manatu o loo i le tusi o Kenese.