O le ā o le a E Fai Atu ai i se Tagata e Lē Talitonu e Iai se Atua?
1 Na taʻu atu e se polofesa mai Polani i se tuafafine misionare i Aferika e faapea: “O aʻu ou te lē talitonu e iai se Atua.” Ae peitaʻi, sa mafai ona faia e le tuafafine se talanoaga ma lea fafine ma tuuina atu ia te ia le tusi, Life—How Did It Get Here? By Evolution or by Creation? Ina ua toe foʻi atu le misionare i le isi vaiaso na sosoo ai, na taʻu atu ia te ia e le polofesa e faapea: “Ua lē toe avea aʻu o se tagata e lē talitonu e iai se Atua!” Sa ia faitauina le tusi atoa o le Creation ma na talosaga atu loa mo se suʻesuʻega faale-Tusi Paia. O le ā e mafai ona e faia ina ia taulau manuia ai i le avatua o se molimau ia i latou o ē faapea mai latou te lē talitonu i le Atua? Muamua, ia iloilo māfuaaga eseese e māfua ai ona fai mai e tagata lenei faamatalaga.
2 O Vala e Māfua ai Ona Lē Talitonu: E lē o tagata uma e lē talitonu e iai se Atua, na ola aʻe i lena talitonuga. O le toʻatele sa ola aʻe i se lotu, ma i le taimi muamua sa talitonu i le Atua. Ae peitaʻi, ona o tulaga matuiā o le soifua mālōlōina po o faafitauli i le aiga po o faiga lē tonu na oo ia i latou i nisi taimi, ua faavaivaia ai lo latou faatuatua. A o isi, o mataupu na aʻoaʻoina i le iunivesite po o kolisi ua oo ina taaʻina sesē ai o latou manatu e uiga i le Atua. Mātau faaaʻoaʻoga o loo mulimuli mai o tagata sa lē talitonu e iai se Atua ae na mulimuli ane o latou atiina aʻe se faatuatua malosi ia Ieova le Atua ma avea ai o ni ana Molimau.
3 O se fafine i Pale na fanau mai lava e maua i le faamaʻi e aafia ai ponaivi. E ui lava na papatisoina o se tagata lotu Katoliko, ae na ia faalauiloa mai o ia e lē talitonu e iai se Atua. Ina ua ia fesiligia ni taupousā i le māfuaaga ua faataga ai o ia e le Atua e fanau mai ma sea lē lelei atoatoa, na latou tali mai e faapea: “Ona e alofa le Atua ia te oe.” Sa ia lē fia talia lena manatu lē talafeagai. Seʻi manatu foʻi i se tagata talavou i Finilani o lē sa manatu i ai e faapea e maua i se faamaʻi o musele ma e lē mafai ona togafitia, ma sa faaaogā le nofoa faataavalevale. Na ave o ia e lona tinā i se tagata o le lotu Penetekoso o lē na faapea mai e mafai ona ia faamālōlōina tagata mamaʻi. Ae sa leai se faamālōlōga faavavega na faia i ai. Ma o le iʻuga, na oo ai ina lē fiafia lea tama talavou i le Atua ma avea ai o se tagata e lē talitonu e iai se Atua.
4 O se tamāloa i Honduras na ola aʻe o se Katoliko, ae sa suʻesuʻe o ia i filosofia tau faa-Sosalisi (Socialist) ma talitonuga e leai se Atua. Na talitonu o ia i aʻoaʻoga i le iunivesite e faapea, o tagata, e māfua mai i le evolusione, ma sa lē toe talitonu ai o ia i le Atua. E faapena foʻi se fafine i le Iunaite Setete, na ola aʻe o se tagata lotu Metotisi. I le kolisi, sa aʻoaʻoina ai o ia i mataupu tau i le mafaufau. Na faapefea ona aafia lona talitonuga? Na faapea mai o ia: “I se tasi kuata, na faalēaogāina ai e na aʻoaʻoga le faatuatua uma sa ia te aʻu i le lotu.”
