O le Agamalu—O se Ala Atamai
O le galuega a Toñi o le tausia o tagata matutua. I se tasi aso, na ia oomi le logo o le faitotoʻa, ma na tatala mai e se fafine. Na avaavau mai le fafine ma tele ana tala iā Toñi ona ua tuai atu e vaai le tinā matua o le fafine. E leʻi tuai Toñi i le galuega. Peitaʻi, sa ia faatoese lemū atu i le fafine ona o le lē femalamalamaaʻi.
SA TOE soona lafo atu foʻi tala a le fafine iā Toñi i se isi aso. Na faapefea ona tali atu Toñi? Na ia faapea mai: “O se tulaga na faigatā tele. E matuā lē fetaui lava ana faamatalaga na lafo mai.” E ui i lea, na toe faatoese atu Toñi i le fafine ma fai i ai e malamalama i faigatā o loo feagai ma ia.
Pe ana faapea o oe o Toñi, o le ā le auala e te ono tali atu ai? Po o le a e taumafai e faaalia le agamalu? Po o le a faigatā ona pulea lou ita? Atonu e lē faigofie ona tatou toʻafilemu pea pe a tulaʻi ni tulaga e pei ona taʻua i luga. O se matuā luʻi le faaalia pea o le agamalu pe afai e tatou te popole pe faia e se isi se mea e faatigā mai ai.
Peitaʻi, ua faalaeiau mai le Tusi Paia i Kerisiano ia agamalu. Ua taʻua i le Afioga a le Atua e iai le sootaga o le agamalu ma le atamai. Na fesili Iakopo e faapea: “O ai se isi o outou ua atamai ma ua malamalama? Inā faailoa mai ia e ia lana amiolelei i ana lava galuega, i le agamalu e maua mai i le atamai.” (Iako. 3:13) Aiseā e avea ai le agamalu o se faamaoniga o le atamai mai i lugā? O le ā e fesoasoani iā i tatou ina ia atiaʻe ai lenei uiga o le Atua?
E ATAMAI LE FAAALIA O LE AGAMALU
O le agamalu e mafai ona faatoʻafilemu ai se tulaga vevesi. “O le tali filemu e liliueseina ai le ita, a o le upu faatigā e tupu ai le ita.”—Faata. 15:1.
O le tali atu ma le ita e mafai ona faateteleina ai se tulaga lē lelei o loo tupu, auā o le a faaopoopo ai malala i le afi. (Faata. 26:21) Ae o le tali atu ma le agamalu, e masani lava ona faatoʻafilemu ai se vevesi ma uiga o se tagata ita.
Sa iloa e Toñi lenei mea. Ina ua mātauina e le fafine le tali atu ma le agamalu o Toñi, na tagi le fafine. Sa faamatala e le fafine sa lē fiafia ona o ona faafitauli ma faafitauli faaleaiga. Sa faia e Toñi se molimau lelei, ma na amata ai se suʻesuʻega faale-Tusi Paia. O iʻuga lelei na o le faaalia e Toñi o uiga toʻafilemu.
O se uiga agamalu e mafai ona tatou lagona ai le fiafia. “E fiafia o ē e agamalu, auā e fai mo latou tofi le lalolagi.”—Mata. 5:5.
Aiseā e fiafia ai ē e agamalu? O le toʻatele o ē sa sauā, ua fiafia i le taimi nei ona ua latou faaalia le agamalu. Ua faaleleia o latou olaga ma iloa o le a latou maua se lumanaʻi matagofie. (Kolo. 3:12) E manatua e Adolfo, o se ovasia o le matagaluega i Sepania, lona olaga sa iai a o leʻi maua le upu moni.
Ua faapea mai o ia: “E leʻi iai se fuafuaga o loʻu olaga. O le tele o taimi e leʻi mafai ona taofi loʻu ita, ma e oo lava i nisi o aʻu uō sa fefefe i oʻu uiga faasausili ma sauā. Mulimuli ane na iai se mea na tupu na manaʻomia ai ona sui oʻu uiga. I se tasi o misa, e ono oʻu manuʻa mai i se naifi ma na toeitiiti lava a ou oti ai.”
Peitaʻi, i le taimi nei ua aʻoaʻo e Adolfo isi ina ia agamalu e ala i upu ma gaoioiga. E tosina le toʻatele i ona uiga māfana ma tauagafau. Ua taʻua e Adolfo ua fiafia ona o suiga ua ia faia, ma e na te faafetaia Ieova ona o le fesoasoani iā te ia ina ia atiaʻe le agamalu.
O le agamalu e faafiafiaina ai Ieova. “Loʻu atalii e, ia atamai oe ma faafiafia ai loʻu loto, ona ou mautali ai lea i lē o loo taufaifai mai.”—Faata. 27:11.
O loo taufaifai iā Ieova lona fili sili, o le Tiapolo lea. E tele māfuaaga e tatau ai ona toʻatamaʻi Ieova i na faifaiga, peitaʻi ua taʻua i le Tusi Paia o Ieova “e telegese lona toʻasā.” (Eso. 34:6) Pe a tatou taumafai e faaaʻoaʻo iā Ieova i le faagesegese ona ita ae agamalu, ua tatou mulimuli la i se ala atamai e matuā faafiafiaina ai Ieova.—Efe. 5:1.
Ua tumu lenei lalolagi i le sauā. Atonu e tatou te fetaiaʻi ma “ē e fia tagata, o ē e faamaualuluga, o ē e fai upuleaga i isi, . . . o ē e faia tala taufaaleaga, o ē e lē amio pulea, o ē e sauā.” (2 Timo. 3:2, 3) Ae e lē tatau ona taofia ai se Kerisiano mai i le atiaʻe o le agamalu. Ua faamanatu mai i le Afioga a le Atua “o le atamai mai i lugā, . . . e filemu, e magafagafa.” (Iako. 3:17) Pe a tatou faaalia le filemu ma le magafagafa, e faamaonia atu ai ua iā i tatou le atamai mai i le Atua. O lenā atamai o le a uunaʻia ai i tatou e tali atu ma le agamalu pe a faatigā mai se tasi, ma atili ai ona tatou vavalalata atu iā Ieova, o le Puna o le atamai uma.