E Malamalama Lelei le Atua iā te Oe

LE MĀFUAAGA E LĒ MAUTONU AI NISI: E toʻatele e manatu o i latou o tagata agasala, e lē mamā pe faatauvaa i le silafaga a le Atua. Sa maua Kendra i le lotomafatia faaumiumi, ma na ia lagona ai le nofosala ona o lona lē ausia o tapulaa a le Atua. O le iʻuga, na faapea mai o ia, “na ou lē toe tatalo ai.”

LE AʻOAʻOGA A LE TUSI PAIA: E lē vaavaai masei Ieova ma e malamalama lelei o ia i o tatou tulaga. Ua faapea mai le Tusi Paia “ua silafia lelei e ia le mea na faia ai i tatou” ma “ua ia manatua o le efuefu lava i tatou.” E lē gata i lea, e lē feutagaʻi o ia ma i tatou “e tusa ma a tatou agasala,” ae o lona alofa faifua e na te faamagaloina ai i tatou pe afai e faaalia le salamō.​—Salamo 103:10, 14.

Seʻi o tatou iloiloina le tulaga o Tavita, le tupu o Isaraelu lea o loo taʻua i le mataupu muamua o lenei lomiga. I lana tatalo i le Atua, na ia faapea atu ai: “Na silasila mai lava ou fofoga ina o afuafua aʻu, na tusia foʻi i lau tusi ona vaega uma, . . . Le Atua e, ia e saʻili mai iā te aʻu, ma silafia ai loʻu loto.” (Salamo 139:16, 23) Ioe, sa matuā talitonu maumauaʻi Tavita e ui i le matuiā o ana agasala, ae sa silafia lelei e Ieova lona loto salamō.

E leai se isi e malamalama lelei iā te oe ua na o Ieova. Ua taʻua i le Tusi Paia “o le tagata e vaai i le tino; a o Ieova e vaai i le loto.” (1 Samuelu 16:7) E malamalama lelei Ieova i le auala e tatou te amioaʻi ai, lo tatou tupuaga, le auala na tatou feola aʻe ai, siʻomaga ma le ituaiga tagata e iai i tatou. E silafia ma faatāua e Ieova au taumafaiga e faaleleia lou tulaga, e tusa lava pe e te faia ni mea sesē.

E faapefea i le silafia lelei e le Atua o lou ʻtulaga moni’ ona fesoasoani iā te oe?