5 Pāʻiaina o Loto o Ē Faamaoni: E toʻatele tagata o ē ua faapea mai latou te lē talitonu i le Atua o le a talisapaia le iloaina pe e iai se vaifofō i faafitauli o le tulaga lē lelei o le soifua mālōlōina, le lē autasi o aiga, le lē faamasinotonu, ma isi mea faapena. E latou te naunau moni lava i le fia mauaina o tali i fesili e pei o nei: ‘Aiseā ua iai pea le amioleaga?’ ‘Aiseā e oo ai mea leaga i tagata amio lelei?’ ma le ‘O le ā le uiga o le olaga?’
6 O se tane ma se avā e nonofo i Suisilani na ola aʻe uma i laʻua o ni tagata e lē talitonu e iai se Atua. Ae i le uluaʻi taimi na faailoa atu ai ia i laʻua le upu moni, sa la tali lē fiafia mai. Ae peitaʻi, sa iai ni o la faafitauli matuiā i le aiga ma sa la mafaufau ai o le a tatala la laʻua faaipoipoga. Ae ina ua toe asiasi atu i ai le Molimau, na ia faaali atu ai i lea ulugalii mai le Tusi Paia le auala e foʻia ai o la faafitauli. Sa maofa le ulugalii ona o fautuaga aogā o loo iai i le Tusi Paia, ma na la malilie ai e faia se suʻesuʻega faale-Tusi Paia. Na faamalosia ai la laʻua faaipoipoga, na la agaʻigaʻi i luma faaleagaga ma na papatisoina i laʻua.
7 Le Faamatalaga e Mafai Ona E Fai Atu ai i se Tagata e Lē Talitonu e Iai se Atua: Pe a fai mai se tasi ia te oe o ia e lē talitonu e iai se Atua, ia taumafai e iloa le māfuaaga ua ia fai mai ai faapena. Pe ona o le aʻoaʻoga na aʻoaʻoina ai o ia, faafitauli ua oo ia te ia, po o le faafiaamiotonu o lotu ma aʻoaʻoga sesē? E mafai ona e fesili atu ia te ia: “E masani ona oo ia te oe lena lagona?” pe faapea atu “O le ā le māfuaaga ua e faia ai se faaiʻuga faapena?” O lana tali mai o le a fesoasoani ia te oe e iloa ai se tala e fai atu. Afai e manaʻomia ni faamaoniga maumaututū, atonu la o le tusi Is There a Creator Who Cares About You? o le mea moni lava lena o loo e manaʻomia.
8 E te ono faaauau se talanoaga ma se tagata e lē talitonu e iai se Atua i lou fesili atu:
◼ “Pe sa e tau mānatu: Pe afai e iai se Atua, aiseā la ua tele naʻuā ai mafatiaga ma le lē faamasinotonu i le lalolagi? [Faatali mo se tali.] Pe e mafai ona ou faailoa atu ia te oe le manatu o le Tusi Paia i lenei mataupu?” Faitau le Ieremia 10:23. Pe a uma ona faitau, ona fesili lea mo sona manatu i le mau. Ona faaali lea i ai o le itulau e 16 ma le 17 i le polosiua Will There Ever Be a World Without War? Pe na i lo lena, e mafai ona e faaaogā le mataupu e 10 o le tusi Creator. Fai i ai e mafai ona ave ma ia le lomiga ma faitau i le mataupu.—Mo nisi fautuaga atili, tagaʻi i le tusi Reasoning, itulau e 150-151.
9 O le mea moni, e lē o tagata uma e lē talitonu e iai se Atua o le a taliaina le upu moni. Ae o loo iai lava le toʻatele o tagata o ē fiafia e iloiloina se isi manatu. Ia faaaogā le tomai faalemafaufau, ma le faatauanau ae, e sili i mea uma lava, o le mana o le Afioga a le Atua e fesoasoani ai ia i latou ia iloa le upu moni.—Galu. 28:23, 24; Epe. 4:12.