MATAUPU AUTŪ | O AI MOLIMAU A IEOVA?
O ā Ituaiga Tagata e Iai Molimau a Ieova?
O i matou o se faalapotopotoga faavaomalo e ese mai i isi lotu. E ui lava o Amerika e iai la matou ofisa ulu, ae o le toʻatele o Molimau a Ieova e nonofo i isi atunuu. E silia ma le valu miliona i matou o loo aʻoaʻoina tagata i le Tusi Paia i le silia ma le 230 atunuu. Ua matou faia faapea ona o le mulimuli i fetalaiga a Iesu o loo i le Mataio 24:14: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma.”
Po o fea lava e matou te nonofo ai, e matou te usiusitaʻi ma le faamaoni i tulafono a atunuu. Peitaʻi, e matou te taumafai e tumau ona lē lagolagoina faiga faapolotiki. O le māfuaaga ona e matou te mulimuli i le faatonuga a Iesu i Kerisiano, ia lē avea i latou “o ni tagata o le lalolagi.” O lea, e leai sa matou vaega i mataupu ma faiga faapolotiki, pe lagolagoina faigātaua. (Ioane 15:19; 17:16) I le taimi o le Taua Lona Lua a le Lalolagi, sa faafalepuipuiina, sauāina ma fasiotia Molimau a Ieova ona sa tumau ona latou lē lagolagoina faiga faapolotiki ma taua. Na tusi sē na avea ma epikopō i Siamani e faatatau i Molimau a Ieova: “Ua talafeagai ona latou faapea mai ma le saʻo, e na o i latou na tetee i le pulega a Hitila ona o o latou talitonuga.”
“E mataʻina le malolosi o [Molimau a Ieova] i le itu tau amio. E mafai ona tatou faaaogā nei tagata lē manatu faapito i tulaga maualuluga faapolotiki, peitaʻi e lē taitai mafai ona tupu lenā tulaga. . . . E latou te amanaʻia pule o malo, ae e latou te talitonu e na o le Malo o le Atua e mafai ona foʻia faafitauli uma o tagata.”—Nusipepa o le Nová Svoboda, Czech Republic.
Peitaʻi, e matou te lē o faaesea i matou lava. Na tatalo Iesu i le Atua e faatatau i ona soo: “Ou te talosaga atu iā te oe, e aua neʻi aveesea i latou mai le lalolagi.” (Ioane 17:15) O lea, atonu e te vaaia i matou i galuega, i faleoloa ma aʻoga i le vaipanoa o loo e alaala ai.